¹ Pali ilya nshita abasambi balishile kuli Yesu no kulanda ati, " Bushe uwakulishapo mu bufumu bwa mu mulu nani?" ² Yesu alikutilepo akana akanono, no kukateka pakati kabo, ³ no kulanda ati, "Mucinefye nkolanda kuli mwebo nati, umfwa tamupilibwike no kuba nga bana banono, tamwakengile mu bufumu bwa mu mulu. ⁴ Eco kanshi, uyo onse uwaicefya umwine kubati nyaka akamwana akanono e mukalamba mu bufumu bwa mu mulu. ⁵ Uyo onse uwapokelela akana akanono ngefi mwishina lyandi apokelela nebo. ⁶ Lelo uyo onse uwalenga umo pali utu utwana utwacetekela muli nebo ukuipununa, cawamapo uyo muntu ukumukulikila icilibwe mu mukoshi, kabili afwile ukwibishiwa muli bemba apakushika. ⁷ "Akalanda ku calo pamulandu wa fya kuipununako! Pantu cililingile ukwebati ifya kuipununako fise, lelo akalanda ku muntu uyo ifya kuipununako fikoishilamo! ⁸ umfwa ukuboko kobe nangu ulukasa lobe wakulenga ukuipununa, kuputuleko na kukuposa. Cakuwamina ukwingila mu mweo makunkutu nangu uwakulemana ukucila ukuposwa mu mulilo wa muyaya ulikwete amaboko yabili nangu amakasa yabili. ⁹ Umfwa ilinso lyobe lilakulenga ukuipununa, lilobolemo no kuliposa. Cakuwamina ukwingila mu mweo ne linso limo ukucila ukuposwa mu mu mulilo wa ku mbo ulikwete amenso yonse yabili. ¹⁰ Mumone ukwebati tamusulilepo nangu kamo pali utu utwana utunono. Pantu nkolanda kuli mwebo nati mu mulu bamalaika batuko lyonse balolesha pa cinso cakwa Tata uwaba mu mulu. ^{11 12} Bushe mukontontonkanya shani? Umfwa umo alikwete impanga umwanda, na imo pali isho yaya iciyeyeye, bushe tekuti ashe ishili amakumi pabula- na pabula ku mbali ya lupili no kuya akofwaya imo iyaile iciyeyeye? ¹³ Umfwa aisange, mucinefye nkolanda kuli mwebo nati, alasangalala palwa iyo ukucila pali shilya amakumi pabula - na pabula isho ishishaile iciyeyeye. ¹⁴ Mu musango umo wine, tebufwayo bwakwa Shinwe wa mu mulu ukwebati umo pali utu utunono kenga loba. ¹⁵ Umfwa munonko akubembukila, kabiye no kumukalipila, pakati kenu mweka. Nga akukutika, ninshi wanonka munonko. ¹⁶ Lelo umfwa akana ukukutika kuli webo, sendapo umo nangu bambi babili muye nabo pakwebati pa bunte bwa bantu babili nangu batatu amashiwi yonse kuti yashininkishiwa. ¹⁷ Kabili umfwa akana ukukutika kuli bena, twala umulandu ku lukuta. Umfwa akana ukukutika na ku lukuta, muleke abe kuli webo kubati mwina fyalo kabili kubati ni kasonkesha wa musonko. ¹⁸ Mucinefye nkomweba nati, icintu conse ico wakaka pe sonde cikakakwa na mu mulu, na conse ico wakakula pe sonde cikakakulwa na mu mulu. ¹⁹ Nakabili nkomweba nati, umfwa babili pali mwebo basuminishanya pe sonde pa cili conse ico balomba, cikacitwa kuli bena na Tata uwaba mu mulu. ²⁰ Pantu apali babili nangu batatu abalongene mwishina lyandi, palya epo ndi pakati kabo." ²¹ Nolu Petero alishile no kulanda kuli Yesu ati, "Mwe Shikulu, miku inga munyina enga mbembukila kabili na mwelela? Bushe kufikafye imiku cinelubali?" ²² Yesu alilandile kuli ena ati, "Nshacikweba ati cinelubali, lelo kano ukufikafye ne miku amakumi cinelubali na cinelubali. ²³ Eco ubufumu bwa mu mulu bwapalanina ku mfumu iyali kufwaya ababomfi baiko ukubwesha imisha. ²⁴ Ulo atampile ukupoka, umo umubomfi aliletelwe kuli ena uwa mukwatile inkongole amatalanta amakana ikumi. ²⁵ Lelo apo takwete inshila yakulipilamo, shikulu wakwe alikonkomeshe ukwebati bamushitishe, kumo no mukashi na abana na fyonse ifyo akwete, no kwebati amalipilo yenga lipilwa. ²⁶ Eco umubomfi aliwile panshi, no kumufukamina, no kulanda ati, 'Mwe shikulu, ndoleleniko panono, kabili nkamilipila fyonse. ²⁷ Eco kanshi shikulu wa ulya mubomfi, apo aliketwe inkumbu, alimukakwile no kumwelela imisha. ²⁸ Lelo ulya mubonfi alile no kuya kusanga umubomfi munankwe umo, uwa mukwatile imisha umwanda umo. Alimwiteke, alitendeke ukumukama, no kulanda ati, 'Ndipila inkongole wankwatila.' ²⁹ ''Lelo umubomfi munankwe aliwile panshi no kupapata kuli ena, ukwebati, 'Ndolelako panono, kabili nkakulipila.' ³⁰ Lelo umubomfi wakubalilapo alikene. Lelo, alile no kumuposa mu cifungo mpakafye akamulipile ifyo akongwele. ³¹ Ulo ababomfi banankwe bamwene ifya citike, baliketwe no bulanda sana. Balishile kabili balyebele shikulu wabo fyonse ifya citike. ³² ''Nolu shikulu wa ulya mubomfi alimukutile no ukulanda kuli ena ati, 'We mubomfi mubi, nalikwelelako pali ilya imisha yonse pantu wali mpapatile. ³³ Tekuti nobe ukwate uluse ku mubonfi munobe, ngefyo nanebo nakubelele uluse?' ³⁴ Shikulu wakwe alikalipe kabili alipele kuba ku mukanda mpakafye akalipile fyonse ifyo akongwele. ³⁵ Ifyo efyo na Tata wa mu mulu akacita kuli webo umfwa tawelele ndume yobe ukufuma panshi ya mutima obe."