¹ Panuma ya nshiku mutanda Yesu alisendele Petero, Yakobo na Yohane ndume yakwe, no kubatwala pamulu pa lupili ulutali apo bali beka. ² Alicinjishiwe pa menso yabo. Icinso cakwe calibengeshime kubati kasuba, na malaya yakwe yalishile kuba ayakubutisha kubati lubuto. ³ Moneni, palya pamonekele kuli bena Mose na Eliya bakolanda nakwe. ⁴ Petero alyaswike no kulanda kuli Yesu ati, "Mwe Shikulu, ciliweme fyebo ukuba pano. Umfwa mukofwaya, nkomipangilapo pano insakwe shitatu - imo yenu, imo yakwa Mose, na imo yakwa Eliya." ⁵ Ulo ali acili akolanda, moneni, ikumbi lyakubuta lyalibafimbile, kabili moneni, ne shiwi yalifumine mwi kumbi, likoeba ati, "Uyu Mwana wandi uwatemwikwa, muli ena emo mbekelwa. Mumfwileni." ⁶ Ulo abasambi baumfwile ifi, baliwele ubunkupeme kabili baliketwe no mwenso sana. ⁷ Nolu Yesu alishile kubekata no kulanda ati, "Imeni kabili mwitina." ⁸ Nolu baliloleshe mu mulu kabili tabamwenemo nangu umo kanofye Yesu eka. ⁹ Ulo bali bakotentemuka ulupili, Yesu alibakonkomeshe, ukwebati, "Mwiesha kwebako umuntu nangu umo ici icimonwa mpakafye Umwana wa Muntu akabuke ukufuma kubafwa." ¹⁰ Abasambi bakwe balimwipwishe, ukwebati, "Nindo kanshi bakalemba balandila ukwebati Eliya eufwile ukubalilapo ukwisa?" ¹¹ Yesu alyaswike no kulanda ati, "Eliya kwena akesa no kwisa kubwekeshapo ifintu fyonse. ¹² Lelo nkomweba mwebo nati, Eliya alisa kale, lelo tabamwishibe. Lelo, balicitile fyonse ifyo balikufwaya kuli ena. Mu musango umo wine, Umwana wa Muntu nao akacula mu minwe yabo." ¹³ Nolu abasambi balilwike ukwebati akolanda kuli bena pali Yohane Kabatisha. ¹⁴ Ulo baishile kwi bumba, umwaume alishile kuli ena, alifukeme kuli ena, no kulanda ati, ¹⁵ "Mwe Shikulu, beleleni umwana wandi umwaume uluse, pantu alilwala ubulebe kabili alacushiwa sana. Pantu ilingi alaponena mu mulilo nangu mu menshi. ¹⁶ Nacimuleta ku basambi benu, lelo tabacimundapa." ¹⁷ Yesu alyaswike no kulanda ati, "Mwebakubula icicetekelo kabili inkulo iyakutalama, bushe nkaba nenu ukufika lilali? Bushe nkashipikisha nenu ukufika lilali? Muleteni kuno kuli nebo." ¹⁸ Yesu alikalipile ingulu, kabili yalifumine muli ena, no mulumendo alipolele ukufuma pa nshita ilya ine. ¹⁹ Nolu abasambi balishile kuli Yesu ku mbali no kulanda ati, "Nindo tushaciitamfisha?" ²⁰ Yesu alilandile kuli bena ati, "Ni pamulandu wa kucepa kwa cicetekelo cenu. Pantu mucinefye nkolanda kuli mwebo nati, umfwa mwakwatafye icicetekelo icinono nga akaluseke ka lubanga, kuti walanda ku lupili ulu ati, 'Sela ukufuma pano kabiye palya,' nalo lukasela, kabili takwakabe icikaba icakwafya kuli webo." ^{21 22} Ulo baikele mu Galili, Yesu alilandile ku basambi bakwe ati, "Umwana wa Muntu akapelwa mu minwe ya bantu, ²³ kabili bakamwipaya, no bushiku bwa kulenga shitatu akabushiwa." Abasambi baliketwe ubulanda nganshi. ²⁴ Ulo baishile ku Kapenaumu, abaume abali kusonkesha imisonko ya mwi tempele ibili balishile kuli Petero no kulanda ati, "Bushe kasambilisha wenu tapela imisonko ibili iya mwi tempele?" ²⁵ Alilandile ati, "Ee." Ulo Petero aishile mu ng'anda, Yesu alibalilepo ukulanda kuli ena ati, " Bushe ukotontonkanyapo shani, Simone? Ni kuli bani uko bashamfumu ba pesonde bapoka imisangulo nangu imisonko? Kufuma ku bana babo nangu kufuma kuli bambi?" ²⁶ "Kufuma kuli bambi," efyo Petero aaswike. "Kanshi abana babo abaume bantungwa," efyalandile Yesu. ²⁷ Lelo pakwebati tatulengele bakasonkesha bamusonko ukuipununa, kabiye kuli bemba, uye kuposa indobo, no kwikatapo isabi ilyalabalilapo ukwisa pamulu. Ulo walaisula akanwa kaliko, ukosangamo indalama. Uipite no kuipela kuli bakasonkesha ba musonko ulipilileko nebo na webo."