¹ Yesu alifumine mwi tempele kabili alikuya mu nshila yakwe. Abasambi bakwe balishile kuli ena no ku musontelela ku fikulwa fye tempele. ² Lelo alibaswike no kulanda kuli bena ati, "Bushe tamukomona ifi fintu fyonse? Mucinefye nkomweba nati, takulipo ibwe nangu limo ilikashala pa mulu wa linankwe ilishakapilibulwe." ³ Ulo aikele pa lupili lwa Miolife, abasambi balishile kuli ena ku mbali no kulanda ati, "Twebeni, ni lilali ifi fintu fikacitika? Fishibilo ndo ifya kwisa kwenu ne mpela ya nshita?" ⁴ Yesu alibaswike no kulanda ati, "Mucenjele ukwebati umuntu uuli onse emilufya. ⁵ Pantu abengi bakeshila mwishina lyandi. Bakalanda ati, 'Nine Kristu,' kabili bakalufya abengi. ⁶ Mukomfwa inkondo na mangufu-ngufu ya nkondo. Mumone ukwebati tamusakamikwe, pantu ifi fintu fifwile ukucitika; lelo impela tailati kufika. ⁷ Pantu uluko lukemina uluko, no bufumu bukemina ubufumu. Kukaba icipowe ne finkukuma mu cende ishakulekana-lekana. ⁸ Lelo ifi fintu fyonse ni ntendekelofye ya bukali bwa pa kupapa. ⁹ Nolu bakamitwala ku kumicusha no kumipaya. Mukapatwa ku nko shonse pamulundu we shina lyandi. ¹⁰ Nolu abengi bakaipununa, no kuifutukila umo no munankwe no kupatana umo no munankwe. ¹¹ Abengi bakasesema wa bufi bakema no kulufya abengi. ¹² Pantu ubupulumushi bukafula, ne citemwiko mu bengi cikafubalishiwa. ¹³ Lelo uyo uukashipikisha ukufika ku mpela akapusuka. ¹⁴ Iyi mbila nsuma iya bufumu ikashimikilwa mu calo conse ngo bunte ku nko shonse. Elo impela ikesa. ¹⁵ Eco, ulo mwamona ica muselu ica kubongolola, icalandilwepo kuli Daniele kasesema, iminine mu ncende ya mushilo" (Iekeni uukobelenga eluke), ¹⁶ ''lekeni abo abali mu Yudea bafulumukile ku mpili, ¹⁷ lekeni uuli pa mutenge wa ng'anda eseluka ukwebati asende akali konse ukufuma mu ng'anda yakwe, ¹⁸ Kabili mwileka uuli mwibala abwelelemo mukusenda umwingila wakwe. ¹⁹ Lelo akalanda kuli abo abali ne fumo na abo abakoonsha utunya muli isho nshiku! ²⁰ Pepeni ukwebati ulwendo lwenu lwikaba mu mupepo nangu pe Sabata. ²¹ Pantu kukaba ubucushi ubukalamba, ubushatala bapo ukufuma mu kutendeka kwa calo ukufika na nomba, iyoo, nangu takwakatale akubapo nakabili. ²² Kanofye isho nshiku bashicefya, takuli umuntu uwinga pusuka. Lelo pamulandu wa basalwa isho nshiku shikacefeshiwa. ²³ Nolu umfwa uuli onse amyeba ati, 'Lolesheni, Kristu uyu apa!' nangu, 'Kristu uyo palya!' Mwisumina ico. ²⁴ Pantu ba Kristu ababufi na bakasesema ababufi bakema no kulangisha ifilangililo ifikalamba ne fipapwa, pakweba ati balufye abengi, nga cinganguka, pamo na basalwa. ²⁵ Moneni, namwebela libela ulo inshita tailafika. ²⁶ Eco kanshi, umfwa bamweba ati, 'Moneni, ali mu matololo,' mwikayako ku matololo. Nangula, 'Moneni, ali mu miputule ya mukati,' mwisumina ico. ²⁷ Pantu ngefyo inkuba isanika ukufuma ku kabanga no kubyasha ukuyafye na ku masamba, efikaba no kwisa kwa Mwana wa Muntu. ²⁸ Uko ukuli inama yakufwa, ekukolongana amakubi. ²⁹ ''Lelo panumafye ya bucushi bwa isho nshiku isho akasuba kakafita, umweshi tawakapele ulubuto lwauko, intanda shikawa ukufuma mu lwelele, na maka ya myulu ya kasunkanishiwa. ³⁰ Nolu icishibilo ca Mwana wa Muntu cikamonekela mu lwelele, ne mitundu yonse iya pe sonde ikalosha. Bakamona Umwana wa Muntu akoisa mu makumbi ya mu lwelele na maka no bukata ubukalamba. ³¹ Akatuma bamalaika bakwe ne ciunda icikulu ice penga, kabili bakalonganika capamo abasalwa bakwe ukufuma ku myela ine, ukufuma ku mpela imo iya lwelele ukufika ku ibiye. ³² "Sambilileni isambililo ku cimuti ca mukunyu. Ulofye imisambo yaaluka iiteku no kupulula amabula ya uko, muleshiba ukwebati ulusuba lulipaleme. ³³ Eco nemwe bene, ulo mwamona ifi fintu fyonse, mufwile ukwishiba ukwebati alipalamine, pali shilya shine impongolo. ³⁴ Mucinefye nkolanda kuli mwebo nati, iyi nkulo tayakapite mpakafye ifi ifintu fyonse fyacitika. ³⁵ Umulu ne sonde fikapita, lelo ifyebo fyandi tafyakapite. ³⁶ Lelo palwa bushiku bulya na kashita takwaba uwaishiba, nangufye ni bamalaika ba ku mulu, nangu Mwana, lelo kanofye Wishi. ³⁷ Ngefyo inshiku shakwa Noa shali, efikaba no kwisa kwa Mwana wa Muntu. ³⁸ Pantu ngefyo cali mu nshiku isho ulo ilyeshi talilaisa balikulya no kunwa, balikupa no kufya ukufika no bushiku ubo Noa aingile mu cibwato, ³⁹ kabili tabaishibilepo akantu nangu kamo ukufika nelyo ilyeshi lyaishile no kubasenda bonse - efikaba no kwisa kwa Mwana wa Muntu. ⁴⁰ Nolu abaume babili bakaba mwibala - umo akasendwa, na umbi akashala. ⁴¹ Abanakashi babili bakalapela ne mpelo - umo akasendwa, kabili umbi akashala. ⁴² Eco kanshi mube abakulola, pantu tamwaishiba ubushiku ubo Shikulu wenu akesa. ⁴³ Lelo ishibeni ifi, ukwebati umfwa shikulu wa ng'anda alishibile libela mu nshita ya bushiku umupupu ali nokwisa, nga ali mubulinde kabili nga tasuminishe ing'anda yakwe ukusanswa. ⁴⁴ Eco kanshi mufwile ukuba abaiteyanya, pantu Umwana wa Muntu akesa pa nsa tamukoenekela. ⁴⁵ "Eco mubomfi nshi uwacishinka kabili uwa mano uo shikulu wakwe apeela amaka pa ng'anda yakwe uwakulabapela ifyakulya fyabo pa nshita yakulinga? ⁴⁶ Uwakupalwa ni ulya umubomfi uo shikulu wakwe akasanga akocita ifyo ulo akesa. ⁴⁷ Mucinefye nkolanda kuli mwebo nati shikulu wakwe akamupela amaka pa fikwatwa fyakwe fyonse. ⁴⁸ Lelo umfwa umubomfi umubifi alanda mu mutima wakwe ati, 'Shikulu wandi akokola,' ⁴⁹ kabili atendeka ukuma ababomfi banankwe, no kulya no kunwa pamo na bacakolwa, ⁵⁰ nolu shikulu wakwe akesa pa bushiku ubo takoenekela na pa nshita iyo teshibe. ⁵¹ Shikulu wakwe akamuputaula mutupimfya no mukupela icende pamo na babubi-munda, uko ukukaba ukulila no kusumanya ameno.