¹ Nomba ulo caishile kuba ulucelo, bonse bashi-mapepo bakalamba na bakalamba ba bantu balipangene palwa kwipaya Yesu. ² Balimukakile, no kumusenda, kabili balimupele kuli Pilato cilolo. ³ Nolu ulo Yuda, uwa mufutwike, amwene ukwebati Yesu asekwa, alilapile kabili alibwekeshemo isha silfere amakumi yatatu kuli bashimapepo bakalamba na bakalamba, ⁴ no kulanda ati, ''Ndibembwike pa kufutukila umulopa wa kaele.'' Lelo balilandile ati, ''Nindo iyo kuli fwebo? Uimwene we mwine.'' ⁵ Nolu aliposele panshi isha silfere mwi tempele, kabili alifumineko, kabili alile kuikulika. ⁶ Bashimapepo bakalamba balibulile isha silfere no kulanda ati, ''Tefunde ukubika ishi mucipao pantu mutengo wa mulopa.'' ⁷ Balilanshenye uyu mulandu bonse, kabili kuli isho indalama balishitilemo impanga ya kwa kabumba wa nongo umwakushika abeni. ⁸ Na pamulandu wa ici ilya mpanga ikutwa, ''Impanga ya Mulopa'' ukufika na lelo. ⁹ Nolu cilya icalandilwe na Yeremia kasesema cali fikilishiwe, ukwebati, ''Balibulile isha silfere amakumi yatatu, umutengo uwabikilwe pali ena ku bana bakwa Israeli, ¹⁰ no kushipela ku mpanga ya kwa kabumba wa nongo, ngefyo Shikulu antungulwile.'' ¹¹ Nomba Yesu aliminine pamulola wakwa cilolo, kabili cilolo alimwipwishe ati, ''Bushe uli mfumu yaba Yuda?'' Yesu alimwaswike ati, ''Ulilandile ifyo fine.'' ¹² Lelo ulo balikumutunganya kuli bashimapepo bakalamba na bakalamba, tabasukile nangu kamo. ¹³ Nolu Pilato alilandile kuli ena ati, ''Bushe taukomfwa ifintu ubwingi ifyo bakokutunganya?'' ¹⁴ Lelo ta-aswike ishiwi nangu limo, icakwebati cilolo calimupapwishe. ¹⁵ Nomba pa nshita ya mutebeto wali mutande wakwa cilolo ukulekako umufungwa umo uo ibumba lyalikusala. ¹⁶ Pali ilya nshita balikweteko umufungwa ntalamisoka uwali kwitwa Baraba. ¹⁷ Eco kanshi ulo bakolongene pamo, Pilato alilandile kuli bena ati, ''Ninani mukofwaya mikakwileko? Baraba, nangu Yesu uukutwa Kristu?'' ¹⁸ Alishibile ukwebati ni pamulandu wa kalumwa bapelele Yesu kuli ena. ¹⁹ Ulo ali alikele pa cipuna ca bupingushi, umukashi wakwe alitumine amashiwi kuli ena no kulanda ati, ''Wibulamo ulubali muli uyo muntu wakaele. Pantu ndiculile sana lelo pamulandu wa ciloto nacikwata pali ena.'' ²⁰ Nomba bashimapepo bakalamba na bakalamba bali sonsombele ibumba ukwebati balombe Baraba, no kwipaya Yesu. ²¹ Na cilolo alibepwishe ati, ''Bushe ninani pali aba babili uomukofwaya nebo mikakwilepo?'' Balilandile ati, ''Baraba.'' ²² Pilato alilandile kuli bena ati, ''Nindo nkocita na Yesu uwitwa Kristu?'' Bonse balimwaswike ati, ''Mutanikeni.'' ²³ Nolu alilandile ati, ''Nindo, bubi ndo acitile?'' Lelo balicililemo ukubilikisha ati, ''Mutanikeni.'' ²⁴ Eco kanshi ulo Pilato amwene ukwebati tapali icikomwafwa, lelo intulubundi eyali ikotendeka, alibulile amensi, alisambile na kuminwe pamulola we bumba no kulanda ati, ''Nebo ndi wakaele pa mulopa wa uyo muntu, Muimwene mwebene.'' ²⁵ Abantu bonse balilandile ati, ''Umulopa wakwe na ube pali fwebo na bana besu.'' ²⁶ Nolu alibakakwilile Baraba, lelo alilopwele Yesu no kumupela mukutanikwa. ²⁷ Nolu abashilika bakwa cilolo balitwele Yesu ku cipango cikalamba ica buteko no kukolonganika impuka yonse iya ba shilika. ²⁸ Balimufulile kabili balimufwikile umwingila wakukashika cee. ²⁹ Balipikwile ne cilongwe ca myunga no kubika pa mutwe wakwe, kabili balibikile inkonto ku kuboko kwakwe ukwa ku kulyo. Balimufukamine no ku mupunika, ukwebati, ''Mulopwe, we Mfumu yaba Yuda!'' ³⁰ Balimusakile amate, kabili balibulile inkoto noku muma kumutwe imiku ne miku. ³¹ Panuma ya kumupumya, balimufulile umwingila no ku mufwika amalaya yakwe kabili bali mutwele na mu ku mutanika. ³² Ulo bafumine kunse, balisangile umuntu uwafumine ku Kurene ishina lyakwe ni Simone, uo bapatikishe ukuya nabo pakwebati engamusendelako icapindama cakwe. ³³ Balifikile kuncende iikutwa Gologota, icikopilibula ukwebati ''Incende ya Cipanga.'' ³⁴ Balimupele umwangashi wakukantuka uo basankenyemo indusha. Lelo ulo ausondele, alifililwe ukunwa. ³⁵ Panuma ya kumutanika, balyakenye amalaya yakwe mukuteya icakupendula, ³⁶ kabili balikele bakomulinda. ³⁷ Pamulu wa mutwe wakwe balilembelepo umulandu wakwe, uwalikubelengwa ukwebati, ''Uyu ni Yesu, imfumu yaba Yuda.'' ³⁸ Utupondo tubili twalitanikilwe pamo nankwe, kamo ku kulyo kwakwe kambi ku kuso. ³⁹ Nabo abali kupita bali mutukile, bakopukunya imitwe yabo ⁴⁰ no kwebati, ''Webo we wali no kubongolola itempele no kulikula mu nshiku shitatu, ipusushe wemwine! Umfwa uli Mwana wakwa Lesa, ikila pa capindama!'' ⁴¹ Mu musango umo wine bashimapepo bakalamba bali kumupunika, pamo na bakalemba na bakalamba, no kulanda ati, ⁴² ''Alipuswishe bambi, lelo tekuti aipusushe umwine. Ni Mfumu ya bena Israeli. Lekeni ekile ukufuma pa capindama, elo tukosumina muli ena. ⁴³ Alicetekela muli Lesa, lekeni Lesa amupusushe nomba, umfwa Lesa asuminisha ukumukakula. Pantu umwine alilanda ati, 'Ndi Mwana wakwa Lesa.''' ⁴⁴ Mu musango umo wine utupondo utwatanikilwe pamo nankwe nato twine twalimutukile. ⁴⁵ Nomba pa nsa yakulenga mutanda imfifi yalishile pe sonde ponse ukufika na pa nsa yakulenga pabula. ⁴⁶ Pa nsa yakulenga pabula, Yesu alipundile ne shiwi ilikalamba kabili alilandile ati, ''Eloi, Eloi, lama sabakatani?'' icikopilibula ati, ''Lesa wandi, Lesa wandi, nindo mwandekelesesha?''' ⁴⁷ Ulo abo abaiminine palya baumfwile ifi, balilandile ati, ''Akokuta Eliya.'' ⁴⁸ Apopenefye umo pali bena alibutwike nokuya kubula umwepu, aliswishemo umwanganshi wakukantuka, no kubika ku nkonto yetete, no kumupa ukwebati anwe. ⁴⁹ Na bashala bonse balilandile ati, ''Mulekeni eka. Lekeni tumone umfwa Eliya akoisa kumupususha.'' ⁵⁰ Nolu Yesu nakabili alipundile ne shiwi ilikalamba kabili alilekele umweo. ⁵¹ Moneni, icisalu ca mwi tempele calilepwike pabili ukufuma pa mulu ukufika na panshi, kabili umushili walisunkene na mabwe yalilekenemo pakati. ⁵² Inshishi shaliswike, kabili ne mibili ya bamushilo abalele utwa mfwa balibukile. ⁵³ Balifuminemo munshishi panuma ya kubuka kwakwe, balingile mu musumba wa mushilo, kabili balimonekele na ku bengi. ⁵⁴ Nomba ulo umukalamba wa bashilika nabo abali kulinda Yesu bamwene icinkukuma ne fintu fyacitike, balyumfwile umwenso sana kabili balilandile ati, ''Mucinefye uyu ali Mwana wakwa Lesa.'' ⁵⁵ Bana mayo abengi abali kukonka Yesu ukufuma ku Galili kukutangata ifya kukabila fyakwe balikutamba akatalamukila. ⁵⁶ Pali abo pali Maria umwina Magadala, Maria nyina wakwa Yakobo na Yosefe, na nyina wa bana baume bakwa Sebede. ⁵⁷ Ulo caba icungulo, kwalishile umuntu umukankala ukufuma ku Arimatea, uwe shina lya Yosefe, uwali nankwe musambi wakwa Yesu. ⁵⁸ Alikumenye Pilato no kulomba umubili wakwa Yesu. Nolu Pilato alipele insambu ukwebati bamupele umubili. ⁵⁹ Yosefe alisendele umubili, aliupombele mu nsalu ya busaka iya kolokondwe, ⁶⁰ kabili aliulalike mu nshishi yakwe iipya iyo aimbile mwi libwe. Nolu alisunkilepo icilibwe icikalamba pa mwinshi wa nshishi no kuya. ⁶¹ Maria umwina Magadala na Maria umbi bali palya, balikele apalungatene ne nshishi. ⁶² Ubushiku ubwa konkelepo, ubwali bushiku panuma ya bushiku bwa kupekanya, bashimapepo bakalamba na baFarise balikolongene pamo na Pilato. ⁶³ Balilandile ati, ''We mfumu, tulibukishe ukwebati ulo ulya kabepa ali no mweo, alilandile ati, 'Panuma ya nshiku shitatu akabuka nakabili.' ⁶⁴ Eco peleni ikambisho ukwebati inshishi icingililwe ukufika ku nshiku shitatu, nga teifyo abasambi bakwe kuti baisa kumwiba no kulanda ku bantu ati, 'Alibukile ku bafwa,' kabili ukulufya kwakulekelesha kukaba ukwabipisha ukucila ukwa ntanshi.'' ⁶⁵ Pilato alilandile kuli bena ati, ''Sendeni kalinda. Kabiyeni mucingilile ukulingana nefyo mwishibe.'' ⁶⁶ Eco balile no kulenga inshishi ukulindwa, balishinkilepo icilibwe no kubikapo ba kalinda.