¹ Nomba panuma ye Sabata, ulo cafikile ku maca pa bushiku bwakubalilapo ubwa mulungu, Maria Magadala na Maria umbi balishile mukumone nshishi. ² Moneni, kwali icinkukuma icikalamba, pantu malaika wakwa Shikulu alikile ukufuma ku mulu, alishile ku nkulushyapo icilibwe, no kwikalapo. ³ Ali kumoneka kubati ni nkuba, ne fyakufwala fyakwe fyalibutile nge mfula ya bungululu. ⁴ Bakalinda balitutwime ku mwenso no kuba kubati bantu bafwile. ⁵ Malaika alilandile na banakashi no kulanda kuli bena ati, ''Mwitina, pantu ndishibe ukwebati mukofwaya Yesu, uwatanikilwe. ⁶ Tali muno, lelo alibukile, ngefyo alandile. Iseni mumone apo shikulu alele. ⁷ Kabiyeni mukwangufyanya muye kweba abasambi bakwe ati, 'Alibukile kubafwa. Moneni, alimitangililile ku Galili. Kulya eko mukoya kumumona.' Moneni, namyeba.'' ⁸ Abanakashi balifumineko mukwangufyanya ku nshishi no mwenso ne nsansa ishingi, balibutwike ukuya kweba abasambi bakwe. ⁹ Moneni, Yesu alibakumenye no kulanda ati, ''Mwapoleni!'' Banamayo balishile, balikete amakasa yakwe no ku mushinshimuna. ¹⁰ Nolu Yesu alilandile kuli bena ati, ''Mwitina. Kabiyeni muyekweba ba munyinane baye ku Galili. Kulya eko bakaya kumbwena.'' ¹¹ Nomba ulo abanakashi balikuya, moneni, bamo abapali bakalinda balile mu musumba no kuya kweba bashimapepo bakalamba ifintu fyonse ifyacitike. ¹² Ulo bashimapepo bakalamba bakumene na bakalamba no kulanshanya nabo ulya mulandu, balipele indalama ishingi ku bashilika ¹³ no kubeba ati, 'Mulande kuli bambi ati, 'Abasambi ba kwa Yesu bacisa ubushiku no kwiba umubili wakwe ulo twacisendama.' ¹⁴ Umfwa ii imbila yafika kuli cilolo, tukamunasha no kufumya amasakamiko ayali yonse kuli mwebo.'' ¹⁵ Eco kanshi abashilika balipokele indalama no kucita ifyo ba bebele. Imbila iyi yalisabankene monse mu ba Yuda kabili yalitwalilila ukufika na lelo. ¹⁶ Lelo abasambi ikumi na umo balile ku Galili, ku lupili ulo Yesu abasontelele. ¹⁷ Ulo bamumwene, bali munshishimwine, lelo bamo balitwishike. ¹⁸ Yesu alishile kuli bena kabili alilandile nabo ukwebati, ''Amaka yonse yalipelwe kuli nebo mu mulu na pe sonde. ¹⁹ Eco kanshi kabiyeni no kuya kulenga aba nko shonse ukuba abasambi. Mulekubabatisha mwishina lyakwa Tata, ilya Mwana, ne lya Mupashi wa Mushilo. ²⁰ Mulekubasambilisha ukubaka fyonse ifyo na mikonkomeshe. Moneni, na kulaba na mwebo lyonse, mpaka na kumpela ya nshita.''