1 Calishile kuba ukwebati ulo apwile ukulanda ifi fyebo fyonse, alilandile kubasambi bakwe ati, 2 "Mulishibe ukwebati panuma ya nshiku shibili kukaba Icakucilila, no Mwana wa Muntu akapelwa ku kutanikwa." 3 Nolu bashimapepo bakalamba na bakalamba ba bantu balilongene capamo mu lubansa lwakwa shimapepo mukalamba uwalikukutwa Kayafa. 4 Balipangane capamo ukwikata Yesu mubumfisolo no kumwipaya. 5 Pantu bali kulanda ati, ''Tepa mutebeto iyoo, pakwebati tapemine intulubundi pakati kabantu." 6 Nomba ulo Yesu ali mu Betani mu ng'anda yakwa Simone uwa fibashi, 7 Ulo akuweme kwi tebulo, umwanakashi alishile kuli ena uwakwete umusashi wamafuta ayakununkila ayakuluma umutengo, kabili aliyapongolwelele pamutwe wakwe. 8 Lelo ulo abasambi bamwene ici, balifulilwe sana no kulanda ati; "Bonaushi bwa musango shani ubu? 9 Pantu aya ngayalishitishiwe pa mutengo uukalamba no kupelwa ku babusu. 10 Lelo Yesu, pakwishiba ici, alilandile kuli bena ati, "Nindo mukocushisha uyu mwanakashi? Pantu alicitile icintu icabune kuli nebo. 11 Ababusu mwaba nabo lyonsefye, lelo tamwakabe nandi lyonse. 12 Pantu ulo apongolwelele aya mafuta pamubili wandi, acitile ku kuteyanya ukushikwa kwandi. 13 Mucinefye nkolanda kuli mwebo nati, konse uko iyi imbila nsuma ikabilwa mu calo conse, ifyo uyu mwanakashi acita nafyo fikalandwapo pa kumwibukisha." 14 Elo umo uwa pa bekumi na babili, uwalikwitwa ati Yuda Iscariote, alile kuli bashimapepo bakalamba no kulanda ati, 15 "Bushe nishinga muipeleshe ukundipila pakwebati mupele kuli mwebo?'' Balipimine indalama sha silfere amakumi yatatu. 16 Ukufuma pali ilya nshita alikufwailikisha apakumupelela kuli bena. 17 Nomba pa bushiku bwa ntanshi ubwa mukate uushatutumuka abasambi balishile kuli Yesu no kulanda ati, "Nikwisa mukofwaya tuye kumipekanishisha icakulya Cakucilila?" 18 Alilandile ati, ''Kabiyeni mu musumba ku muntu umo nokuya kumweba ati, 'Kasambilisha alanda ati, "Inshita yandi ilipaleme. Nikwenu eko nkokwatila icakulya Cakucilila pamo na basambi bandi."'' 19 Abasambi balicitile ukulingana nefyo Yesu abalangilile ukucita, balipekenye ne cakulya ca Cakucilila. 20 Ulo icungulo cafikile, alikele ku kulya na bekumi na babili. 21 Ulo balikulya, alilandile ati, "Mucinefye nkomweba nati umo pali mwebo akamfutuka." 22 Baliketwe ubulanda, kabili cila umo alitendeke ukumwipusha ati, ''Icinefye tenebo, Mwe Shikulu?" 23 Alyaswike ati, "Uyo uo nkotobela nankwe mwi bakuli ninshi eukomfutuka. 24 Umwana wa Muntu akaya, ukulingana nefyo calembwa. Lelo akalanda kuli uyo uwafutuka Umwana wa Muntu! Nga calimuwamine ulya muntu nga tafyelwe." 25 Yuda, uwali no kumufutukila alilandile ati, "Bushe ninebo, Rabbi?" Alilandile kuli ena ati, ''Ulilandile we mwine." 26 Ulo balikulya, Yesu alibulile umukate, aliupalile, no kuumokaula. Alipele ku basambi no kulanda ati, "Buleni, lyeni. Uyu emubili wandi.'' 27 Alibulile ulukombo no kutotela, kabili alipele kuli bena no kulanda ati, "Nweni, mwebo bonse. 28 Pantu uyu emulopa wandi uwa cipangano cipya uukopongolwelwa pa bengi ku kulekelelwa imembu. 29 Lelo nkolanda kuli mwebo nati, nshakanwepo nakabili ici cisabo ca mwangashi, ukufikafye na pa bushiku bulya ulo nkanwa icipya pamo na mwebo mu bufumu bwakwa Tata." 30 Ulo baimbile ulwimbo, balile ku lupili lwa Miolife. 31 Nolu Yesu alilandile ati, ''Bonse mwebo mukoipununa buno bushiku pa mulandu wandi, pantu calilembwa ati, "Nkoma kacema no mukuni wa mpanga ukasalangana.' 32 Lelo ulo nkabushiwa, Nkamitangilila ku Galili.'' 33 Lelo Petero alimwaswike ati, "Nangu bonse baipunune pa mulandu wenu, nebo nshakaipunune." 34 Yesu alilandile kuli ena ati, "Mucinefye nkolanda kuli webo nati, buno bwinefye ubushiku, ulo mukolwe talalila, ukonkana imiku itatu." 35 Petero alilandile kuli ena ati, "Nangu ningafwa na mwebo, nshamikane.'' "Na basambi bonse balilandile cimo cine. 36 Nolu Yesu alile nabo ku cifulo citwa Getsemane no kulanda ku basambi bakwe ati, ''Ikaleni apa ulo nebo nkoya kulya no kupepa." 37 Alipitile Petero na bana baume babili abakwa Sebede kabili alitendeke ukwikatwa ubulanda no kucushiwa. 38 Nolu alilandile kuli bena ati, "Umupashi wandi waikatwa ubulanda, ukufika na kumfwa. Shaleni pano no kulola na nebo." 39 Alile akatamukila, aliwile ubunkupeme, no kupepa. Alilandile ati, "Mwe Tata, umfwa cilyangwike, lekeni ulu lukombo lupite pali nebo. Lelo, tebufwayo bwandi, lelo bufwayo bwenu." 40 Alishile ku basambi kabili alisangile balisendeme, kabili alilandile kuli Petero ati, "Nishani, Tekuti mulole nandi pa nsafye imo? 41 Loleni no kupepa pakwebati mwiiwila mu matunko. Icine umupashi ukofwaya, lelo umubili ulinakile." 42 Alile na kabili umuku wa cibili no kupepa. Alilandile ati, "Mwe Tata, ulu ulukombo ngatalwingampita kano nwemo, ubufwayo bwenu bucitwe." 43 Alibwelele na kabili no kubansanga balisendeme, pantu amenso yabo yalilemene. 44 Eco pa kubasha na kabili, alile mukupepa umuku wa butatu, ukulanda amashiwi yamo yene. 45 Nolu Yesu alishile ku basambi no kulanda kuli bena ati, "Mucili mulisendeme no kutusha? Lolesheni, inshita ilipaleme, no Mwana wa Muntu akofutukilwa mu minwe ya babembu. 46 Imeni, natulekuya. Lolesheni, uukomfutukila ali mupepi." 47 Ulo acili akolanda, Yuda, umo uwa mu bekumi na babili, alishile. Ibumba ilikalamba lyalishile nankwe ukufuma kuli bashimapepo bakalamba na bakalamba ba bantu. Balishile na mapanga ne nkonto. 48 Nomba umuntu wali no kufutukila Yesu ninshi alibapele icishibilo, ukweba ati, Umo uo nkotomona. Mu mwikate." 49 Apopene alishile kuli Yesu no kulanda ati, "Mwapoleni, Rabbi!'' kabili alimutomwene. 50 Yesu alilandile kuli ena ati, " Cibusa, cita ico wishile mukucita." Nolu balishile, balibikile amaboko pali Yesu, no kumwikata. 51 Moneni, umo pa bali na Yesu alifungulwile ukuboko kwakwe, alisomwene ulupanga, no kukwempula ukutwi kwa mubomfi wakwa shimapepo mukalamba, no ku muputulako ukutwi. 52 Nolu Yesu alilandile kuli ena ati, "Bwekeshamo lupanga lobe umo lwikala, pantu abo bonse ababomfya ulupanga bakafwa ku lupanga. 53 Bushe ukotontonkanya ukwebati tekuti nkute Tata, naena kuti antumina amabumba ya bamalaika ukucila ikumi na yabili? 54 Lelo kuti yafikilishiwa shani amalembo, ukwebati ifi fifwile ukucitika?'' 55 Pali kalya kashita Yesu alilandile kwi bumba ati, "Bushe mulishile na mapanga ne nkonto mukunjikata kubati kapondo? Cila bushiku nalikwikala nkosambilisha mwi Tempele, kabili tamwanjikete. 56 Lelo ifi fyonse fyacitika pakwebati amalembo yaba kasesema yafikilishiwe." Nolu abasambi balimushile no kufulumuka. 57 Abo abaikete Yesu balimutwele kuli Kayafa shimapepo mukalamba, uko bakalemba na bakalamba balongene capamo. 58 Lelo Petero alikumukonka akatalamukila ukuya kufika ku lubansa lwakwa shimapepeo mukalamba. Alile mukati no kwikala naba kalinda ku kumona ifikotumbukamo. 59 Nomba bashimapepo bakalamba ne cilye conse balikufwailisha ubunte bwabufi pali Yesu pakwebati bamwipaye. 60 Tabasangilepo nangu cimo, nangu bakambone babufi abengi balishile kuntanshi. Panuma kwalishile babili 61 kabili balilandile ati, "Uyu muntu alilandile ati, "Ndikwete amaka yakutobolola itempele lyakwa Lesa no kulikula mu nshiku shitatu."' 62 Shimapepo mukalamba alimine no kulanda kuli ena ati, "Taukwete ubwasuko? Ngefi finshi ifyo bakokushinina?'' 63 Lelo Yesu ali fye tondolo. Shimapepo mukalamba alilandile kuli ena ati, "Nakukonkomesha muli Lesa wa mweo, twebe nga niwe Kristu, Umwana wakwa Lesa." 64 Yesu alimwaswike ati, "Walanda we mwine. Lelo nkokweba nati, ukufuma nomba ukamona Umwana wa Muntu alikele ku kuboko kwa kulyo ukwa maka, kabili akoisa pa makumbi ya mu mulu." 65 Nolu shimapepo mukalamba alilepwile ifya kufwala fyakwe no kulanda ati, "Alanda ifya miponto! Nindo tukofwaila na bakambone? Lolesheni, nomba mwaumfwa imiponto. 66 Mukotontonkanyapo shani?'' Balyaswike no kulanda ati, "Alilingile ukufwa." 67 Nolu balimusakile amate pa menso no kumuma na makofi yabo, ulo bambi balimutobele amapi 68 no kulanda ati, "Tuseseme, we Kristu. Ninani wa kuma?" 69 Nomba Petero Alikele panse mu lubansa, no mubomfi umukashana alishile kuli ena no kulanda ati, ''Nobe waciba na Yesu wa ku Galili." 70 Lelo alikene pa menso yabo bonse, ukwebati, ''Nshishibile ifyo ukolandapo." 71 Ulo aile kwiminina pa mpongolo, na umbi umukashana umubomfi alimumwene no kulanda kuli abo abali palya ati, "Uyu muntu na ena ali na Yesu wa ku Nasareti." 72 Nakabili alikene no mulapo, "Nebo nshimwishibe uyu muntu!" 73 Panuma ya kashita akanono abo abaiminineko balishile no kulanda kuli Petero ati, ''Icinefye nebo wine uli umo uwa muli bena, pantu imilandile yobe ikokushinina." 74 Nolu alitendeke ukutipa no kulapa ati, ''Nshimwishibile uyu muntu," napopenefye mukolwe alililile. 75 Petero alibukishe amashiwi Yesu alandile ati, "Ulo mukolwe talalila ukonkana imiku itatu." Nolu alile panse kabili alilile apakalamba.