¹ ''Nolu ubufumu bwa mu mulu bukapashanishiwa kuli bana cisungu ikumi abasendele inyali shabo no kuya ku kumanya shibwinga. ² Basano pali bena bali bawelewele na basano bali bamano. ³ Pantu ulo bana cisungu abawele-welele basendele inyali shabo, tabasendelepo na yambi amafuta. ⁴ Lelo bana cisungu ba mano balisendele icikunkubiti ya mafuta pamo ne nyali shabo. ⁵ Nomba ulo shibwinga akokwele ukubwela, bonse balyumfwile utulo no kusendama. ⁶ Lelo pakati ka bushiku kwali ukubilikisha ati, "Moneni, shibwinga! Fumeni no kumukumunya.' ⁷ Nolu balya bonse bana cisungu balibukile no kusanika inyali shabo. ⁸ Abawelewele balilandile ku bamano ati, 'Tupeniko yamo amafuta yenu pantu inyali shesu shikoshibantukila.' ⁹ ''Lelo abamano balyaswike no kulanda ati, 'Apo tayakumane kuli mwebo na fwebo, kabiyeni fye kuli abo abashitisha no kuishitila mwebene.' ¹⁰ Ulo baile mukushita, shibwinga alishile, na abo abaipekenye balile nankwe ku matebeto ya bwinga, ne cibi caliselwe. ¹¹ "Panuma bambi bana cisungu nabo balishile no kulanda ati, 'Mwe shikulu, mwe shikulu, twiswileniko.' ¹² ''Lelo alibaswike no kulanda ati, 'Mucinefye nkomweba nati, Nshimwishibe.' ¹³ Eco kanshi loleni, pantu tamwaishiba ubushiku nangula akashita. ¹⁴ "Pantu caba kubati ni lulya umuntu ali pakuya ku calo cimbi. Alikutile ababomfi bakwe no kubapela ifikwatwa fyakwe mubulinde bwabo. ¹⁵ Kuli umo uwa muli bena amupele amatalanta yasano, kuli umbi amupele yabili, na kuli umbi amupele italanta limo. Cila umo apokelele umwabelele amaka yakwe, na ulya muntu alile pa bulendo bwakwe. ¹⁶ Uwa pokele amatalanta yasano alile pa nshita ilya ine no kutendeka ukuyabomfya no kunonkelapo na yambi yasano. ¹⁷ Mu nshila imo ine, ulya uwapokelele amatalanta yabili alinonkelepo na yambi yabili. ¹⁸ Lelo umubomfi uwa pokelele italanta limo alile, alimbile icilindi mu mushili, no kufisa indalama yakwa shikulu wakwe. ¹⁹ Nomba panuma ya nshita ntali shikulu wa balya babomfi alibwelele no kulondola icuma cakwe kuli bena. ²⁰ Umubomfi uwa pokelele amatalanta yasano alishile no kuletelapo na yambi yasano. Alilandile ati, "Shikulu, mwampele amatalanta yasano. Moneni, ndinonkelepo yasano amatalanta na yambi.' ²¹ "Shikulu wakwe alilandile kuli ena ati, 'Mwabombeni, we mubomfi wabune kabili uwa cishinka! Wali uwa cishinka pa tuntu utunono. Nkakupela amaka pa fintu fingi. Ingila mu nsansa shakwa shikulu obe.' ²² Umubomfi uwapokelele amatalanta yabili alishile no kulanda ati, "Shikulu, mwampele amatalanta yabili. Moneni, ndinonkelepo yabili amatalanta na yambi.' ²³ "Shikulu wakwe alilandile kuli ena ati, 'Mwabombeni, we mubomfi wabune kabili uwa cishinka! Wali uwa cishinka patuntu utunono. Nkakupela amaka pa fintu fingi. Ingila mu nsansa shakwa shikulu obe.' ²⁴ "Nolu umubomfi uwapokelele italanta limo alishile no kulanda ati, 'Shikulu, nalishiba ukwebati muli muntu wakushupa. Musepa apo mushatandile, no kusombola apo mushabyele. ²⁵ Nalitinine, eco nalile kufisa italanta lyenu mu mushili. Moneni, icenu ici pano.' ²⁶ "Lelo shikulu wakwe alyaswike no kumweba ati, we mubomfi wabubi kabili umunang'ani walishibe ukwebati nsepa apo nshatandile no kusombola apo nshabyele. ²⁷ Eco nga walipele indalama yandi kuli ba kusunga, na pakwisa kwandi nga nali pokelele nemwine ishandi na kakulundwapo. ²⁸ Eco kanshi pokeni italanta kuli ena no kulipela ku mubomfi uukwete amatalanta ikumi. ²⁹ Pantu kuli onse uwakwata akalundilwapo na fimbi, kabili akakwata ifingi. Lelo kuli uyo uushakwata nangu kamo, nako akwata kakapokwa. ³⁰ Poseni icinangwa ca mubomfi kunse ku mfimfi, uko ukukaba ukulila no kusumanya ameno.' ³¹ ''Ulo Umwana wa Muntu akesa mubukata bwakwe na bamalaika bonse pamo nankwe, elo akekala pa cipuna ca bukata. ³² Kuli ena kukalongana inko shonse, kabili akapatula abantu ukufuma kuli umo no munankwe, ngefyo kacema apatula impanga ku mbushi. ³³ Akabika impanga kukuboko kwakwe ukwa kulyo, lelo imbushi kukuso kwakwe. ³⁴ Nolu imfumu ikalanda kuli abo abali ku kuboko kwa kulyo ati, 'Iseni, mwebo mwebapalwa na Tata, pyaneni ubufumu bwapekanishiwe kuli mwebo ukufuma kumufula wa calo. ³⁵ Pantu nali ne nsala kabili mwalimpele icakulya; Nali ne cilaka kabili mwalimpele icakunwa; Nali umweni kabili mwali mpokelele; ³⁶ Nali ubwamba kabili mwalimfwikile; Nalilwele kabili mwali nsakamene; Nali mu cifungo kabili mwalimpempwile.' ³⁷ "Nolu abalungami bakasuka no kulanda ati, 'Mwe Shikulu, ni lilali twamimwene ne nsala no kumilisha? Nangu ne cilaka no kumipela icakunwa? ³⁸ Ni lilali twamimwene abeni no kumipokelela? Nangu ubwamba no kumifwika? ³⁹ Ni lilali twa mimwene abalwele nangula mu cifunga no kumipempula?' ⁴⁰ "Nolu Imfumu ikasuka no kulanda kuli bena ati, 'Mucinefye nkomweba nati, ifyo mwacitile kuli umo pa bacepesha pali aba bamunyinane, mwacitile kuli nebo.' ⁴¹ Nolu akalanda kuli abo aba kukuboko kwakwe ukwa kuso ati, 'Fumeni kuli nebo, mweba kutipwa, kabiyeni mu mulilo wa muyayaya uo bapekanishisha kasebanya na bamalaika bakwe, ⁴² pantu nali ne nsala, lelo tamwampele icakulya, Nali ne cilaka, lelo tamwampele icakunwa, ⁴³ Nali umweni, lelo tamwampokelele; nali ubwamba, lelo tamwamfwikile; umulwele kabili mucifungo, lelo tamwansakamene.' ⁴⁴ ''Nolu na bena bakasuka no kulanda ati, 'Mwe Shikulu, ni lilali twamimwene ne nsala, nangula ne cilaka, nangula abeni, nangula ubwamba, nangula abalwele, nangula mucifungo, kabili tatwa mitangete?' ⁴⁵ ''Nolu akabasuka no kulanda ati, 'Mucinefye nkomweba nati, filya mushacitile kuli umo muli aba abacepesha, tamwacitile kuli nebo.' ⁴⁶ Aba bakaposwa mukulunguluka kwa muyayaya, lelo abalungami ku mweo wa muyayaya."