¹ A ba cakacaka qaya vali, i ba sa vamamasu no muni yati va kem mom kua ni vakawalenia na loloma ni Kalou. ² Ni sa kwaya o koya, “Ina gauna vina qu varogoi iko vina tu, ina siga ni vivacolai qu vukei iko.” Tolavia, ko kwe na moa gauna vina. Tolavia, nikua na siga ni cola. ³ I ba tam taunia no i lia na kwa i vatimem mata me tavabe ka i lia, ni ba tam vinatia me rogo ca kaca na na vatilemam cakacaka. ⁴ Ia, ina vi calevu cokho a ba vivunauci kha ni batia i talai ni Kalou abo vosotia, na leqa, na raraci, na medremedrea, ⁵ A ba rubilaki, biu i were ni vivesu, re vakamaca mai, ba va cakacakataki va qwaqwa, moce vakaca ina vi bogi, gwalala na kete ina mata kani, ⁶ ina matamatakwa ni yalo, kila kwa, vivosoti, yalo loloma, ina Yalo Tabu, ina loloma ei ei nubu, ⁷ ina du ni tata, ina qwaqwa ni Kalou; inai yaragi ni yalo vina vatilemam lima matau se lima i mawi. ⁸ Nio vati kemam nai talai ni Kalou iba rokovi se ba, tam dokai, rogo vina no se rogo ca, ni ba lai numi meba va tiva cala mira ia iba du no inai tavi iva lau co kha; ⁹ i wetai me ba tam laikilati, ia iba laikilati vina; ba sa wetai na mate, ia, dania iba colavina no; ba sa wetai na lai borisis, ia i tamrewa ga ni ba mate; ¹⁰ i wetai niba gusa no, ia iba gadre vali; i wetai meba tam rewa kwa, ia iba sa qei rewa kwa vakalevu; ia ni lala na kwa, sa qei toso cake ga na bi ni kwa. ¹¹ Iva iko Korinica, na du taucoko iba sa kwaya no yati va kem, qa tadola tu vatimemam yalo ga va kem. ¹² I ba tam sogotia no vatikemam; ia o kem ga om sogotia no mem yaloga vataki ni kem. ¹³ Kokwe sa ce visau – Qu sa qei kwaya vuara na driadria ba dolavia vakalevu vatimem yalo. ¹⁴ Ba kua ni vailala qara na tam vabavutia. Se iri na vi lala rewa vakayava na yalododonu qana yalotatakelokelo? Iri vi vinati vakayava na CECE qana giglo? ¹⁵ Se iri na vivinati vakayava na Karisito qai Piliati? Se iri na vaitavi vata vakayava o kora na vakautia qai kora na tam vabautia? ¹⁶ Se iri na dure vata rewa vakayava ha were ni lotu ni Kalou qa na matakau? Nio keta na were ni lotu ni Kalou cola, me wetai ga kwaya na Kalou: “Qi na no vali qai vatikem qa qu na laka vali qai kem. Qi na vatilem Kalou, qom na lequ au tamata.” ¹⁷ O koya kwe, “Mo ba kwali vatikem dei mai vuara, mo ba teni lia” e i kwaya na Momo. “Kua ni dere na kwa duka, qi na qei ciqomi kem. ¹⁸ Qi sana qei yaco meni au o Tamam, oba na yaco muni moba luvei au Tagwane qa luvei au Yalewa,” e i kwaya na MomoQwaqwa.