¹ Ni ba sa kilatia ni na vailem were vavuavura me wetai were vakacevaceva isa na vakacacani, sa tau no i lia na were mai vua na Kalou. I lia na were a tam tara ina lima ni tamata, qa na tam rusa lewa, i lomalagi. ² Ina buto ni were vakacevaceva kwe iba sa voraki, ni ba sa gadrevia me ba vaisulutaki ina vailemam were mai lomalagi. ³ Me wetai nio vaikemam ba sa na vaisulu, sa nai tam lai dani ivo vaikemam me ba luvawale. ⁴ Nio vaikemam ba sa voraki ina vailemam nataki no ina buto ni were vakacevaceva, ni ba sa lai tavui, ni ba tam luvatia na valemam sulu kokwe, Io o vaikemam iba vinatia me ba vaisulu, me rewa ni lai solum taki na kwa sa mate me rewa ni cola. ⁵ Io, okaya sa varautaki ni keta ina vi kwa kacega so kwe na Kalou, o koya sa solia vo vaiketa na Yalo Tabu me kea i sevu. ⁶ O koya kokwe iba sa doudou no ga ka, ni ba sa kilatia maga i ba nodoki no i were iba nodoki no ina yago, iba yawa mai vua na Kalou. ⁷ Ni ba sa cola na boto ina vailem vabautia, qa lala ina vailemam dania na kwa. ⁸ I ba sa doudou, qa ba vinatia cake me ba tawase qa na yago qa me ba no vata qa na momo. ⁹ Vaikemam i ba no kakwe, seo vaikemam iba no mai ka ehh, sa va ilemam i naki me ba vinaga vua na Kalou. ¹⁰ Ni ba sa na lai toulavi kece ina vanua ni mata vilewai i Krisito, me re teni qulu na tamata yalia na kedra i sau, me wetai na kwa a tara ma yago, se vina se cakaca. ¹¹ Nio vaikemam iba sa kilatia, na yava na matakucia na Kalou, a nia o vaikemam iba sa vamamasu ti la ka na tamata. Maga isa kilati vaikemam vina sara na Kalou, qi nuitaki nia nio ba sa na kilati vatikem vina muni. ¹² Vailemam ba sa na tam knai vaikemam leqwa ya iva vaikem, maga iba solia yati iva vaikem mo ba lewa o vaikem na kwa iba sakitaki ni vaikemam na ka. Me bau so muni ka na kwa iva kora era dau sacitakinia na kedra rairai na tamata qa re tam sakitakinia na kow i tau no ina medra yalo. ¹³ Maga i ba sa riva sa na wetai ga ina vuku ni Kalou, maga i ba sa tam riva isa na wetai ga ina vukum. ¹⁴ Ina loloma ni Kalou isa lewai keta ka, nio vaikemam ba sa kilatia no nia sa mate oti a lia na tamata ina vuku ni tamata cokoqa, te sa votai coko ga na tamata ina lea mate. ¹⁵ A mate oboya me baloti keta kece na tamata, mera kua ni cola ka uina vukudra okora era sa cola no, ia mera cola ga ina vuku ni koya sa mate qa dure cake leqwa mai. ¹⁶ Magai sa tekivu keve lakayati, i ba sa na tam qei rokovia leqwa i lia na tamata ina vuku ni vi kwa vaka yago. I du ni lia na gauna a ba roko via Karisito ina i tovo ni tola vaka yago, kokwe sa na tam wetai leqwa ka. ¹⁷ Ina vukuni kwa kwe, ma gai lia sa sema iva Karisito isa na buli vou, a sa na vele na vikwa makawa, dania, isa na cedre na cola vou. ¹⁸ Na kwa kece kwe sa tara na Kalou, o koya sa visautaki ini vaiketa mai na lea meca ka me sa vaiketa me teva sa lea i tokani voleke in a vuku i Karisito, qa sa solia vo vo vatiketa nai tavi ni vakaviwekaniyaki nira na vo ni tamata qa ni koya, mere sa leya i lawalawa voleke muni. ¹⁹ So keve ina buto i Karisito sa vakaliavatataki ka qani koya na Kalou na vuravura taucoko, qa tam wilikia na ledra valavalaca, Sa solia iva keta nai tukutuku ni veivakaliavata taki. ²⁰ Ovaikem ba sa digitaki meba mata taki ni Karisito, qa sa vakamasuti vai kemam ni na Kalou ina gusu i vaikemam. ²¹ Ina vukuiketa asa vakayaconia ka na Kalou me te valavala cakacaka ca o koya i lala na lea valavala ca, ina rewa ni yaco ka o keta me te lea tamata yalodu na Kalou.