¹ A sa soli vekhe au khei tlia na sina me adakhi khei tlia na kwa ni vakhavakharautakhi. Qu sa laivece, "Dure mo vakharautakhinia na sue ni Khalou ga na i cabocabo ni soro, gei khora khece kheri lotu no khe. ² Ia khua ni vakharautakhinia na buto ni ba khei taudakhu ni sue ni khalou, ni sa soli devu tu vuara na khoi vimatanitu teni. Kheri na lacia no na khoro tabu me vasagavulukharua na vula. ³ Qi na solia vuaru na legu i vakhadinadina khei rua na gwagwa me ru parofisai me 1260 na siga, ni ru taga no i na sulu taga." ⁴ O Khoru na i vakhadinadina kwe sa nia na rua na vu ni olive ga na rua na i tutu ni cina kwa ru dure no i e mata na turoga ni vurovura kwe. ⁵ Makhei tlia khei digitakhinia me vakhacacani khoru, khei na la mai na mamaudre i dru gusu ga no khani khora sara na ledru meca. O khoya ga khei mata vakhacalhacani khoru, khei na dakhi laivakhamate kwe. ⁶ O khoru na i vakhadinadina kwe khei tau vuaru na gwagwa me ru sogotia na lomolagi me khua ni luvu na uca i na visiga kheri parofisai no khe. Kheri revatia me vukhicia na wai me dra qa ru yariti vuravura i na vimatagwali mate ca me odakhi kheri vinatia. ⁷ Ia ni ru sa vakhadevucia na ledru i tukhutukhu, khei na gai mai vivala gei khoru na manumanu khei la cakhe mai na gwara tamu vakhaiyalayata. Khei na vakhamalumalumutakhini khoru ga gei vakhamateri khoru. ⁸ Khei na dei tu boto dru yago i na bati ni calvu ni khoro levu (ni sa te i balebale ni e yaca kho Sotoma qa Ijipita ) kwa vakhoti khe khi na khauveilatai na ledru Turaga. ⁹ I na tolu vimama na siga kha ra sa la no mai na tamata khei so, na vimatagwali, na dukhu-tatata ga na vimatanitu me ra mai tolavia no dru yago. kheri na tamu vakhatara me buluti dru yago i na i bulubulu. ¹⁰ O khora kheri cola no i vuravura kha ra yalo-marau ni ru sa mate kha ra sa mei vimarautakhi no khe. Khen sa bau visoli i loloma vakhaikhora baletia ni ru dau vakhararawatakhini khora na cola no i vuravura kho khoru na parofita e rua kwe. ¹¹ Ia ni sa devu khei tolu vimama na siga sa na gei curumi khoru na i cegu ni cola mei vua na Khalou, ga ru na dure khe. Khei na yacovi khora na matakhu levu kho khora na tolavi khoru. ¹² Kharu na gei varogocia khei tlia na lio levu mei lomalagi ni kwaya vuaru, "La cakhe mai!" A ru sa la cakhe khi lomalagi i na o, ni ra sa vakhatolavi khoru tu na ledru meca. ¹³ I na auwa gima khei na yaco na uneune levu, ga na bale na i khatini ni wase ni khoro levu. Kheri na mate khei vitu na udolu i na uneune, ia kho khora na vo, khara na docola qa na vakhavinavina i vua Khalou ni lomalagi. ¹⁴ Sa sivi na i kharua ni kwa rarawa. Tolavia! Na i khatolu ni kwa rarawa sa la vagugu no mai. ¹⁵ A sa uvia na lea tavui na i khavitu ni agilosi, qa ra sa tata i na lio levu mai lomalagi ga ra kwaya, "na matanitu i vuravura kwe sa na yaco me lea na leda turaga gaya na lea Kharisito, ga na vakhatulewa no kho khoya me tamu mudu." ¹⁶ Kho khora na tugwagna le ruasagavulukhava, kwa ru gatule no i na ledru i nono vakhoturaga i na mata ni Khalou, a ra sa khoruva ga ra vakharokhorokho i vua na Khalou. ¹⁷ A ra sa kwaya, "Matu sa vakhavinavina vekhemu, Turaga na Khalou Qwagwa kho mu cola no nikhua, kho mu cola mei mata, ni mu sa gulumia na lemu gwagwa levu go mu sa tekhivu viliutakhi." ¹⁸ A ra sa laivakhayaloca na vimatanitu, ia na lemu cudru sa yaco mai. Sa yaco mei na gauna me ra sa lewai na mate, ga mo mu sa saumi khora na lemu i talatala na parofita, gei khora na lea tamata yalosavasava na Khalou, gei khora kheri matakhucia mu yaca, khora na tamata yasewa gei khora na turaga. Sa yaco mei na guana mo mu vakharusari khora kheri vakharusania no na vuravura." ¹⁹ Kha sa dolavi na sue ni lotu ni Khalou mai lomalagi sa laitolavi yati i na sue ni lotu na kato ni vola ni lea viyalayalati. Kha sa tibi na livaliva, na vimatagwali rorogo, na lutu ni khurukhuru, na uneune ga na uca cevata levu. Footnotes 11:17 Na i lavelave matua vakhirikhi vina tatlia khei tau no khe na matavasa gima