¹ A sa vinakata a ona mate ko Saula, ia mai na siga koa, sa kenai vakatekivu ni nodra vakacacani a i soqosoqo tolu mai Jerusalemi; ko ira era sa vakabauta ira sa veisoyaki yani ki mai veiyasana i Jiuta kei Samaria, ko ira ga a i apositolo e segai. ² Ko ira a tamata daulotu era sa buluji Sitiveni, ara sa valata a somate levu ina vukuna. ³ Ia ko Saula sa vakacacani ira vakalevu a i soqosoqo lewe ni lotu, ni sa curu kina veivale taucoko, sa yaratakini ira a togane kei na yalewa, ka biuji ira ki vale ni veivesu. ⁴ Ia ko ira era sa vakabauta era sa veiseyaki era sa lako kina veiyasona ka vunautakina a vosa. ⁵ Ia ko Filipi sa lako sobu ki na koro ko Samaria ka vunautakini Karisito vei ira. ⁶ Ia ko ira a lewe levu, ni ra sa rogoca ka raica a veika mana sa valata ko Filipi, a ra sa lomavata mera vakarogoca a meca sa kaya. ⁷ A yalo velavela sa lako tani mai vei ira a lewe levu sa curumi ira mera sa qoqolou jiko i na domo levu; ko ira talega a lewe levu sa tauri ira a mate sautanini, kei na lokiloki, era sa vakabulai. ⁸ A sa levu kina a marau i na koro koa. ⁹ A sa dua a tamata ko Saimoni a yacana, sa dau vakadraudrau makawa tu mai i na koro koa, sa dau vakarideutakini ira a tamata mai Samaria, ni sa dau kai koya ni sa dua sa uasivi sara. ¹⁰ Ko ira taucoko mai Samaria, ko ira e lalai vei ira e lelevu, ara sa kaya, "ko koya iei a kaukauwa levu ni Kalou. ¹¹ Era sa vakarogoci koya, ni sa dau vakarideutakini ira vakabalavu mai ko koya i na ona draudrau. ¹² Ia ni ra sa vakajinata a i tukutuku vinaka ni matanitu ni Kalou kei na yaco i Jisu Karisito sa vunautakina vei ira ko Filipi, era sa qai papitaisotaki, ko ira a tagane kei ira a yalewa. ¹³ Ia ko Saimoni sa yaco me vakajinata, ia ni sa papitaisotaki oji, erau sa daujiko vata kei Filipi. A sa rideu vakalevu ko koya ni raica ai vakatakilakila kei na cakacaka mana levu sa vala jiko. ¹⁴ Ia ni ra sa rogoca a i apositolo mai Jerusalemi ni ra sa vakajinata a vosa ni Kalou ko ira mai Samaria, era sa talai Pita kei Joni vei ira. ¹⁵ Ia ni rau sa yaco mai, erau sa masulakini ira, me ra rawata a Yalo Tabu. ¹⁶ Me yacova a gauna koa, a Yalo Tabu, e se bera mada ni se yaco vua e dua vei ira; era se papitaisotaki walega i na yaca ni Turaga ko Jisu. ¹⁷ A sa tabaki ira ko Pita kei Joni ena ligadrau, a sa yaco kina kivei ira a Yalo Tabu. ¹⁸ Ia ni sa raica ko Saimoni ni sa soli a Yalo Tabu i na veitobaki ni ligadrau a i apositolo, sa vinakata me solia vei rau na i lavo. ¹⁹ A sa kaya, solia mai vei au a kaukauwa iei, me yaco kina a Yalo Tabu vei ira yadua au sa tobaki ira e na ligaqu. ²⁰ A sa kaya vua ko Pita, mo drau rusa vata kei na omu silini i na vuku ni ko sa nanuma sa voli rawa a i solisoli ni Kalou e na silini. ²¹ Sa segabau a omu jikina, se na omu i votavota i na meca iei, ni sa tawa dodonu a yolomu i na mata ni Kalou. ²² O koya iei, mo veivutunitakina a omu i valavala ca iei, ka masu vua Kalou, de na rawa beka vua me vosoji, iko i na nanuma ca ni yalomu. ²³ Niu sa raica ni ko sa tu ga i na ka gaga sara, ka vesuki i na i vesu ni valavala ca. ²⁴ A sa vosa ka Saimoni ka kaya, "Mo drau masulakini au vua a Turaga, me kakua ni yaco vei au e dua a meca drau sa koya. ²⁵ Ia ni rau sa tukuna ka vinautakina oji a vosa ni Kalou ko Pita kei Joni, erau sa lesu tale ki Jerusalemi; a rau sa vunautakina a i tukutuku vinaka i na levu a veikoro vaka Samaria. ²⁶ A sa vosa vei Filipi e dua a agilose ni Turaga, ka kaya, "Mo tucake ko lako vaka kina ceva, i na wakolo sa lako mai Jerusalemi ki Kesa, koa i veikau. ²⁷ A sa tucake ka lako yani: ka raica e dua a kai Iciopea, a matanivanua, a tamata levu i Kodase, a odra ranaji a kai Iciopea, a sa ona dauniyau ko koya, sa lako ki Jerusalemi me soro. ²⁸ A sa lesu tale jiko, ka jiko ina ona qiqi-ni-turaga, ka wilika jiko ai vola i Aisea a parofita. ²⁹ Sa qai kaya a Yalo Tabu vei Filipi, mo lako yani ka toro voleka kina qiqi-ni-turaga. ³⁰ A sa kada yani ko Filipi ka rogici koya ni wilika jiko ai vola i Aisea na parofita; a sa kaya vua, ko sa kila jiko beka a meca ko sa wilika jiko se segai? ³¹ A sa kaya ko koya, "Meu kila rawa vakaivei kevaka e sega ni dua me tuberi au? A sa masuji Filipi me cabe cake me rau jiko kaya. ³² Ka iei a jiki ni vola Tabu sa wiliki ko koya a kai Iciopea, "Sa tuberi ko koya mo vaka a sipi me vakamatei; ka vaka a lami sa galu ina matai koya sa kojiva; a sa vakakina ko koya ni sa galu ga. ³³ Ni sa malumalumu jiko ko koya, sa sega ni lewai vakadodonu. Ko cei e rawa me vakamacalatakina a ona i tubutubu? Ni sa kautani e vuravura a ona bula. ³⁴ Sa qai tarogi Filipi a matanivanua, ka koya, au tarogi iko mada, sa vosataki cei a parofita i na vosa iei: Ko koya ga, se duatani tale? ³⁵ Sa qai vosa ko Filipi ka sa vakatekivu ina jiki ni vola tabu koa, a sa vunautaki Jisu vua. ³⁶ Ia ni rau sa lako jiko i wakolo, a rau sa yaco kina dua a wai, sa kaya a matanivanua, raica sa tu a wai; a cava sa tarovi au meu kua ni papitaiso? ³⁷ A sa kaya ko Filipi, "Kevaka ko sa vakajinata mai na vuni yalomu taucoko, sa tara ga mo papitaiso. A sa vosa ko koya a kai Iciopea ka kaya, au sa vakajinata ni sa luve ni Kalou ko Jisu Karisito. ³⁸ Sa qai kaya koya a kai Iciopea me tu vokadua mada a qiqi-ni-turaga. Arau sa toko sobu ruarua kina wai ko Filipi kei na matanivanua, a sa papitaisotaki koya ko Filipi. ³⁹ Ia ni rau sa cabe cake mai na wai, a sa kauji Filipi tani a Yalo ni Turaga, a sa tawa raici koya tale a matanivanua, a sa lako i na ona wakolo ko koya ka reki jiko. ⁴⁰ A sa laurai tale ko Filipi mai Asoko i a sa lakova a veikoro taucoko ka vunautakina ai tukutuku vinaka ka yaco sara ki bisaria.