¹ Sa qai kaya a bete levu, "Sa jina a veika iei, se segai?" ² Sa qai kaya ko Sitiveni, "Oi kemuni a taciqu kei na tamaqu, dou vakarorogo mada vei au: A Kalou vakaiukuuku sa rairai mada vua a weta qase ko Eparaama ni se jiko mai Mesopotemia, sa qai muri mai Korana; ³ A sa kaya vua, "Mo biuta a omu vanua kei ira a wekamu, ka lako kina vanua au na vakatakila vei iko." ⁴ Sa qai biuta a vanua va Kalajia, ka laki jiko ki Arana; me yacova a mate i tamana, ni oji kea, a Kalou sa qai kauji koya tani mai kea ka vakajikori koya ina vanua iei, dou sa qai jiko kina. ⁵ A sega ni solia e dua moda ga a jiki ni vanua me taukena se me butuka mada ga a yavana: a sa yaloyalo ga ni na solia vua, kei ira a ona kawa era na muri koya mai, ka sega e dua a luvena. ⁶ A sa vosa vua a Kalou vaka iei, a omu kawa era na jiko vulagi e na vanua sa tawa odra, kara na vakabobulatakini ira, ka vakararawatakini ira ka va a drau a yabaki. ⁷ A sa kaya a Kalou, na matanitu era sa bobula kina au na lewa, ka oji era na qai lako tani mai, ka qaravi au i na vanua iei. ⁸ Sa qai solia a Kalou vei Eparama a veiyalayalaji ni veicili; ko Eparema a sa yacoo me tamai Aisake, ka sa cilivi koya e na i ka walu ni siga; ko Aisake a tamai Jekope, kei Jekope a tamadra a pateriaki e lewe tini-karua. ⁹ Baleji ira a qase nira sa vuvutakini Josefa, era sa volitakini koya ki Ijipita; ia a Kalou sa jiko vata kei koya. ¹⁰ Ka vakabulai koya mai na ona rarawa kece sara. A so solia vei koya me vinaka ka vuku ina matai Fero, a tui Ijipita, o koya e a lesi koya me kovana me lewai Ijipita kei ira taucoko a ona lewe ni vale. ¹¹ Sa qai yaco a dausiga levu kei na rarana levu ki na vanua taucoko ko Ijipita kei Kenani, era sa sega ni boka a kakana ko ira weta qase. ¹² Ia ni sa rogoca ko Jekope ni sa tu mai Ijipta a kakana, sa qai talai ira vakadua kina a weta qase. ¹³ E mai karua ni lakolako, sa vakatakilai koya ko Josefa vei ira a tuakana, ka yaco talega me vakatakilai a matavuvale i Josefa vei Fero. ¹⁴ A sa vakatalai ira lesu yani a tacina ko Josefa mera laki kaya vei Jekope a tamana me lako mai ki Ijipita, o koya vata kei ira a ona mataqali era lewe vitusagavulu ka lima. ¹⁵ A sa laico sobu yani ki Ijipita ko Jekope; a sa mate kea kei ira talega a weta qase. ¹⁶ A ra sa kau ki Sekemi, era sa buluji e na i bulubulu ka volia ko Eparaama i na jiki ni siliva e so mai vei ira a luvo i Emoni mai Sekemi. ¹⁷ Ia ni sa voleka mai a gauna me vakayacori kina a vosa ni yalayala ka bubului kina a Kalou vei Eparaama, era sa qai tubu a tamata me ra lewe levu mai Ijipita. ¹⁸ Me yavoca a gauna sa tubu tale mai kina e dua tale a tui mai Ijipita ka sega ni kilai Josefa. ¹⁹ A sa lawakitakini ira a wekada ko koya, iei, ka sa, vakasauraratakini ira a weta qase, mera biuji ira a odra gone ki tuba, mera kakua ni bula. ²⁰ Ena gauna vata koa, e a sucu kina ko Mosese, a sa mata vinaka ina mata ni Kalou, ka susugi vula tolu ina vale i tamana. ²¹ Ia ni sa biu ki tuba ko koya, sa tauri koya a luvei Fero yalewa me susugi koya me luvena tagane. ²² A sa vakavulici ko Mosese i na odra vuku taucoko a kai Ijipita, a sa kaukauwa i na ona vosa kei na cakacaka. ²³ Ia ni sa vasagavulu a ona yabaki, sa qai tubu e lomana me laki raici ira a wekana a luve i Isireli. ²⁴ A sa raica e dua vei ira a Isireli ni sa vakacacani, a sa tovakini koya ko Mosese, ka motuka mate a kai Ijipita. ²⁵ A sa nanuma ko koya, ni ko ira a wekana era sa kila ni ligana ena vakabulai ira kina a Kalou, ia era a tawa kila rawa. ²⁶ Ena mataka sa rairai ko koyua vei rau a lewe rua a Isireli e rau sa veivala jiko, a sa vinakato me vakaveivinakajitakini rau tale ka kaya, o kemudrau a turaga, drau sa veiwekani ga, a cava kemudrau sa veirala kina? ²⁷ Ia ko koua sa cala vua wekana sa biligi koya toni kakaya, "Ko cei sa lesi iko mo lewa vei keimami? ²⁸ Ko sa via vakamatei au beka me vaka ko a vakamatea a kai Ijipita ni yavi? ²⁹ Ia ni sa rogoca vosa koa, sa tuba yani ka lavi jiko i na vanua ko Mitioni, a sa mani sucu kina e le rua a luvena tagane. ³⁰ Ia ni sa ogi e vasagavulu a yabaki, sa rairai vei koya mai veikau e dua a agilose, e na ulunivanua ko Sainiai, ena yanuyanu ni bula ina dua a kau. ³¹ Ia ni sa raica ko Mosese, sa rideutakina a meca sa raica, ia ni sa torova me vakaraica sa yaco mai vei koya a vosa ni Turaga. ³² Ko i au a odr a Kalou a omu qase, a Kalou i Eparaama, kei a Kalou i Aisake, kei na Kalou i Jekope, a sa sautanini ko Mosese, ka sa rere ni vakaraica. ³³ Sa qai vosa a Turaga ka kaya vua, mo luvata tani o omu i vava mai na yavamu ni sa qele tabu a jikina ko sa tu kina. ³⁴ Au sa raica jina sara a odra rarawa a qou tamata era jiko mai Ijipita, ia kau a rogoca a odra vutugu; ia kau sa lako sobu mai meu vakabulai ira; ia iei, mo ia, au sa talai iko ki Ijipita. ³⁵ Ko Mosese iei ko koya era a cata, ka kaya, ko cei sa lesi iko mo Turga ka lewa? - ko koya ga iei ka tala a Kalou me Turaga kai vakabula i na ligana a agilose sa rairai mai vua ina kau. ³⁶ Ia ko Mosese sa kauji ira tani mai Ijipita, ni sa valata oji e so a meca e veivakidacalataki kei na i vakatakilakila i na vanua ko Ijipita, kei na waitui damudamu, kei na veikau, ka yabaki vasagavulu. ³⁷ Ko Mosese iei, sai koya ga ka kaya vei ira Isireli, "A Kalou e na vakatubura ki vei kemudou mai vei ira a wekamudou e dua a parofita me vakatakini au. ³⁸ Ko koya iei, sa jiko kei ira a i soqosoqo i na veikau, kei na agilose sa vosa vua mai na ulunivanua ko Saineai. SAi koua iei sa jiko vata kei ira a weta qase; sa rawata a vosa ni bula me solia vei keta. ³⁹ SAi koya iei era sa vuta ni talairawarawa kina ko ira a weta qase, ara sa biligi koya tani mai vei ira; i na yalodra mai loma era sa vuki lesu tale ki Ijipita. ⁴⁰ Ena siga koa era a kaya vei Eroni, "Mo valata vei keimami e dua a Kalou me . KKo Mosese ka kauji keimami tani mai i na vanua ko Ijipita; keimami sa tawa kila a vanua sa lako kina. ⁴¹ A ra sa valata e dua a luve ni pulumakau ina gauna koa, a ra sa vakacabora a i soro kina matakau, a ra sa reki takina a cakacaka ni ligadra. ⁴² Ia a Kalou sa vuki tani ka biuji ira tu me ra qarava a veikalokalo ni lomalagi: me vaka a meca sa volai ina odra i vola a parofita. Dou a vakacabora vei au a manumanu sa vakamatei kei nai madrali in a loma ni veikau me vasagavulu a yabaki, se segai oi kemudou a mataqali i Isireli? ⁴³ Dou sa colata a vale i Moleke , kei na kalokalo ni omudou Kalou ko Remifami, a matakau dou a valata mo dou soro kina. Ia kau na kauji kemudou yani me sivi ko Papiloni. ⁴⁴ Ko ira a weta qase se tu ga vei ira ina veikau a vale ni Kalou sa tu kina i vunau me vaka sa vosa kina ko koya, ni sa kaya vei Mosese, me valata me vaka a kenai vakatakarakara sa raica. ⁴⁵ E muri, ko ira a weta qase vata kei Kosua era sa taura a vale vakacevaceva ka kauta mai vata mai kei ira kina odra vanua a veimatanitu, ko ira sa wacarai ira tani a Kalou i matadra a weta qase, ka yacova o gauna i Tevita. ⁴⁶ O koya sa kuni loloma i na mata ni Kalou, ka sa kerea me ona i tavi e dua a vale me wei koya a Kalou i Jekope. ⁴⁷ Ia ko Solomoni ga sa tara a vale ni Kalou i Jekope. ⁴⁸ Ia a Kalou sa cecere sara sa sega ni jiko i na vale sa volai na liga, me vako a vosa ni parofita, ⁴⁹ A qou i jikojiko vakaturaga ko lomalagi kei vuravura, ai tutu ga ni yavaqu. A mataqali vale vakaivei dou na tara me qou i sa taroga ko Jiova. Se jikina cava me qou i vakavakacegu? ⁵⁰ Sa sega beka ni a valata a meca taucoko a ligaqu? ⁵¹ Oi kemudou a tamata yalo kaukauwa, ka tawa cili a yalomudou, kei na daligamudou, dou sa dau vorata jikoga a Yalo Tabu; oi kemudou sa dau valata me vaka era sa dau valata a omudou qase. ⁵² Ko cei vei ira a parofita era sa sega ni vakacacana ko ira a omudou qase? Era sa vakamatei ira era sa kaya i mada ni sa lako mai ko koya a yalododonu; ko koya a dou a solia yani ka vakamatea. ⁵³ Oi kemudou a tamata sa soli vei kemudou a i vunau ni sa kaya e so a agilose, ia dou sa sega sega ni vakabauta. ⁵⁴ Ia nira sa rogoca a veika iei, sa laucoka a yalodra, a ra sa vakasequruqurubaji vei Sitiveni. ⁵⁵ Ia, ko koya ni sa sinai ina Yalo Tabu, sa rai matua ki lomalagi ka raica ai ukuuku ni Kalou, kei Jisu ni sa tucake tu i na liga i mata ni Kalou. ⁵⁶ A sa kaya ko Sitiveni, Raica, au sa raica a lomalagi ni sa tadola kei na luve ni tamata ni sa tucake tu ena liga i matau ni Kalou. ⁵⁷ Era sa tabona kina a daligadra, ka qoqolou i na domu levu, ara sa kada vakaukauwa vua ni ra sa lomavata. ⁵⁸ A ra sa dretakini koua ki na i bili ni koro, ka virilakini koya ena vatu; ia ko ira era sa beitakini koya, era sa kotora sobu a odra i sulu ki na yavana e dua a cauravou, a yacana ko Saula. ⁵⁹ Ia ni ra sa viritakini Sitiveni jiko kina ina vatu, sa masu vua Turaga ko koya ka kaya kemunu Turaga Jisu, Taura a yaloqu. ⁶⁰ A sa tekiduru sobu ko koya ka kaci ina domo levu; kemunu a Turaga, kakua ni burisitakini ira i na i valavala ca iei. Ia ni sa vosa oji vaka iei, sa qai moce.