¹ A sa dua a tamata ko Ananaiasa a yacana kei Safaira a wajina, sa volitakina e dua a vanua. ² A sa vunia e so ai voli ni vanua, ka sa kila talega ko wajina, ka sa kauta mai a kena vo ka mai taura ki na yavadra ai apositolo. ³ A sa kaya vei Ananaiasa ko Pita, a cava ni sa vakasinaita a yalomu ko Setani mo dai kina vua a Yalo Tabu: mo vunia e so ai voli ni vanua. ⁴ Ni se bera ni volitaki, e se sega li ni omuga? Ia ni ko sa volitakina oji, ko sa sega li ni veitalia ga kina? E vakaivei ni ko sa vakananuma kina o meca iei ina lomamu? Ko sa sega ni dai kivei ira a tamata, ko sa dai ga vua Kalou. ⁵ Ia ni sa rogoca a vosa iei ko Ananaisa, sa bale sobu ko mate, ara sa rere vakalevu kina ko ora taucoko era rogoca a meca iei. ⁶ A ratou sa lako mai a cauravou ka solegi koya, ka colaji koya ki tuba vea buluta. ⁷ Ni oji beka e tolu na auwa sa qai curu mai a wajina ka tawa kila a meca sa yaco oji. ⁸ A sa kaya vua ko Pita, kaya mai vei au, drau sa volitakina a vanua e na i lavo vaka iei se segai? A sa kaya ko koya, I o e vaka ga kina. ⁹ A sa kaya vua ko Pita, e vakaivei ni drau sa lomavata mo drau vakatovolei a Yalo ni Turaga? Raica sa tu e katuba a yavadratou e ratou a buluta a wajimu, e ratou na colagi iko talega ki tuba. ¹⁰ Sa qai lutu sobu lei yavana ka mate. Ni ratou curu mai a cauravou, e ratou sa raici ko koya ni sa mate, a ratou sa colata yani ka buluta e yasai wajina. ¹¹ A sa tara na i soqosoqo rere levu kei ira taucoko era rogoca a veika iei. ¹² A sa vala ai vakataleilakila e levu kei na meca e veivakurabuitaki i na ligadra ai apositolo vei ira a tamata; ara sa jiko lomavata kecega ina varada wei Solomoni. ¹³ Sa segabau e doudou me to vata kei ira, ara sa vakarokorokotaki ira ko ira a tamata. ¹⁴ A ra sa lewe levu era sa vakabauta, era lewe levu a tagane kei na yalewa, era sa vakaikuritaki vakalevu vua Turaga. ¹⁵ A ra sa kauji ira mai era sa baca kina veiwakolo ka vakatori ira i na i mocemoce lelevu kei na i mocemoce lalai me vakaruruga e so vei ira ai yaloyalo i Pita ni sa lako yani. ¹⁶ Era lewe levu era sa lako mai no veikoro sa vakavolivoliji Jerusalemi, ka kauta mai a tamata eso era sa tauvimate, kei ira sa vakararawatakini ira a yalo velavela eso; ara sa vakabulai vaka a dua ga. ¹⁷ Sa qai tucake a bete levu kei ira era sa dau jiko vata kaya (ko ira a i tokoni i Setoki) ara sa sinai e na lomaoa. ¹⁸ A ra sa tauri ira a i apositolo ka biuji ira kina vale ni veivesu. ¹⁹ Ia ni sa qai bogi mai sa dua a agilosi ni Turaga sa dolava a katuba ni vale ni veivesu ka kaujr rau yani, ka kaya, ²⁰ "Dou lako ka laki tu i na vale ni soro, ka kaya vei ira a tamata a vosa taucoko ni bula iei." ²¹ Ni ratou sa rogoca, e ratou sa curu kina vale ni soro ni kida a mataka ka vakatavuvuli. A sa lako mai a bete levu kei ira era sa dau jiko vata kaya, ka vakasoqoni ira vata a mata vei lewai, kei ira taucoko a odra qase a luvei Isireli. Ara sa tala eso kina vale ni veivesu me kauji iratou mai. ²² Ia ko iratou a ovisa eratou sa talai, e ratou sa sega ni raici iratou e na vale ni veivesu, a ratou sa lesu tale ka kaya. ²³ Keitou sa raica ni sa sogo vakaukauwa tau a vale ni veivesu, ko ira a i vakotawa e ra tucake tu ga e mata ni katuba e tuba, ia ni keitou sa dolava, sa tawadua keitou raica e loma. ²⁴ Ia ni ra sa rogoca a meca iei a turaga ni vale ni soro kei ira talega a bete turaga, era sa kidroa se na tubu beka me vakaivei a meca iei. ²⁵ Sa qai lako mai e dua ka kaya vei ira, a tamata kemudou biuta ki vale ni veivesu, e ratou sa jiko e loma ni vale ni soro ka vakatavulica ira jiko a tamata. ²⁶ Sa qai lako a turaga kei iratou a ovisa, me ratou laki kauji iratou lesu mai, ni ratou sa rerevakini ira a tamata ole ra na qai viritakini iratou i na vatu. ²⁷ Ia ni ratou sa kauji iratou lesu mai erau sa tucake e matadra a mata veilewai. Sa vakatarogi i ratou a bete levu, ²⁸ "Ka kaya, keitou a vakaroji kemudou matua mo dou kakua ni vakatavuvuli e na yaca iei, dou sa vakasinaiji Jerusalemi i na omudou i vakavuvuli, dou sa valata talega me keitou tarogi i na dra ni tamata iei." ²⁹ Sa qai vosa ko Pita kei iratou ai apositolo, ka kaya, keitou na talairawarawa ga vua Kalou, ka kakua vua tamata. ³⁰ A odra Kalou a weimami qase, o koya ka vakaturi Jisu cake tale mai, ko koya dou a vakamatea ka vakarubeca i na kau. ³¹ Na Kalou e a vakalevulevui koya ki na ligana i matau me Turaga ka vakabula, me solia kina a veivutuni kivei ira a Isireli, kei na vakabokoci ni valavalaca. ³² Keitou a vakajinajina ni veika iei ka vakatalega kina a Yalo Tabu o koya so solia a Kalou ki vei era talairawarawa vua. ³³ Ia ni ra sa rogoca, era sa borisi vakalevu, ara sa vinakata mera vakamatei iratou. ³⁴ Ia sa dua a Farisi ko Kamelieli a yacana, a muri vunau, a sa rogorogo vinaka vei ira a tamata kecega, a sa tucake i na kedra maliwa a mata veilewai ka kaya, me kau vakalailai ga ki tuba ko iratou a apositolo. ³⁵ Sa qai kaya vei ira, oi kemudou a tamata a Isireli, dou lewai kemudou vinaka i na meca dou sa nanuma mo dou valata vei iratou a tamata iei. ³⁶ Ena dua a gauna sa oji e a tubu mai kina ko cuta, sa dou kai koya me ka levu, ko ra muri koya a tamata e so ka rauta ni ra lewe va beka a drau; e a qai vakamatei ko koya. Ko ira kecega era talairawarawa vua, era sa vakasesei, ka oji yani. ³⁷ Ni oji yani a tamata iei, e a tubu cake mai ko Jutasa a kai Kalili i na gauna sa volai kina a tamata, ara sa lewe levu a tamata sa kauji ira vakatani ko koya mera muri koya. Sa rusa talega ko koya iei, ko ira talega era sa talairawarawa vei koya era sa vakasesei. ³⁸ Ia iei au sa kaya vei kemudou dou lako tani ga mai vei iratou iei, ka dou laivi iratou ga; ia kevaka e ka mai tamata a i naki iei se na cakacaka iei, e na vakarusai ga. ³⁹ Ia kevaka e ko mai vua Kalou, dou na tawa vakaruse rawa; dou na baki kemudou ni dou na veivala jikoga keina Kalou; a ra sa qai yalovata kina. ⁴⁰ Ara sa kacivi iratou mai a i apositolo ka vakana kuitaki iratou, a ra sa vosa va iratou me ratou ka kua tale vasa i na yacai i Jisu; a ra sa qai sereki i ratou me ratou lako yani. ⁴¹ Ia ni ratou sa lako tani e matadra a mata veilenou, e ratou sa reki vakalevu ni ratou sa yaga me ratou vakacacani i na vuku ni yacana. ⁴² Ia ni veisiga taucoko ina vale ni soro, kei na vale veivale taucoko era sa tawa cegu kina ina rakatavuvuli ka runautakini Jisu ni sai koya a Karisito.