¹ Ea maika miki mi, uku ni ni opara anana nu iaki ama liaka'apea a'a pakui, oroa oinimiai. Ima pea nia kavane miape liamoiai ni Mai imeiai pokoia vake au mere. ² Ou eiai, nia rurupu paioka'a pani, pi'i pa laeai ni pakui ipia ipa epe ikai omoro marea mo kapea iki'i like poara, uku oro a'ana kepu oia lae lia. Miki miki na lae naki ai oro omo kavane eni'i mie. ³ Ai nia umu pei ekua pani ni eue kevoua mekai pa ipa limoki ai eve miki mekai a lia voa, ⁴ oura'a, ni umu u vaukaiai liaka'a. Ai ni Mai u vaukiai nia ka'a oparai, u kavane nikava ka'a. ⁵ Nia niki lia pani oko, pia epe ikia like oparai pa li ai, uku oro lae miki omoro mareai noki lima oiai mo kapea epoe, uku oro a'a na eiai lae lia. Miki-miki na nikia, oro omo kavane eni'i mie. ⁶ Ai ni, nia noki liane, ikiri o'o laravai, kikinau ne'ea, ai noki oka ni mai koa u vaukiai ire. Oura'a ni vaukia inamu nima keia Mai u kavane lia ka'a. ⁷ Nia noki liane, miki pe omoro oraea vairu-vairu pa karikia rokoai, ane'e a'a na like opara, oroa lae korake oro viri emike uku omo omoro no aira eiai. ⁸ Ou eiai omo opara pa miai uku ni Mai u ipa nia lae lia pei, nia oki ape'e. ⁹ Oueiai, noki ei oparai li: Ene Maie, ni imeia, ni noe avioi ma iki ia'a i. ¹⁰ Ni eiei ane moki. Ni lae oko limoki kae, imeiai keia opara. ¹¹ Mia aku eai ene lare oka monou-monou nu pu. ¹² Eneia lia lipi u'u ami, a'a na aka'a lipi eneia u'u emia opara. ¹³ Ipiai pa aiami ai, ai ururu aka lipi a'a u mere. ¹⁴ Uku nia a'a nu namea u'u emi ane, ni imeia nu Mai u nioko u'u nimiaka'a ¹⁵ Aikava nia omu namea u'u emi ape ma li'i, Ni Mai ama u'u nimiakae ni namea. ¹⁶ Nia nemu ei ane, viki paku pa evere ka'a rodoai, ipa epe ikia like opara, uku oro omo paku evere kaka a'a na ipa liai oro nemu ei makeia miki-miki na lae nikiai, oro omo kavane ou mie. ¹⁷ Aikava ni, nia nemu ei ane, uku veira lae'e mo paku upu omi, ¹⁸ oura'a u ama iki'i liaka'apea a'au ni nemu ei makeia, ai ni Mai au monou, koana u vaukia, mo ni Mai vaukia inamu i u kavane liaka'a. ¹⁹ Mari kae'e aira pa mia kae ai, oura'a ura avaia mo iri aroa oavai, mo avapu a'ana vepea ikiria o avapu lia. ²⁰ Ai, mia kae ni eiai mari imeiai, oura'a ura avaia o ira aroa ama oava ka'apea, mo' avapu a'ana ma vepea ikiri aka'a pea avapu liai. ²¹ Uku ni mari a kei aka'a iki, oura'a oko ni umu a keiaka'a. ²² Inamu u kape nu lamepa. Ou eiai, ni inamua ima liane, ni kape u uriria u pareai keia ka'a. ²³ Aikava ni inamu a lipi liane, ni kape uriria u murui laruai. Ou eiai, parea ni au u miki miki muru 'ana, ovara eka'a vake a, ou muru u! ²⁴ A'a mo amua leako no aivara ama liei aka'a pea, u oura'a mo lari okava ka'a ai mo lae liaka'a o, u moa u avioia miki a rokoa ka'a ai mo 'au lari a roko aka'a. Ni Ia'a Eloi mo mari nu aivara monou iki'i ama liei aka'a pea. ²⁵ Oueiai, naia nikia, lae ovara miki pa kora oiai ni rokoa, ni oima nava kae o ni oima viru kae- o ni kape eiai, oima rukia kae. Rokoa ama ovara li'i, navai mere, mo kape ama ovara li'i kapua mere? ²⁶ Inamu nako eio, kavaeai. Oro ama aeka pea o ama mike pea o mike, aike ma kaeke pea aura mareai, ai ni kaia nu Mere a eru emia. Ni ama ia'a li'i oro au mere? ²⁷ Aikava ekei a'a ni ama paiave, epu-epu i, rokoa va'aui, eve epu nu oparai? ²⁸ Oia, ni epu-epu nu miki kapua eiai, lae koravo, avari vaupa, eka'a oparai ma la'ake oro. Oro iaki ama like pea, mo oro kapua ama kirike pea. ²⁹ Ai na lae ni nikiai, Solomona u, U ima uriria laruai, a ruoki pea ei pei mo oparai. ³⁰ Aikava Ia'a Eloi kapua ruoki ma keiane kae no pono, ekeia u eai la'ave aka namae kae ane iaui, Uni ama runikiai liapea ovarai, ni pirimarokoa mau'u e? ³¹ Ou eiai epu-epu miki liaia, eira'a pa kuruai, "Ene oima navakae?" 'O, 'Ene oima virua kae? 'O, "Ene oi kapua ma ruku aia?" ³² Ou ane'e a'a na veve ea aruku uriria, ai ni Kaia nu Mere u ipa ni lae iia uriria miki ³³ Ai kava veve'e pina U eiei, mo U opara anana, oura'a u ei pei uriria mia niku aka'a. ³⁴ Ou eiai pa epu-epu miki liai namae eiai, namae a epu-epu limoki u eiai. Lare monou-monou uoko u ipiane, u eiai.