¹ Oura'a Imeia nu eiei u ipia pakoro maura ten oura omu lamepa miaka ae no'ore eve piriai limakeie vake oima enavai lie opara. ² Eve mekai mo oro laepe lie ai eve mekai mo oro lae evera lie. ³ Laepe pakoro oroa omo lamepa mi liane, oro oera kaune'e vake a mi pea. ⁴ Aikava lae evera pakoro oro oera kavapu kaune'e ane mimiki e omo lamepa ane. ⁵ Oai, vakea pani va'au e'e voana, oro inamu o'o ipa liaka o'o liri'ie. ⁶ Aikava kipere iki'i, laea araro moa inave. Oio, Ou vake! Erea ena auokuma! ⁷ Oura'a ou pakoro oro lara-ave omo lamepa ovara e'e ai. ⁸ Laepe oroa lae evera ane pakoro ou ekia, "Nomo oera varemo aukaku uku ene lamepa oro liri makeia. ⁹ Aikava lae evera pakoro oro vairu makei ai ou ekia, 'Ei ama ipia liaka'a pea noro mo enei ane eiai, ai mara ena inaea kaema keia iki au varemo mima noro eiai.' ¹⁰ Oro miai enave keiane, Vake ane'e, ai maika pokoie iki oro uane ikiriai enave aminava purai'i, ai kikinau ou ne'ea. ¹¹ Lekomere, aveie pakoro kaupu oro aneaka ou kurua, "Amue, amue, enei oko auai! ¹² Aikava ua vairuma keiai ou ekia, " Miki-miki naia kurua, Na noro ipa pea. ¹³ Inamu kaeriviai ou eiai, uku ni ipa pea lare mo pani ane. ¹⁴ U ipia a'a mo aki miarokoe. Ua u aivara iki erau aka u mari ou leuki ekua. ¹⁵ A'a moau, u aru eve mekai monou okua, moau, leako okua, ai ika vake au aru monou. Ua miekue opara u omo venea nu ipia ipiai. ¹⁶ Aru eve mekai monou mie a'a u enave aka iaki okave voana ai eve mekai mo karikie. ¹⁷ Ou opara ipia lie, aru leako mie a'a uoko leako mo karikie. ¹⁸ Aikava, aivara a'a aru monou okue a'a u enave aka kuri vaeaka kae'e, ai vauokave u amua nu moni. ¹⁹ Oai, pani va'au miki lekomere, ou aivara iki nu amua u vairu aneaka oroa kariki moni ou veve'e mia. ²⁰ Aivara a'a, aru eve mekai monou mie a'a u ane'e, ai miaka ane'e eve mekai mo'oko. Ua ou okia, "Amua e, ni aru eve mekai, monou ikue, ai oio, na eve mekai mo'oko eu." ²¹ U amua na ou okia, 'Ima miki lia, ima mo avioia miki aivara a'a e! Ni avioia miki lie pei kaupui. Na aniimia inuaka'a pei aira miki maika. Lakea ikiri, ni amua nu kopai'i.' ²² Airara a'a aru leako mie a'a u aneaka ou kurua, 'Amue, ni aru leako ikue, ai oio, na aru leako mo karikie.' ²³ U amua na ou okia, ima miki lia, ima mo avioia miki aivara a'a e! Ni avioia miki lie pei kaupui. Na ainimia inu aka'a pei aira miki maika. Lakea ikiri, ni amua nu kopai'i.' ²⁴ Ai aivara a'a aru monou mie vake uoko aneaka ou okia, 'Amua e, na ipa miki ni a'a nainei. Ni mia ka'a nia aeape lie vake oko mo ni mike kaeke nia veve upuru kavape lie pei oko. ²⁵ Na kore lie, ou eiai na anana monoua enave 'aka ai vauokave ni aru, kae'e. Inamu oio ni ou mie eira'a ni pei miki.' ²⁶ Aikava u amua na vairumakoiai ou okia, "Ni opara lipi mo eapa nu aivara a'a miki, ni ipa lie na miaka'a naia aeape lie vake oko, mo na mike ka'eke naia uru upuru kavape lie pei oko. ²⁷ Ou eiai, ni na moni mieku ane aka ima liai moni iaki okava ipa iki au, naia vairuai oka'a voana na-na moni kaune'e ane aka mia vairuai. ²⁸ Ou eiai miomi vairu ou aru uau mere ai miaoku aru eve mekai-mekai ane karikie aivara a'a u. ²⁹ Uku a'a u koana iaki kaune'e ane liane, airai u miaka'a - ovara miki'i oko eu. Ai ekei a'a uau, ua voa mo liape liane, uau keia pei oui vake oko miomia laiokava ka'a uau mere. ³⁰ Kaea ere ou mu'u eria aivara a'a muru iki'i, ekeia our a'a u inamu ere mo ni'iri eki ainava na keia ka'a.' ³¹ A'a nu mere a ane-ane u parea evao-evao e, mo aneru uriria uane kiripai'i, oura'a u pa'ava ka'a u pakara evao-evao e. ³² U pakui kae ovara-ovara na kaupu kiaka'a, ai U a'a laieka'a roko-roko liaka'a mo moau mere, ipia mamoe maika a'ana momoe nani kosi au mere laiekake opara. ³³ U mamoe u eve miki mekai pa'a ekkava ka'a, ai nanikosi kevoua mikai'i. ³⁴ Oura'a Ia'a Amua u eve miki mekai iki ekia ka'a, 'Ane ni koa na Mai a ia'a ni'i kei ane oka mo mi eiei'i, ni eiai eni'i kariki nie kae upa karikie pani mere. ³⁵ Uku na navai ane rokoe ai ni pei mo ikue naia navai; Na kamuri lavere ikave ai ni pei mo ikue naia viruai, Na a'a momoe moa ane ai ni irae ikiri e; ³⁶ Na irikaiva ni rokoe, ai ni nai vaupa i'i e; Na maia lie ai ni nai maika ikave, Na muru mareai pokoie ai ni nai iai ane'e.' ³⁷ Oura'a opara anana iki oro vairumakoiai okia, "Amue, ene eka'a ama nie navai ane rokoane, ai nikue navai? O ere navai miki ai ere mikue navai? ³⁸ Mo ene ekei pani'i ma nie a'a mo moe mo oparai ai nilae ikirie? I irikaiva, ai kapua runikie? ³⁹ Mo ene ekei pani'i ma nie maia o muru mareai pokoi ane, ai ane'e in amu niai? ⁴⁰ Oura'a Ia'a Amua ua vairuma keiai ou ekia, 'Miki-miki naia nakia, peava i oura'a ni na a'a rurupu miki mo lioi ane, ni nai ei ai lie.' ⁴¹ Oura'a u kapoi eve kevoua mekai poko'i e iki ou ekia,m 'Laiki naiau mere, ipiai ai nami keia ikie, ikiri eiei pe iaui, imunu u aneru ane kariki eie iaui, ⁴² uku na navai ane rokoe, ai ni pei mo a ikupea naia navai; Na kamuri lavere ikave, ai ni pei mo a ikupea naia viruai; ⁴³ Na momoe a'a lie, ai ni a irae ikiripea, irikaiva, ai ni a vaupa i'i pea; maia mo muru mareai pokoie, ai ni a maika ikave pea.' ⁴⁴ Ai oroko vairumakoiai kuru ka'a, 'Amue, ene ekei pani'i ma nie, navai'i, o kamuri lavere, o momoe a'a mo oparai, o irikaiva, o maia, o muru mareai pokoi ane ai a paini kave pea?' ⁴⁵ Ai ua vairumakeiai ou ekia, 'Miki-miki naia nakia, peava i oura'a, nia na a'a rurupu miki mo lioi ape ma lie, ni nai eiai ma lipea.' ⁴⁶ Ei iki-oro enavai laiekava ka'a opai kukunu laruai, ai opara anana u opai rokoai.