¹ Ou pani'i Iesu u enave ia'a lare'e koni aura oka-oka. U aivara iki oro navai miki eiai ai koni auki aka nave. ² Ai Vupu ipaokia a'a oroa inamu eie oparai, oro Iesu ou ikai, "Oio, ni aivara ikia lia voa u vupu miki apea ia'a lare'e lia." ³ Aikava, Iesu a ou ekia, li noro Davida na lie opara ama oraeke? ua navai eiai, mo uane rokoe vakeroa? ⁴ Uikiri enave Ia'a Eloi nu mareai, Upa'akoi pokoie pu naomie, oura'a u vupu miki apea ua navai, uane rokoe iki oko eu, ai kava omoro a'a monou a navai. ⁵ O nora vupu ia orae pea, Ia'a lare'e omoro a'a oroa Ia'a lavi'i avioia lipi like aike ima iki oparai rokoke voa? ⁶ Ai kava na ia nakia, Ia'a lavi au mere upa lia a'a U eire'e. ⁷ Nia ei voa nu miki ipa liai oka'ane, 'Na kekepa lae lia, ai epia pei apea,' ni lipi eria a'a ama laiokake voa pea. ⁸ Uku a'a nu mere U Ia'a lare nu. Amua. ⁹ Iesu u oi mako ave'e aka u ikiri ai enave omu avi oia mareai. ¹⁰ Ai a'a mo u eve eapa, vupu ipaokia iki oroa ane-ane okavai, ou okia, "U vupu miki apea ae, a'a ima eia iaki Ia'a lare'e liai?" uku oro oura'a voa oki aka'a eiai. ¹¹ Iesu a ou ekia, "A'a koa ou nomu okai, koa u mamoe monou miki ane, ai ei mamoe ua aroa ururu kiki'i araki ane ia'a lare'e, ama piria keiai oka'a pea ni mo ama lakia ere mane ai lia pea? ¹² Eka'a opara ia'a miki, li oura'a, a'a u mamoe au! Ou eiai u vupu miki ima liai Ia'a lare'e." ¹³ Iesu ou leko mere ou a'a ou okia, "Ni eve oiokava ere mane" Ua oi okave ere pani'i, ai u imaili vairue, ipia eve mekai nu oparai. ¹⁴ Aikava ipaokia iki oro ere enave aka iki'i ai omoro ou nouoi a oro eka'a opara ima avaia imu ai. ¹⁵ Oura'a Iesu U ipa li voana, U oura'a mere lakie. Aira miki a'a na kauo kie, ai u ima eie. ¹⁶ U eie kave oura'a oro U iki'i kavai apea, ¹⁷ Uku oura'a u miki liaka, iva veia omoro a'a Aisaia u oima kurue, eira'akuru voai, ¹⁸ "Oio, na aivara a'a naia auokave; na naumuki miki monou, koa uau na onomu u kopai miki. Na avaea u upai aia ka'a mo u opara ima iki'i kavaka'a ane'e i kiau. ¹⁹ U ama kanana ava ka'a pea mo viki aroro eria,; U kamuri kiri ma viri a ka'a pea kapea iki'i. ²⁰ U ama vepea ka'apea epueu keia iki' U ama nomu ka'a pea kumu ana ei ma keiaka'a iau, ena liviai ua opara ima iki upai pa'a eka ane, ²¹ ai U noe'e, ane'e iki oro oka mo miaka'a." ²² Ai a'a mo inamu apua mo momoa, imunu a kiruave rokoe ou orae oi anea Iesu au. Miki iki'i lie, ou momoa u omoro kurue mo inamu kae. ²³ A'a uriria inamu auemie mo kurue, "Li ei a'a U Davida nu ukua ae?" ²⁴ Aikava vupu ipaokia iki oro ei iva veia nu omoro viri voai, oro eira'a kurue, "Ei a'a U imunu eria ama laoike pea a mari imunu ane monou i'i, ou imunu nu amua." ²⁵ Aikava Iesu u omu lae korava ipa liemi aka ou ekia, "Eiei uriria omu nanea kora'a rokoa kaiki ane oro ama ainava ka'a, mo pairi ovara o marea u nanea kora'a rokoa kaiki ane oro ama oia ka'apea monou iki'e. ²⁶ Imunu u Imunu la oi ere ane, u unane'e kora'a rokoa kaiki aka'a. Eka'a opara ima oi mao u eiei u? ²⁷ Mo naia imunu, mari imunu a laoi a ere ane, ai nomu ukua oro ai ama laoi ke. ²⁸ Ai kava naia imunu Ia'a Eloi nu Avaea i laoi a ere ane, oura'a liane, Ia'a Eloi nu Avaea u ou ane'e nomu upai. ²⁹ O eka'a opara ima ikiri akae a'a u venea miki a'a nu marea vepe aia avapu liai, u eve ari ane no piri omi ape'e? Ou imai u aruku avapu okavaka'a u mareai. ³⁰ A'a u koana u nai ane ape ana u naiane mane, mo nai ane kaupu ekia iaki liape liaka'a a'a u upuru kavaka'a. ³¹ Ou eiai, naia nakia, namea uriria mo apu omoro ane na u'u omi aka'a a'a, ai apu omoro Avaea Ia'a oki ane U ama u'u omi aka'a pea. ³² A'a u koa A'a nu Ukua omoro nou oi ane, ou vake u ama u'u omi aka apea, ei ane ma keia pani mere ane ka'a pani oko eipe. ³³ Iri ima e'e, mo u uru ima e'e o iri lipi e'e mou uru lipi e'e, uku iri u uru mere ipa like. ³⁴ Paikou nu a'a uru e, uku noroa lipi a'a lia eiai, eka'a oparai ma kuru mao voa ima'a? Uku umu a mi varua aruku u ania kurua. ³⁵ A'a ima u umui keia ima nu mari u ima karikike, mo lipi a'a u umu i keia lipi nu aruku oro lipi voa like. ³⁶ Naia nikia, a'a na kurua omoro imu a uriria uoko kavane mika'a veve'e-veve'e liaka'a pani'i. ³⁷ Uku ni omoro u ni anana ni'i aka'a; mo ni omoro a ni nipiri aka'a. ³⁸ Ou tekomiere vupu kikiri'e iki mo vupu ipaokia iki oro Iesu nu omoro vairuma kaoiai, ou kurua, "Ipa okai a'a e, ene lae miki lia ni au mere avaea opara varemo iai." ³⁹ Ai kava Iesu u vairuma kaeiai ou ekia, "Avaea lipi mo eveve nu a'a avai oro veve'e ma keia avaea opara mo. Aikava avaea opara mo ama eku a ka'a pea ai iva veia omoro a'a Iona nu avaea opara monou. ⁴⁰ Uku Iona u lare leako kaune'e ane mo kipere leako kaune'e ane pekeie amua ovara nu nemui. Ou ipia A'a nu Mere U lare leako kaune'e ane mo kipere leako kaune'e ane keia ka'a kae umu laru ai. ⁴¹ Nineva nu a'a oro oia ka'a veve'e-veve'e pakui oro ane ei pani nu a'a kiri ai oro lipi ei aka'a. Oro rokoa u'uru kie Iona nu Ia'a omoro kuru ai ai oio a'a mo Iona o'ope-o'ope vake u eira ai. ⁴² Amua ek akapu pairi mere la'ava inava ka'a veve'e-veve'e pani'i ei pani nu a'a kiri ane ai lipi liaka'a. Ou ai'ai u kae nu eiei mere ane'e Solomona nu lae evera viriai, ai oio, a'a mo Solomona o'ope-o'ope vake u eira ai. ⁴³ Avaea upu a a'a u mere areke liane u rokoa-rokoa enake erepe pairi-pairi lae kaeai, ai ama auokuke pea. ⁴⁴ lekomere ou kurua, "Na vairu aka'a na mareai naia ere mane iki'i. Vairua voai, u marea akuru oie, onari laukeia mo pei uriria u ananai papa okave pokoi ane. ⁴⁵ Oura'a u ere enave aka avaea upu Seven mo eraea uau mere araupu lipi miki a'a, ai oro ou vairua rokoai oura'a. Ou a'a nu lekomere rokoa u avava miki lie pina nu rokoa mere. U ou opara miki liaka'a ei avaea lipi a'a kiri au. ⁴⁶ IEsu ou a'a aira miki omoro eki ma keiane, ai mara, U ai mo U o'oro oro ouma lake ai ane'e arekamui, lae arae-arae miki'i U ane omoro aki navai. ⁴⁷ A'a mo ou okia, "Inamu kae, ni ai mo o'oro oro iki'i iu, lae miki lima keia ni ane omoro akinavai." ⁴⁸ Aikava Iesu a omoro oki a'a ou vairuma koia, "Na ai koa mo na o'oro oro ko oroa?" ⁴⁹ U oura'a U eve aivara iki au oi okave aka ou kurua, "Inamu aka kae'e, na aioro oro eira'ai mo na o'oro! ⁵⁰ A'a u koana na Mai kaiai pokoia vake nu lae liane, ou a'a u na ovake mo aroa mo ai.