¹ O oya ai sa maqa ina ni voilia a Alou a nodra cala o odra edra sa tu vata ei Karisito Jisu. ² Baleta a laqa ni Yalo Tabu, o oya sa dia mai ve eda a bula ina oda tu vata ei Karisito Jisu, sa serei au mai a lawa ni valavala ca ei na mate. ³ A a sa maqa ni ca'ava rawa a lawa, ina vu'u ni malumalumu ni varau ni bula vatamata, ma sa ca'ava oti a Alou. Ma sa varusa a i valavala ca sa tu i na i tovo ni bula vatamata ina ona tala mai a Luvena, o oya sa la'o mai ina yago sa tautauvatga ei na yagoda i valavala ca a tamata, mei soro ni valavala ca. ⁴ Sa ca'ava a a ai a Alou me da'a rawa ina a i valavala dodonu e varota a lawa ena oda bula a tamata eda sa bula voli ina veiliutai ni Yalo Tabu, qa maqa ni tauvata a i tavo e gadreva a yagoda. ⁵ O odra edra buli voli me tauvata a a e gutia a odra i tovo vayago edra sa varorogo i na a e gadrevia a yagodra, ia o odra odra sa bula voli me touvata a a e' gutia a Yalo Tabu edra sa varorogo ina veiliutai ni Yalo Tabu. ⁶ Me lewai eda a oda i tovo vayago sa ena i tinitini a mate; ia me lewai eda a Yalo Tabu sa ena i tinitini a bula ei na vacequ. ⁷ O oya ai, sa yaco ina me dra meca ni Alou a tamata edra sa lewai mai na i tovo vayago; ni dra sa maqa ni muria no a lawa ni Alou, qa sa dredre sara me dra talairawarawa ina. ⁸ O odra edra sa muria noga a i tovo vayago edra sa maqa ni rawa ni valomaretainia a Alou. ⁹ Ia o miau sa maqa ni bula voli me tauvata a a e gaddreva a yagomiau, o miau sa bula voli ga me tauvata a a e gadreva a Yalo Tabu, e tauvata e dina ni sa bula no a a Yalo ni Alou e lomamiau. A tamata yadua e maqa ni notu ve' ea a Yalo i Karisito e maqa ni ona a Karisito o oya. ¹⁰ Ia e tauvata sa notu i lomamiau a Karisito, e dina ga ni sa mate a yagomiau ina vu'u ni valavala ca, ia sa bula no a yalomiau ni sa vadonui emiau a Alou. ¹¹ Ia e tauvata sa notu i lomamiau a Yalo ni Alou, o oya sa vatuca etai Jisu ca'e leqa mai na mate, ena qai vabula liqa ga a yagomiau sa mate rawa o oya sa vatucaetai Karisito mai na mate ina vu'u ni ona Yalo Tabu sa notu i lomamiau. ¹² O oya ai, oi emiau a veiweani, ni sa notu a oda i tavi me da vayacora, ana me da ua ni bulatainia no a oda gagadre ni tovo vayago. ¹³ Ni e tauvata o miau sa bula voli ga me tauvata a a e gadrevia a yagomiau, o miau na mate; ia e tauvata o miau sa vamatea a vi'a e gadrevia a yagomiau ena Yalo Tabu, o miau na bula. ¹⁴ O odra sa liutai odra a Yalo ni Alou edra sa luve ni Alou. ¹⁵ A Yalo Tabu e solia vei emiau a Alou sa maqa ni Yalo ni vivabobulatai me vavurea vei emiau a rere, ia a Yalo Tabu ga sa vayacori emiau mo miau luve ni Alou, o oya eda sa aci ina kaukauwa ni Yalo Tabu vei ea a Alou, "Apa! Tamaqu!" ¹⁶ A Yalo ni Alou sa semati oya ina yaloda yadua me vadinadinatai ina nida sa luve ni Alou. ¹⁷ Ni da sa luvena, eda na tau ena a vi vaalogatatai sa maroroya tu o oya me odra a ona tamata, qa da na tau ena leqa vata ga ei Karisito a vi a sa maroroya tu a Alou me baleti oya; ni e tauvata eda sa vaivotavota ina ona vararawatai a Karisito, eda na vaivotavota leqa ga ina ona lagilagi. ¹⁸ Au vasamatainia ai ni vi'a rarawa eda sota aya no e daidai ena maqa ni rawa ni vatauvatani ei na lagilagi ena qai varaitai ve eda ina gauna mai muri. ¹⁹ Sa wawa tu ina nanamai levu a vi'a buli me vatailai odra mai a luvena a Alou. ²⁰ ni ma sa covoti tu o vuravura me varevania a ona i nai, qa sa maqa ni yaco ai me tauvata a ona i nai vaioya ga o vuravura, ia sa ona i nai ga a Alou me tauvata ina. Ia sa notu ga a i nuinui ²¹ ni na yaco mai a gauna me na serei leqa ina o vuravura mai na ona vabobulatai i na tusa qa me vaivotavota ena bula galala uasivi sa odra a luve ni Alou. ²² Eda sa ila tu me yacova mai a gauna ai na ni dra sa vutugu tauco'o tu a via buli ena rarawa, io me tauvata a rarawa ni vasucu gone. ²³ Ia edra sa maqa ni vutugu walega a vei a buli, eda sa butugu leqa ga i yaloda oi eda sa tu ve eda a i sevu ni ona i solisoli a Alou o oya a Yalo Tabu, ni da sa warainia no me vayacori eda a Alou me da sa luvena qa serea a oda bula tauco'o me galala. ²⁴ Ni sa i oya a oda vanuinui ai eda sa vabulai ina. Ia etauvata eda sa igavia rawa no a a eda nuitainia no, sa qai maqa leqa ni oati ari mei nuinui dina. Se o cei mada e dau nuitainia me yaco e dua a a sa unea rawa no? ²⁵ Ia e tauvata eda vanuiui no ina veia eda se maqa mada ni igavia, eda na warainia ga ena vosota. ²⁶ Sa tauvata ina a ona lao mai a Yalo Tabu me mai vuei eda ena oda malumalumu. Ni da sa maqa ni ila ai varau ni masu e iliili me da vayacora. Sa vamamasu no ga a Yalo Tabu ve'ea a Alou ena vuuda ena vutugu sa maqa a vosa me vamacalatainia rawa. ²⁷ Ia a Alou o oya sa igavia a Yalo ni tamata, sa ila a vaasama ni Yalo Tabu; ni sa dau masulai eda na Yalo Tabu me tauvata a a e gutia a Alou. ²⁸ Eda sa ila ni sa ca'aca'a no a Alou ina via tauco'oga me dra are ina o odra edra sa lomani oya, o odra sa acivi odra o oya me tauvata a lomana. ²⁹ I odra sa digitainia oti a Alou sa lesi odra o oya medra yaco me dra tauvata a Luvena; me yaco ina a luvena me ulumatua ena edra maliwa a tacina ena dua a mata vuvale levu. ³⁰ Ma sa yaco ina me ve ai: o odra sa digitaini odra a Alou, ma sa acivi odra; o odra sa acivi odra o oya, ma sa vadonui odra; ei odra sa vadonui odra o oya, ma sa vota leqa ga ve edra a ona lagilagi. ³¹ A cava leqa me da qai aya ena vei a tauco o ai? E tauvata sa oda i to a Alou o cei ena qai oda maca? ³² O oya qa ma maqa ni batainia a luvena dina, qa ni ma soli oya ga ina vu'uda tauco'o, ena maqa li ni solia waleqa vei eda a a tauco'o ga? ³³ O cei ena beitaini odra a digitai ni Alou? A Alou sara ga vai oya e sa vadonui odra qa sa oati odra me dra sai valavala dodonu! ³⁴ O cei leqa ena rawa ni vacalai odra? Sai Jisu Karisito ga qa ina mate; ma sa vatucaetai ca'e lewa, sa notu ena liga i matau ni Alou edaidai ga sa dau vamamasu no ve'ea a Alou o oya ena vu'uda. ³⁵ O cei me na tawa sei eda rawa mai na loloma i Karsito? A a rarawa li, se a yaluma, se a dauveivacacani, se a dau siga, se a luvawale, se a dauvivarerei se ai seleiwau? ³⁶ Ia me tauvata sa volai: "Ina vuumiau, eitou sa vamatei no ina ena siga tauco'o; eitou sa vatautauvatani ei na Sipi ena varau vamatei." ³⁷ Maqa! Ina vi'a tauco'o ai eda na qaqa ina ina vu'u in oya sa lomani eda. ³⁸ Niu sa vadinata sara ni na maqa leqa ni dua a a me na tawasei eda mai na lolomai Karisito; ena maqa ni rawata a mate, se a bula, edra na maqa ni rawata a agilosi se o odra a daulewa mai lomalagi, se a vi'a e yaco edaidai se a vi'a ena yaco mai muri, ³⁹ Se na vuravura i ca'e, se na vuravura ira, Ena maqa sara ni dua a a me na tawasei eda mai na loloma ni Alou sa mai oda ena vu'u i Karisito Jisu a oda Turaga.