1 Ni sa vadonui eda ve ai a Alou ina vu`u ni Vabauta, eda sa qsi vei reti vata oi na Alou ina Vu`u i Jisu Karisito a oda Turaga. 2 Sa di eda mai o oya ina vabauta me da eurumia wage ina a loloma. Savu ni Alou, eda sa bula tu ina ai. I`na a ai, eda sa cibitainia ina a i nuinui sa tu ve eda ni ola sa vaivotavota ina lagilagi ni Alou! 3 Ja e maqa ni oya walega ana, me da cibitaini leqa ga a atai ni bula dredre eso eda dau sota oya, baleta ni da sa ila ni vila rarawa sa vavunia a dau vosata, 4 a douvosota sa vavuna ai valavala sa vedonui, sa vavuna ai nuinui. 5 Io ai nuinui ai sa maqa ni vamedualaini eda, ga ni sa sovarainia mai a Alou a ona loloma i yaloda ina ca`aca`a Ai yala Tabu, ga sa ona i solisoli a Alou ivei eda. 6 Ina gauna eda sa malumalumu tu ina sa mai mate oti a Karisito ina vuvda a tamata i valavata ca ina gauna sa louca a Alou. 7 Sa maqa sara ni a rawarawa ve`ea e dua me la`i mate ina vu`una e dua a tamata i valavala dodoru. De rairai notu be`a e dua ena gutia me mate ve ai ina vuuna e dua a tamata re. 8 Ia a Alou sa varaitainia ve eda a levu ni ona lomani eda; qa ni da se bula voli ga ina i valavala ca, qa sa mai mate oti a Karisito ina vu`uda! 9 E da sa qai vadonui mai ve`ea a Alou ina vu`a ni ona dra; ena qai vacava a ena levu ca`e sara a ona vabulai eda o oya mai na civo ni Alou! 10 Eda ma veimecai tu ina ei na Alou ina dua a gauna, ia sa vayacora a Alou me da vei`guti leqa ei oya ina vu`u ni mate i Luvena. Me tauvata ni da sa Veitoani vare tu ai ei na Alou, ena qai vacava a ena levu ca`e ni oda vabutai no ina vu`u ni bula i Karisito. 11 Ia e maqa ni oya walega ana, eda sa vavinavina`a no ve ea a Alou ina vu`u ni oda Turaga o Jisu Karisito, o oya sa mai yaco ina me da veiguti ei na Alou. 12 E ma curu mai i vuravura a i valavala ca ina vu`u ni dua ga a tamata, ia a ona i valavala ca sa dia vata mai a mate. Sa moni yaco ina me tete a mate ina tamata tauco`oga me tauvada ni da sai valavala ca a tamata tauco`oga. 13 Ma sa tu i vuravura a i valavala ca ni se bera ni soli a Lawa; ia me tauvata ni ma se maqa ina a Lawa sa maqa ni mani volai a i valavala ca ve`ea a tamata e ca`ava. 14 I`a mai na gauna i atama me yacova a gauna i Mosese sa lewai odra tauco`o tu a tamata o mate; e bau lewai odra leqa ga edra maqa ni valavala ca ina odra voloa e dua a Lawa, me tauvata a cala sa ca`ava o Atama. o Atama sai vataaraara ei oya ena qai muri mai. 15 I`a edru maqa ni tautauvata a lewe rua ai, ni maqa ni tautauvata a i solisoli soli wale ni Alou ei na i valavala ca i Atama. Sa dina ni sa lew sara a tamata e mate ina vu`u ni valavala ca ni dua a tamata. I`a sa lew ca`e sara a loloma savu ni Alou ga tauvata ina a ona i solisoli soli wale ve edra e lew a tamata ina vu`u ni loloma-saw ni dua a tamata, ana o Jisu Karisito. 16 Ma sa rotu a eiatua duidui a loloma soli wale ni Alou ei na i Valavala ca ni tamata e dua bau. Ni lewa qa sa tau mai ina vu`u ni duabulu qa a i valavala ca sa dia mai a civoli, ia ai solisoli qa sa soli wale mai, qa donuya a gauna sa sivia tu ina a i valavala ca, qa sa dia mai a bula vosoti qa sa vadonui. 17 Ni tauvata e sa yaco me lawai eda o mate ina vu`u ni valavala ca ni le dua ona, sa na qai vacava a vasivi ni a e rawata a le dua qa tavava o Jisu Karisito. Ni o odra tauco`o sara sa caqoma a loloma-saw vuabale ni Alou qa dra sa vadonui vata aya, edra na KauKauwa ina bula ai ina vu`u i Karisito. 18 O oya ai, me tauvata ni sa vavura e duabulu ga a i valavala ca a wodra civoti a tamata tauco`o ga, ca ca`aca`a dodonu me dra sarei qa Vagalalatai a tamata tauco`o ga qa sa soli ve edra a bula. 19 Me tamata leqa ga a wodra sa oati me dra i valavala ca a tamata ina vu`u ni valavala ca ni dua ga a tamata ena tauvata ina a wodra vadonui leqa ga ina vu`u ni talairawarawa ni dua ga a tamata. 20 E ma di mai a lawa me tubu valevu ina a i valavala ca; sa uasivi ca`e levu ina a i valavala ca, sa uasivi ca`e ina a loloma. Savu in Alou. 21 Ia ai, me tauvata ni sa gumatua a i valavala ca i na mate, sa gumatua tauvata ina a loloma. Savu ni Alou i na bula sa vadonui i na bula tawamudu ina vu`u i Jisu Karisito a woda Turaga.