¹ Sa iliili leqa ga ei eda, o eda sa kaukauvua meda vosotia a odra malumu edra sa maqa ni kaukauwa, meda ua leqa ga ni itainia a'a sa are vei eda ga. ² Me da itaa yadua a'a e are vei oya a ai noda, a'a e yaga me vatavuli ei ina o oya. ³ Ia a Karisito leqa ga sa maqa ni itaa a'a sa gutia ga o oya; ia me tauvata ga sa volai; Sa tau vei au a odra vosa ca edra sa vosavacacaai io. ⁴ Io, a'a taucoo ca volai imada sa volai meda vavulici ina, me oda a vosota ei na vacegui sa vu mai nai Voya Tabu, me rawa ina ai nuinui. ⁵ Ia me solia mada vei emudou a Alou, o oya a vu ni vosota eina veivacequi, mo dou loma vata vaai emudou me vata'i Karisito Jisu. ⁶ Mo dou lomavata qa domovata nidou sa varoorootaa a Alou, o oya a Tama: Jisu Karisito a oda Turaga. ⁷ O oya mo dou qai veivacegui vaai emudou, me tauvata sa vacegui emudo a Karisito, me varrorootai a Alou. ⁸ Ia au sa aya ni sa italatala o Jisu Karisito vei odra edra sa cili, me vataila ni sa dina a Alou, me vadinadinataa a vosa ni yalayala vei odra a qase: ⁹ Medra varoorootaa a Alou o odra leqa ga a veimatanitu tani ina vuu ni ona loloma; me tauvata sa volai, Ena vuu ni a'ai auna vatusai io ina ina edra maliwa a veimatanitu tani, Qa sere ina yacamiau. ¹⁰ A sa aya leqa, Dou rei vata a veimatanitu tani, ei odra a ona tamata. ¹¹ Sa dua leqa. Dou varoorootai Jiova, a veimatanitu taucoo. Ia dou varoorootai oya valevu, o emudou a veivanua taucoo. ¹² O Aisea leqa ga sa aya, Ena tubu a waa i Jese, Ei oya ena tucae me lewa a veimatanitu tani; Edra na vararavi vei oya o odra a veitamanitu tani. ¹³ Ia me vasinaiti emudou mada a Alou, o oya a vuni nuinui, ena rei taucoo eina vacegu ni dou sa vabauta, me levu sara a omudoui nuinui ina vuu ni ona kaukauwa a Yalo Tabu. ¹⁴ Ia o au leqa ga, au sa vaasami emudou, a weaqu, ni mudou sa sinai na yalololoma ni mudou sa sinai ina vuu taucoo, ni mudou sa rawata leqa ga me dui veivatavulici vaai emudou. ¹⁵ Ia au sa doudou ga, meu volavola valailai waqe vei emudou, a veiweani, meu vananuni emudou leqa, ena vuu ni loloma sa solia mai vei au a Alou, ¹⁶ me'u yaco me talatala i Jisu Karisito vei odra a veimatanitu tani, me'u itaa a caacaa ina itu'utuu re ni Alou, me guti ai cabocabo ni veimatanitu tani, ni sa vasavasava tai odra a Yalo Tabu. ¹⁷ O oya sa tu ina vei au a'a meu valevulevui qu ina ina vu'ui Jisu Karisito ena veia ni Alou. ¹⁸ Niu na maqa ni doudou walega meu cavutia a;a tani; a a ga sa vayagatai au ina a Karisito, me vatalairawarawatai odra a veimatanitu tani, ena i vosa ei na ivalavala, ¹⁹ Ena vuu ni sa kaukauwa a veia-mana ei na veia veivaurabuitai, sa caa ena kaukauwa ni Yalo Tabu, is qai vatoivu ina mai Jerusalemi, qa lao voli qa yaco i Iliriko, niu sa vunauta'a taucoo ai tuutuu re ei Karisito. ²⁰ Ia au sa gumatua sara, meu vunautainia ai tuutuu re, ia qa maqa ga ina vanua sa aitai oti ina a yaca i Karisito de'u tara walega a'a i dlaniyavu ni tamata tank: ²¹ ia me tauvata ga sa volai, O odra sa maqa ni aitai mada vei odra o oya, edra na igavia: Ia o odra edra sa maqa ni rogoca, edra na ila, ²² O oya ai sa tarovi vavuqa ina a oqu lao vei emudou. ²³ Ia ni sa qai maqa a'a me'u notu ina ina yasana ai, qa sa yabai vuqa au gadrevia ina meu lao vei emudou. ²⁴ Ni na yaco a oqu lao i Sipeini: (nio sa nanumia meu igavi emudou ina oqu lao, qa mudou di au ina oqui laolao ina, ni sa oti mada e emudou vacegui au valailai nida notu vata. ²⁵ Ia au sa qai lai i Jerusalemi, meu dia a soli vei odra edra sa lotu. ²⁶ Ni sa gutia o odra a ai Mositonia ei Avaia, me dra ia e dua ai solisoli loloma me odra a dravudravua edra sa lotu mai Jerusalemi: ²⁷ io, edra sa gutia; e dodonu medra soli a vei odra. Io, evaa edra sa rawata maivei odra sa qai dodonu ina vei odra medra solia vei odra vei odra a veia vayago. ²⁸ Ia niu sa caava oti mada a'a ai, qa solia vei odra a ani loloma ai medra tauria, au na qai taa vei emudou a laani i Sipeini. ²⁹ Ia qau sa ila, niu na lao waqa vei emudou, au na lao eina veivaalougatatai taucoo ei Karisito. ³⁰ Ia qou sa vamasuti emudou, a veiweani, ena vuu ni oda Turaga o Jisu Karisito, ena vuu leqa ga ni loloma ni Yalo Tabu, meda gumatua vata ena masu vei ea a Alou ena vuuqu. ³¹ Meu vabulai maivei odra mai Jutia edra sa maqa ni talairawarawa; me dra gutia leqa ga o odra edra sa lotu na oqu caacaa ena caa mai Jerusalemi. ³² Meu lao ina veiemudou ena rei ena lewa ni Alou qa meu vacegui vata ei emudou. ³³ Ia me notu vata ei emudou taucoo a Alou ni veivacegui. Emeni.