¹ O oya ai, au sa vamamasu vei emudou, a veiweani, ena vu'u ni loloma vavuqa ni Alou. Mo dou solia a yagomudou mei madrali bula, me savasava, me are vei ea a Nalou, me omudou isoro vayalo. ² Ia dou ua ni vatauvatani emudou ei odra edra sa vaburavura:ia dou mali atai ga ni sa vavoui a yalomudou, mo dou ila rawa ina a loma ni Alou, sa yaga, qa are, qa dodonu sara. ³ I ena loloma sa soli mai vei au, au sa aya vei odra a tamata yadua vei emudou, me ua e dua me doai oya ga me tauvata sa maqa ni dodonu me doai oya; me yalomatua ga a ona nanuma, me tauvata ai varau ni vabauta sa vota a Alou vei odra yadua. ⁴ Me tauvata sa dua bauga a yagoda, qa vuqa a tiida, ia qa sa mada ni vaitavi vata a tiida tauco'o; ⁵ sa vaaina o eda, a lewe vuqa, eda sa yago vata nida tu vata ei Karisito, eda sa veitiina tauvata leqa ga vaai eda. ⁶ Ni da sa rawatia a veisolisoli sa duidui me tauvata a loloma sa soli vei eda: evaa sa parofisai me da parofisai me tauvata ai varau ni oda vabauta; ⁷ se a dau veivota, meda ia na veivota; se o oya sa dauvatavuvuli, me vavuvuli no; ⁸ se o oya sa dauvunau, me vunau no; o oya sa ia na solisoli, me dina a lomana; o oya sa daulewa me gumatua ina; o oya sa dauloloma me ia ena rei. ⁹ Me ua ni valawai a loloma. Mo dou catia sara a'a ca; mudai abita sara a are. ¹⁰ Dou veilomani sara ina veilomani ni veitacini; dou veiuasiviti ina veivaroorootai. ¹¹ Ena gumatua mo dou ua ni vucesa mai: me ataata a yalomudou; mo dou qarava a Turaga. ¹² dou rei ina inuinui; vosota a'a rarawa; ia lo no ga na masu; ¹³ veivotayaa vei odra a dravudravua edra sa lotu; dau vacegui odra a vulagi. ¹⁴ Dou vosava alogatatai odra edra sa vacacani emudou; vosavalaugatat'aa ga, qa ua ni rua'a . ¹⁵ Dou rei vata ei odra edra sa rei, qa tagi vata ei odra sa tagi. ¹⁶ Dou lomavata no vaai emudou. Ua ni nanuma a veia vaturaga, ia mudou veiriti ei odra a tamata lalai. Dou ua ni vasami emudou ni mudou sa vuu. ¹⁷ Ia ni veisausaumitainia a ca idua. Naita imada a veia sa dodonu ina matadra a tamata taucoo. ¹⁸ Evaa sa rawa, mo dou vatovolea me veilomani ei odra a tamata taucoo. ¹⁹ O emudou sa lomani dou ua ni saumia a ca sa caa vei emudou ia mo dou dainia vei oya a Alou me saumia; ni sa volai; A oqu itavi meu civotaa; au na sauma o au, sa aya a Turaga. ²⁰ O oya mo qai vaania a omu meca, evaa samataana; evaa sa matagunu, mo vagunuvi oya: qo na binia ina ina uluna a qilaiso sa rea tu nio sa itainia veai. ²¹ Me ua ni rawai io a ca, mo rawa ga aca ena are.