¹ Ia sa vo e rua a bogi me qai ia a ana vata ni lao sivia ei na madra e maqa ni vatubu, dra sa qai vaigavia e dua a salevu me dra lawaitai ni eya ina me rawa ni dra tau vi Jisu qa vamatei eya ² Qa dra aya, me ua i na gauna ni ana vata, de dra na qai ue ina a tamata. ³ Ia ni sa notu o oya mai Pecani i na vale i Saimoni a vuavua, ni sa ana no, sa lao mai e dia a lewa sa dia mai e dua a tavaya alapaista waiwai a narita dina, sa talei sava, sa voro ia a tavaya qa livia ina ona ulu. ⁴ Dra sa vosa udruudru vai edra, qa dru aya, "A cava sa vamaumautai ina waiwai ai? ⁵ E rawa ni volitai qa sivia ai sau ni caacaa ni dua a yabai qa soli ai lavo ve edra a dravudravua" Dru sa qai avaci eya a lewa. ⁶ "Biuti eya" aya o Jisu. "A cava mudou auwaitai ni eya ina? O oya sa velee e dura caacaa ve vei au. ⁷ o dora a dravudravua edra tu vata ga ei emudou, qa mudou rawa ni vu ei edra ina dua ga gauna e mudou gutia. Qa mudou na waqw ni no tu vata ei au i na vigauna. ⁸ sa velee rawa a a e rawa ni velee sa livia rawa a waiwai i na oqu gau me baleta a oqu bulu. ⁹ Au sa aya veidina ve e mudou, i na vi vanua taucoo e na vunautai ina ai tuutuu ve i vuravura ai, ena bau tovelei ga leqa ina a ma velee a lewa ai, me enai vananu mi. ¹⁰ Sa qai lao o Jutasa Isikarioti, e dua ve edra a le tiniarua ve edra a bete leva me soli Jisu ve edra. ¹¹ Dra sa marau ni dra sa rogo, qa dra yalayala medra soli lavo ve eya sa qai vaigavia o oya e dua gauna me rawa ni soli eya waqe ina. ¹² Ia i nai mateai ni siga ni ana madrai e maqa ni vetuvu, ni dra sa va mate a lami ni lao sivia, dru sa qai taro a tisaipeli i Jisu, "I vei a vanua o gutia me eitou lai varautainia mo velee ina a ana vata ni lao sivia?" ¹³ Sa qai tala o oya e rua a ona tisaipeli, qa aya ve edru, "Mudru lao i naoro, mudru na sota aya e dua a tamata e na cola no mai e dua a saqa wai. Mudru muri eya. ¹⁴ Mudru aya ve eya a tavei ni vale ena curu ina o oya, "Sa tarogia ai vavusuli, ivei a vunua meu ia ina a ana vata ni lao sivia vata ei edru a oqu tisaipeli? ¹⁵ Ena qai varaitainia o oya e dua a vanua levu i na vale i cae sa vai yaya eti tu. Mu dru varautainia ve eda." ¹⁶ Dru se qai lao a tisaipeli qa dru sotavia me tautauvta saraga a a ma aya ve edru o Jisu, Dru sa qai vairautainia ina a ana vata ni lao sivia. ¹⁷ Ni sa tavanavi mai, sa qai yaco mai o Jisu vata ei edru a le tiniarua ¹⁸ Ni dra sa no wavoi no i na delaniteveli me dra ana. qa aya, "Au sa aya vaidina vei emudou, e na dua vei emudou, e na soli yau waqe, io o oya ena ana vata ei yau. ¹⁹ Sa qai rarawa valevu a lomadra, dra sa qai aya yadudu ²⁰ Sa qai aya ve edru o oya, E dua vei emudou a lewe tiniarua, o oya ga sa tooca vata ei yau ei yau a ena ina bilo. ²¹ Sa na lao a luve ni tamata, me tautauvata a a sa volai ina vuuna ia qa ca vei oya a tamata sa soli oya waqe a luve ni tamata! "Sa are cae veeya me uwa ga ni sucu" ²² Na gauna dru sa ana ina, sa qai tauria a madrai o Jisu, qa vavinavina a tainia, qa dovia qa solia ve edru a tisaipeli, "Dou tauria, iyari a yagoqu." ²³ Sa qai tauriya a bilo, qa vavinavinaa tainia, qa solia ve edru qa dra sa somi taucoo ina. ²⁴ Sa qai aya ve edru "iyai a oqu dra ni veiyalayalati," Sa livirai ina vuuqu" ²⁵ "Au sa aya vaidina vei emudou , Au na maqa ni qai somi leqa ina vua ni vaini, me yacovia mada siga au na Somiya ina a avou ina matanitu ni Alou. ²⁶ Ni dra sa laga sere oti, qa dra lao waqe ina ulunivanuani vei olive. ²⁷ Sa qai aya ve edru o Jisu, "Dou na tarabe taucoo ina Vuuqu." Au na yaviti edra ai vatawa ni sipi, qa dra na dui vasesei a qele ni sipi. ²⁸ Na gauna au na tucae leqa ina, au na qai liutai emudou i Kalili ²⁹ Sa qai aya o Pita, E dra na tarabe o odra taucoo oodra taucoo, o yau, e na maqa. ³⁰ Sa aya veeya a Jisu, Au sa aya vaidina vei io, ina siga ni uwa, ina bogi ga ai, ni se maqa ni tagi mada varua a toa, ona cai tai yau vatolu. ³¹ Sa qai aya mai vayalokatakata mai o oya, "Veitalia eu na mate vata ei io, au na maqa ga ni caitaini io, dra sa qai aya leqa ga o odra. ³² Dra sa qai lao ina yasana o Kecisemani, qa aya ve edru a ona tisaipeli o Jisu, "Dou notu ga ei, meu mosu mada ³³ Sa qai di Pita, Jemesa ei Joni o oya, qa vateivu me idacala qa yaluma. ³⁴ Sa aya vei edru o oya, a yaloqu Sa rarawa valevu sara, e tautauvata meu na mate, dou notu ga ei qa vatawa. ³⁵ Nidru sa lao valailai leqa i mada, Sa qai cuva sobu i na somo, qa masu, me lao tani ve eya a gauna ana. ³⁶ Sa qai aya, "Apa, tamaqu," sa rawarawa ve emi au a a taucoo, diya tani vei yau a bilo ai. Me uwa ga ni tautauvata a lomaqu, me vala ga me tautauvata a lomamiau. ³⁷ Sa qai lesu leqa ve edru a tisaipeli qa igavia nu dru sa moce tu. "Saimoni" sa aya vei Pita, "O sa tei moce leqa? O maqa ni rawa ni o vatawa li i me bau dua walega a yauwa? ³⁸ Dou vatawa qa masu me ua ni rawai emudou a vere. E dina sa gu a yalo ia gau sa malumalumu. ³⁹ Vadua leqa sa qai lao qa lai masulainia no ga e dua a 'a ⁴⁰ Ni sa lesu leqa mai sa igavi edru ni dru sa moce leqa tu, ni sa bibi a odru mata, qa dru maqa ni ila a a medru aya ve eya. ⁴¹ Ai a tolu ni ona lesu leqa mai, sa qai aya ve edru, "Dou sa moce ga qa vacegu? Rauta sa yaco mai a ena gauna Igavia sa soli waqe a Luve ni tamata i na odra liga a tamata i valavala ca. ⁴² Tucae! Tou lao! Sa lao mai o oya sa soli au waqe ⁴³ Ni se vosa ga, sa basia mai o Jiulasa e dua ve edru a le tiniarua. E so ai lala edra lao vata mai e dra ua i selewvau qa vaiwau, mai ve edra a bete levu ei edra a vuni vola ei edra a qase. ⁴⁴ Ia o oya sa soli eya waqe sa solia e dua ai vatailaila, qa aya, "O oya ga au na yabotia, o oya ana mo dou dia qa yadravi eya waqe. ⁴⁵ Ni sa yaco waqe vei Jisu o Jiutasa sa qai aya, Vavuvuli?" sa qai yabotia. ⁴⁶ Dra sa qai mocai ni Jisu qa di eya waqe. ⁴⁷ E dua ma tu volea ve edra qai ucunia a ona i seleiwau qai ta vucaia a taliga u eya a tamata ni bete levu. ⁴⁸ "Au vadi edra bea no a va duidui le me mudou lao mai ina qa va i seleiwau qa vei wawu me mudou mai vesui au?" Sa qai aya o Jisu. ⁴⁹ Ina vi siga au ma dau vi va vulici voli i na vale ni soro qa mudou maqa ni vesui au. Ia ena vala ga a a e aya ai vola Tabu. ⁵⁰ Dra sa qai biuti eya tu qa dra ubu. ⁵¹ E dua a gane tagane ma muri eya no, e maqa ni vai sulu qa tilovi voli, i na dua ai sulu lineni qa muri Jisu no. Dra sa qai veu i eya, ⁵² qai biutia tu a ona i tilovi qa ubu luva wale. ⁵³ Dra sa qai di Jisu ve eya a bete levu, dra sa qai soqoni coo mai a bete levu qo odra qase ei edra a vuvu vola. ⁵⁴ E muri va yawa toa waqe o Pita me yaco sara i na vale ni bete levu. Sa qai lai notu i na edra maliwa a ovisa ni dra va rara i no i na quto. ⁵⁵ O odra a bete levu ei edra taucoo a matavilewai edra va une e sa ai vadinadina me dra beitai ni Jisu ina qai maqa ni dra igavia e dua. ⁵⁶ E levu e dra soli tu'utu'u cala qa maqa ni lao vata a a edra aya. ⁵⁷ Sa qai ta cae e so qa dra senitainia e so a a me dra beitaini eya ina. ⁵⁸ "Oitou ma goto i eya ni ma aya, "Au na veraia a vale ni soro ai sa vala i na laga, qau na tara leqa e dua i na tolu a siga, qa maqa ni vala i na liga." ⁵⁹ Ia e maqa leqa ga ni lao vata a odru i tu'utu'u. ⁶⁰ Sa qai tu cadra i na odra mata a bete levu qa tarogi Jisu, "O na maqa li i ni vosa mai? Na vuu ni tu'utu'u e dru sa beitai ni io ina o odru ai?" ⁶¹ Ia e va di rorogo ga qa ni tove'e e tila a a. Sa qai taragi eya leqa a bete levu, O io bea a Karisito, a Luuci Eya sa ona a varo'oro'o?" ⁶² "Sa i Au ga" saumia o Jisu, "Dou na qa igavia a Luve ni Tama ni sa no tu i na liga i matau i Eya sa Kaukauwa, ni sa lao leqa ga mai i na vi o ni lomalagi." ⁶³ Sa qai basirainia a ona i sulu a bele levu. qa aya, "A cava me guti leqa ina eso ai va dinadina?" ⁶⁴ Dou sa rogo ni sa vasa vacacatainia a Kalou, e cava a o naidou nanuma? Dra sa qai beitaini eya taucoo ni sa dodonu me mate. ⁶⁵ Dra sa qai teiva e so medra welutainia qa vesu ia a ona mata, qa usolainia, qa dra aya, "Aya mai!" Dra sa qai di eya a ovisa qa motulainia. ⁶⁶ Na gauna ma sa notu ina o Pita i ra i na rara ni vale, sa qai lao mai e dua a gone yelewa dau ni viqaravi ni betelev ⁶⁷ Ni sa igavi Pita ni vatitalavi na, sa vadievi eya va re. Sa qai aya, "O io leqa ga ma notu vata ei Jisu a ai Nasareci" ⁶⁸ Sa qai cai qa aya, "Au maqa ni ila rawa a cava o aya no," sa qai lai tuba i na salevu e curu mai. ⁶⁹ Ni sa igavi eya ina o oya a goneyatewa ana, sa qai aya leqa ve edra ma tu cae tu ina, "I ai e dua veedra" ⁷⁰ Qai caitainia leqa o oya. Va lailai ga o odra ma tucae tu volea ina dra sa qai aya vei Pita, "E dina sara ga o io e dua ve edra, baleta o io a ai Kalili." ⁷¹ Sa qai teivu o oya me vosa udruudru qa bubului ve edra qa aya. "Au maqa ni ila a tamata ai o aya no vei au" ⁷² Sa qai tagi leqa va rua a toa. Sa qai nanumia mai o Pita a vosa i Jisu ni ma aya ve eya. "Ni bere ni tagi varua a toa o na caitaini au va tolu." Sa tagi o oya qa mamaeueu valevu sara.