¹ A sa cavuti mai ene o oya, a lao i na yasayasa va Jiutia na tal adua ni Joritani: a dra sa lewe vuqa sa soqoni vata leqa ve'eya, a sa vavulici edra leqa o'oya me vaa a onai valavala. ² A sa lao mai ve'eya o o'dra a Farisi, a tarogia, E tara ve eya a tagane me dainia a watina se maqa? A ni dra sa vatovolei oya. ³ A sa vosa oya a tovelee ve'edra, A sava sa varota vei emudou o Mosese? ⁴ A dra sa aya "Sa vosotia ga o Mosese me vola mai ai vola ni veidai, a sa dainia tani. ⁵ Sa qai vosa o Jisu, a tovelee ve edra, E na vuu ni omudou yalokaukauwa sa vola ve'emudou o'oya a vunau ari. ⁶ Ia ena i vativu ni veia ea buli, sa buli edra a ALOU me tila a tagane, a tila a yalewa. ⁷ Ena vuu ni a ai ena dainia a tamana ei a tinana a tagane, a abita a waitina. ⁸ ia o'odru edru na lewe tila ga, edru sa na maqa ni lewe rua. Edru sa lewe tila ga. ⁹ Ia a sa vauca vata a ALOU, me ua ni tawaseya a tamata. ¹⁰ Ua mai vale edra tarogi oya leqa a ona tisaipeli, ena veia ve a na. ¹¹ A sa tovelee ve edra o'oya, o'oya a tila sa dainia a watina, a lai veiwatini ei na tila tani, sa dau-yalewa. ¹² E sa dainia a watina a yalewa, a lai veiwatini ena tila tani, sa dautagane. ¹³ Adra sa dia mai ve'eya eso a dria dria' lailai me tarai edra o'oya: a sa vunauci edra o odra ma dia mai o o'dra a tisaipeli. ¹⁴ Ia ni sa igavia o Jisu, A sa civo o oya a sa aya ve'edra, Dou laivi edra a driadria me dra lao mai vei au, mo dou uwa ni tarovi edra: ni sa wili medra lewe ni matanitu ni ALOU. ¹⁵ Au sa aya vaaidina ve emudou, O oya ena maqa ni vabauta a matanitu ni ALOU: me vaa a driadria lailai ena maqa sara ni rusu ina. ¹⁶ A sa rogoti edra, a tabai edra e na ona liga, a vosa vaalougatataini edra. ¹⁷ Ia ni sa lao waqe o'oya e na salevu, sa ovu mai e tila, a teidruru ve'eya a tarogi eya, vavuvuli re, a sava meu velee me'u rawatia ina a bula Tawa mudu? ¹⁸ A sa aya ve'eya o Jisu, O sa vatokai au me'u are ena vuu ni sava? Sa maqa ni tila tani e are, a ALOU tilatila ga. ¹⁹ O sa ila a i vunau, Uwa ni ia veibutaoci, uwa ni laba, uwa ni butao, Uwa ni veibeitai vaseni, uwa ni oco oco, vaaroorootaini edru a tamamu ei a tinamu. ²⁰ Sa qai vosa o'oya a tovelee ve'eya, Vavuvuli, a vei a taucoko ai au sa vabautia niu a se driadria a yacovia mai a siga ai. ²¹ A sa vagavi eya o Jisu, A sa lomana, a sa tovelee ve'eya, E tila a a, sa maqa vei io: mo lao, mo volitainia a a taucoo sa no tu vei io, a solia ve'edra sa dravudravua, o na qai vaiyau mai Lomalagi: ia mo lao mai, a muri au. ²² A sa vaveveu mata ena vuu ni vosa a na, a sa lao tani, a sa rarawa a lomana, ni sa levu a o na i yau. ²³ A sa vei igayai o Jisu, a sa tovelee ve'edra a ona tisaipeli, E dredre sara ve'edra vutuniyau me rusu i na matanitu ni ALOU? ²⁴ Adra sa redeucala, o odra a tisaipeli e na ona vosa. Sa qai vosa leqa o Jisu, a tovelee ve'edra. Radria, e dredre sara ve'edra, sa varavara enai yau me na rusu i na matanitu ni ALOU. ²⁵ Sa rawarawa me rusu a mata ni cula a Kameli, sa dredra ve'eya a tamata vutuniyau me rusu i na matanitu ni ALOU. ²⁶ Adra sa redeucala valevu sara, A tovelee ve'eya, O sei ena qai vabulai rawa? ²⁷ A sa vaigavi edra o Jisu, a tovelee, Sa dredre sara ve'edra a tamata, ia sa maqa ga ve'eya a ALOU,; ni sa rawarawa ve'eya ALOU a ve a taucoo ga. ²⁸ Sa qai vateivu o Pita me tovelee veieya, Miau igavia eitou sa dainia a a taucoo, ga a muri emiau. ²⁹ Sa qai vosa o Jisu, a tovelee, Au sa tovelee vaidiria ve emudou, Sa maqa ni tila tamata sa dainia a vale, se a tasina, se ganena, se tamana, se tinana, se luvena, se vanua, ena vuuqu, ei na vuu ni tuutuu re; ³⁰ Me qai maqa ni Saumi, ena rawatia yadrau ena bula ai, a veivale, ei a veitasini, eia ganena, ei a tinana, ei a luvena, ei na vanua, ei na veivacacani leqa ga, ia ena gauna na bula tawa mudu. ³¹ Ia o'odra a lewe vuqa sa matai edra na mrui, ei edra leqa ga sa muri, edra na matai. ³² Adra sa lao ga ena salevu ni ra sa lao i Jeruisalemi; a sa liu taini edra o Jisu: a dra sa idacala, a ni dra sa muri voli, edra sa rere. A sa di edru leqa a le tiniarua, a vateivu me tovelee ve'edra a a ena yaco ve'eya. ³³ A sa tovelee, Igavia, eda sa lao cadra i Jeruisalemi, a sa na soli waqe a luveni tamata ve edra, a bete levu, ei edra a vunivola, adra na lewai oya me mate, a dra sa soli oya ve edra a veimatanitu tani. ³⁴ Adra na valialiyai oya a vasaolaini oya, a welusia, a vamatea: ena qai tu cadra mai o'oya ena i atolu ni siga. ³⁵ A sa lao mai ve'eya o Jemesa ei Joni, o dru a luvei Sepete, a aya, Vavuvuli, eirua sa retia mo miau velee vei eirua a eirua a erea. ³⁶ A sa tovelee ve edru o o'ya. A sava mudru sa retia me'u velee ve emudrua? ³⁷ Adru sa tovelee ve eya, Mi'au solia vei eirua, Me eirua no tu e na omi au uuuu, E tila ena miau liga matau, a tila e na omi 'au liga mawi. ³⁸ Sa ai tovelee ve edru a Jisu. Mudru sa maqa ni ila a a drau sa erea: drau sa rawatia bea mu'dru somia a bilo au sa somia? Mudru papitaisotai ena papitaiso au papitaisotai ina: ³⁹ odru edru sa tovelee ve'eya, Eirua sa rawatia, sa qai tovelee ve'edru a Jisu, Mudru na somia dina a bilo au na somia, Mudru na papitaisotai leqa ga ena papitaiso au wa papilaisotai ina: ⁴⁰ I ame no tu ena oqu liga matau, ei na oqu liga mawi sa maqa ni oqu me'u solia vailoa, ve edra sa varautai me odra. ⁴¹ Ia ni dra sa rogo o'odra a lewe tini edra sa civoti sara vei Jemesa ei Joni. ⁴² A sa tarogi edra mai o Jisu, a tovelee ve'edra, Dou sa ila, ni dra sa lewai edra a veimatainitu o'dra edra sa aitai me odra turaga, a sa veitalia ve'edra o'odra a odra qaqa. ⁴³ Is sa maqa ni ve ana ve emudou, ia ena omudou tamata ga o'oya ve emudou sa viavialevu, ⁴⁴ Ena omudou tamata wale o'oya ve emudou sa mata-mata turaga. ⁴⁵ Ni sa maqa ni lao mai a Luve ni tamata me qaravi, me dauniveiqaravi ga, a me na solia a nona bula me edrai voli a lewe vuqa. ⁴⁶ Adra sa yaco i Jeriko: ia ni dra sa lao tani e Jeriko o oya a ona tisaipeli ei edra a lewe vuqa, sara, sa no tu ena tutu-ni-salevu me ereere o Patimeo a mataboo, a luvei Timeo ⁴⁷ Ia ni sa rogo o'oya ni sai Jisu a ai Nasareci, sa vateivu me taro a tovelee, I Jisu a luvei Tevita, mi au lomani au mai. ⁴⁸ Adra sa lewe vuqa edra vunauci o'ya me dra varorogo: A sa qai taro ena domoilevu, ina o'oya. I Jisu a luvei Tevita, mo mi au lomani au mai. ⁴⁹ Sa qai tu vatila o Jisu, A sa tovelee me tarogi mai Adra sa qai taroga a tamata mataboo, a'dra sa tovelee ve'eya, Mo vacegu, tu cadra; sa tarogi io o'oya. ⁵⁰ A sa dainia a onai vulaqeti o'oya, a tu cadra, a lao vei Jisu. ⁵¹ A sa vosa o Jisu, a tovelee ve'eya A sava o sa retia meu na velee vei io? A sa tovelee ve'eya a tamata mataboo, Oi emi au a Turaga me'u iga rawa. ⁵² A sa tovelee ve'eya o Jisu, Mo lao ga; sa vabulai io a omu vabauta, A sa iga rawa sara o'oya, a sa muri Jisu e salevu.