¹ Ena gauna oya sa aitai waqe ina a lewa i Sisa Akusito, me volai a lewe ni vunau taucoo. ² Sa vaoti mada ai vola ai ni sa Kovana mai Siria o Kirinio. ³ A dra sa dui lao taucoo a tamata me dra volai, o odra yadua ina ona oro. ⁴ Sa lao cae leqa ga o Josefa i Kalili mai na oro o Nasareci, i Jutia i na oro i Tevita, a yacana o Peciliema ni sa mataqali vata ei Tevita, a sa tubu mai vei oya. ⁵ Me volai ei Meri o oya sa musu vei oya me watina, sa buete no. ⁶ Ia ni dru sa notu mai ene, sa yaco a ona siga me vasuku ina. ⁷ A sa vasucumia a ona ulumatua a gonetagane, a sa vivirainici vei oya ai sulu ni gone, qa vaotoria na odra iina a manumanu, ni sa maqa ni tii ni bure me odru. ⁸ A sa so a varawa ni Sipi e na vanua ana, e dra sa notu mai na vanua veico, dra sa veivue me vatawa a sipi ni bogi. ⁹ Qa gavia, so dua a agilosi ni Turaga sa iga mai vei odra, a sa cila wavovoliti odra nai u'uu'u ni Turaga, dra sa rere valevu. ¹⁰ A sa aya vei odra a agilosi, dou ua ni rere gavia, au sa dia mai vei emudou e dua ai tuutuu re mo dou marau valevu ina, ei odra taucoo ga a tamata. ¹¹ Ni sa sucu vei emudou a siga ni ua, e na oro i Teviito, ai vabula o oya a Karisito a Turaga. ¹² Ia ai a enai vatailaila vei emudou, dou na une a gone sa lolai tu vei oya ai sulu ni gone, e sa oto ena odra tiina a manumanu. ¹³ A dra sa lewe levu a ai lomalagi, edra sa notu vasauri vata aya a agilosi, dra vavinavinaatainia a Alou, qa aqa. ¹⁴ Sa ona a Alou a varovaro e na veiyasana i cae sara! A sa vaare tai rawa o odra i vuravura sa lomani o odra a tamata. ¹⁵ Ia ni sa lao tani mai vei odra a agilosi ni lomalagi, dra sa qai aya vei odra oya vatawa ni sipi, me datou mai lao i Peceliema me gavia a aveai ni sa qai yaco, o oya sa vataila mai vei edatou Turaga. ¹⁶ A dra sa lao vatotolo waqe, dra sa igavi Meri, ei Josefa, ei na gone oya sa oto no na tiina odra a manumanu. ¹⁷ Ia ni sa gavia, edra sa aya qaqe a vosa ni vuu wei oya a gone ai. ¹⁸ A dra urabui taucoo ga edra sa rogoca a veia sa aitai vei odra a votawa ni sipi. ¹⁹ A sa tari a vosa toucoo ga ai o Meri, sa vananumia ina e lomana. ²⁰ Ia o odra a vatawa ni sipi dra sa lesu leqa, dra sa vavinavinaatainia qa doa a Alou e na vuu ni atoucoo ga dra sa rogo qa gavia, me tauvata sa aitai oti vei odra. ²¹ Ni sa oti a bogi walu, me qai cilivi nina a gonei sa vatoai a yacana me o Jisu, me tauvata ga na ona vatoa yaca tainia odra agilosi ni sa bera ni uneunetai. ²² Ia ni sa oti a veisiga ni vasavasavataio i tinana me tauvata ai vunau i Mosese, edru sa di oya i Jerusalemi, me caboria i na Turaga. ²³ Me tauvata ni sa volai e na vurau ni Turaga. A gonetagane taucoo sa lulumatia me vatoai me tabu me wei Jiova. ²⁴ Me dru vacaboria leqa ga ai soro me tauvata sa aya a vunau ni Turaga. Me rua a soqe, se rua a luve ni ruve. ²⁵ Sa qai gavia sa dua a tamata mai Jerusalemi, o Simioni a ona yaca ia sa yalododonu qa dau lotu a tamata ai, a sa warainia a odra vacegui a Isireli ni sa notu vei oya a Yalo Tabu. ²⁶ A sa vataila oti veioya a Yalo Tabu ni sa maqa moda ni mate ena une i mada a Karisito ni Turaga. ²⁷ A sa vavuna a Yalo Tabu na ona lao i vale ni soro. Ia ni dru sa dia mai a gone o Jisu o odra a ona qase me caa vei oya me tauvata ai vunau. ²⁸ Sa qai raqotia cae o oya qa vavinavinaatainia a Alou qa aya. ²⁹ Emuni a Turaga, o qai biutia omu tamata me qai lao, E na vacegu me tauvata a omu vosa. ³⁰ Ni qai gavia a oqu mata na vu ni bula mai veiemuni ³¹ Io o oya o sa varautainia e na matadra taucoo a tamata. ³² A rarama me vararamatai odra a matanitu tani, me odrai u'uu'u leqa ga a omu tamata a Isireli. ³³ A dru sa urabui o Josefa ei na tinana e na vuu ni vei a sa aitai e na vuuna. ³⁴ A sa vosavadougatatai odru o Simioni, a sa aya vei Meri a tinara, gavia o oya ai sa viritoa me bale sobu ina, se tu cae ina e lewe levu vei edra ai Isireli qa mei vatailaila ena vosavaacacatai. ³⁵ Me varairaitai ina a nanuma ni yalodra odra lewe levu, ia ena laubasia na yalomu leqa ga nai seleiwau. ³⁶ A sa dua a parofita yalewa, a Ana, a luve i Fanueli, e na mataqali i Aseri sa levu sara a ona yabai, sa goneyalewa ni sa vanati, a sa bula vata ei watina qa yabai vitu. ³⁷ sa qai yada, ka walusagavulu a va a ena yabai. A sa maqa ni lao tani e na vale ni soro, a sa dau lolo qa masu ena siga ei na bogi. ³⁸ A sa lao mai o oya e na tii ni siga oya, a sa vavinavinaatainia leqa ga a Turaga, a sa vosa tai oya vei odra taucoo ga dra so notu mai Jerusalemi dra warainia a vaabula. ³⁹ Ia ni dru sa velee oti a autaucoo ga me taurata a vurau ni Turaga, e dratou sa lesu tale i Kalili i na dratou oro a Nasareci. ⁴⁰ A sa tubu cae a gone, a sa yalomatua mai, sa sinai e na vuu, a sa tu vei oya a loloma ni Alou. ⁴¹ A dru sa lao a ona qase ena veiyabai i Jerusalemi i na ona vata ni lao sivia. ⁴² Ia ni sa qai tiniarua a ona yabai e dru sa lao i Jerusalemi, me tauvata ai valavala ni ona vata. ⁴³ Ia ni dru sa vaotia a veisiga qa dru sa lesu leqa, sa notu ga a gone i Jisu mai Jerusalemi qa dru sa maqa ni ila o Josefa ei tinana. ⁴⁴ A dru sa nanuma sa notu o oya ei odra sa lao tu, e dru sa lao ga na dua siga qa bogi qa dru sa vaunei oya vei odra a ai odra ei odra veiilai ei edru. ⁴⁵ Ia ni dru sa maqa ni ure, edru sa lesu leqa i Jerusalemi, qa vaunei oya ina. ⁴⁶ Sa oi e tolu a bogi, dru sa qai unei oya na vale ni soro, ni sa notu ena odra maliwa ai vavuvuli, qa rogoci odra no, qa taro leqa ga vei odra. ⁴⁷ A so urabui o odra taucoo sa rogo ena ana vuu ei na ona vosa. ⁴⁸ Ia ni dru sa gavia, edru sa urabui, a sa aya vei oya o tinana, na luvequ o ai valavala ve oi vei edru e na vuu ni cava? Gana, eirua ei tamamu eirua sa vaunei io sa qa sa rarawa no. ⁴⁹ A sa qai oya vei odru o oya e na cava mudu sa vaunei au ina? Mudru sa maqa bea ni ila ni sa iliili vei au meu roto ga e na vale i Tamaqu? ⁵⁰ A dru sa maqa ni ila ai balebale ni vosa e sa aya vei edru. ⁵¹ A sa lao sobu vata ei edru o oya, a sa yaco i Nasareci, a sa talairawarawa vei odru a sa maroro o tinana a vosa taucoo ai qa lomania. ⁵² A sa tubu cae o Jisu e na vuu ei na yagona leqaga a sa guti oya valevu cae na ga a Alou ei odra leqa ga a tamata.