¹ Ni dra sa lelevu dra sa bolea me dra varautainia ai tu'utu'u ni veia sa vadinati deivai sara vei eda. ² Me tauvata odra sa aaya vei eda o odra sa gavia na odra mata qa sa qaravia a vosa mai nai vateivu. ³ Sa are leqa ga vei au niu sa vatarogia matua sara a autaucoo mai na vateivu meu vaduiduitainia e nai vola vei emuau Ceofilo a turaga dina ⁴ Mo ila ina a ena dina ni vei a o sa vatavulici ina. ⁵ E na gauna sas tui Jutia ina o Eroti sa dua a bete o Sakaraia a ona yaca e na matebete i Epaia, a sa watina e dua vei edra a luvei Erori, o Ilisapeci a yacana. ⁶ A dru sa dodo nu ruarua na matani Alou, e dur sa muria taucoo ni varo ni Turaga, qa maqa ni cala. ⁷ A sa maqa luvedru, ni sa yava o Ilisapeci, a dur sa qase ruarua. ⁸ A sa yaco, ni sa velee no ga ora caacaa va bete e na mata ni Alou ena vou ni ona matabete. ⁹ Me tauvata a valavala ni caacaa vabete sa orai tavi me vayavunia a, a boi re ni sa curu i na vale - ni-soro ni Turaga. ¹⁰ Ia o odra taucoo a tamata dra sa lelevu dra sa tu i tuba qa masu ni sa yavu no a, a boi re. ¹¹ A sa igavi o e dua a agilosi ni Turaga, sa tu e na yasana i matau ni cabocabo ni a boi re. ¹² Ia ni sa igavia o Sakaraia sa idacola, a sa curumi oya a rere. ¹³ Sa aya vei oya a agilosi, ua ni rere, Sakaraia, sa rogoci a omu masu, qa na vasucumia e dua a luvemu-togane o Ilisapeci a watimu, ia mo vayacani oya vei Joni. ¹⁴ Ia ona marau ina, ena lelevu leqa ga dra na marau ina, ena lelevu leqa ga dra na marau ina na ona sucu. ¹⁵ Ni na levu o oya ena mata ni Turaga qa na maqa ni somi waini se yacona, ena vasinaiti leqa ga na Yalo Tabu mai na ete i tirona. ¹⁶ Ia na lelevu vei edra a luvei Isireli ena soumainia mai o oya ina Turaga a odra Alou. ¹⁷ Ia ena liutaini oya ena yalai Ilaijia ei na ona kaukauwa, me saumaa a lomadra a qose vei odra a gone, ei na talai dredre ina odra vuu ei na yalododonu, me varautainia a tomata me qai ona a Turaga. ¹⁸ A sa aya vei oya a agilosi o Sakaraia. A cava meu ila ina a, aveai: ni'u sa qase sa levu sara a yabai i watiqu. ¹⁹ A sa vosa a agilosi qa aya vei oya, oi au o Keperieli, au sa dautu ena mata ni Alou, ia au sa talai mai meu mai vosa vei io, qa aya vei io ai tu'utu'u re ai. ²⁰ Qa gavia, ona varorogo ga, ona maqa ni vosa rawa, me yaco mada na siga ena vayacori ina a ataucoo ai, ni o na maqa ni vadinatia a oqu vosaio oya na vayacori ga e na ena gauna. ²¹ A dra sa warai Sakaraia o odra a tamata, a dra idacala ni sa yawa o oya ina vale ni soro. ²² Ia ni sa curu mai o oya sa maqa ni vosa rawa vei odra, a dra sa qai ila ni sa gavia o oya e dua a raivotu ena vale ni soro, ia ni sa vatabataba o oya qa varorogo voli ga. ²³ Ni sa oti a gauna ni ona caacaa sa lao tani ina ona vale. ²⁴ A sa oti a veisiga oya sa uneunetai a watina o Ilisopeci a sa vunitai oya qa vula lima qa aya. ²⁵ Sa valavala vei au vei au a Turaga ena siga sa raita ina o oya, me diatani a au a rogo ina vei odra a tamata. ²⁶ Ia enai aona ni vula sa talai a agilosi o Keperieli mai vei oya a Alou, ina dua oro mai Kalili, a yacona o Nasareci. ²⁷ Vei oya e dua gone yalewa sa musu vei oya edua aganeyacana o Josefa ena mataqali i Tevita, ia a yaca ni goneyalewa o Meri. ²⁸ A sa lao mai vei oya a agilosi qa oya, sa loloma, o io sa dau lomani! Sa notu vei io a Turaga, o sa Alougatavalevu vei odra a yalewa tani. ²⁹ Ia o oya sa idacala ena ona vosa, Sa vanananu i lomana se vala bea vacava ai valavala ni veidavai weai. ³⁰ A sa qai oya vei oya a agilosi, ua ni rere, Meri: ni ni o sa une a loloma vei oya Alou. ³¹ Po gavia o na uneune, o na vasucuma leqa ga e dua a gonetagane ia mo vauacania me yacana o Jisu. ³² Ena levu ana, a na vatoai a luve i oya sa cecere sara ia a Turaga a Alou ena solia vei oya e dua ai nono vaturaga wei tamana o Tevita. ³³ Ia na lewa o oya a mataqali i Jekope qa maqa ni mudu, ena maqa leqa ga ni oti a ona matanitu. ³⁴ Sa qai aya veioya agilosi o Meri, ena yaco bea vacava a veaai, ni'u sa maqa ni veiyacovi ei dua tagane. ³⁵ A sa vosa a agilosi qa aya vei oya, Ena lao sobu mai vei io a Yalo Tabu ena varurugi ia leqa ga a kakauwa ni Alou i oya sa cecere sara ia o oya ena sucu mai vei io ena vatoai me atabu ni Luve ni Alou. ³⁶ Qai gavia a douvemu o Ilisapeci, sa uneunetainia leqa ga e dua a gonetagane, ni sa qase, io ai sa aona ni ana vula, o oya sa vatoai me yava. ³⁷ Ni sa maqa ni dredre vei oya a Alou e dua a. ³⁸ Sa qai aya o Meri, gavia a vada ni Turaga me yaco ga vei au me tauvata ga a omu vosa. A sa lao tani mai a agilosi mai vei oya. ³⁹ A sa aya o Meri ena gauna ana qa lao vatatolo i colo, i na dua a oro ni Jutia. ⁴⁰ A sa curu ina vale i Sakaraia a sa veiidavai ei Ilisapeci. ⁴¹ Ia ni sa rogo o Ilisapeci a vosa ni veiidavai wei Meri, sa lade i etena a gone, a sa vasinaiti o Ilisapeci e na Yalo Tabu. ⁴² A sa ela cae ana domo qa aya o sa alougata valevu vei edra a yalewa tani, a sa Alougata a vua ni etemu. ⁴³ A sa va evei a aai vei au, ni sa lao mai vei au a Tinona a oqu Turaga. ⁴⁴ Gavia ni sa rogo e dua qu taliga a omu vosa ni vei'idavai, sa lade ena marau a gone i na oqu ete. ⁴⁵ A sa Alougata o oya sa vadinata ni sa vayacori ni sa aitai vei oya mai vei oya a Turaga. ⁴⁶ A sa aya o Meri, sa vamalua vei oya Turaga a Yaloqu ⁴⁷ A sa marau qu yalo vei oya a Alou a oqui vabula. ⁴⁸ Ni sa lomania a ona vada ni sa dravudravua- qa gavia mai na gauna ai ena aya a tabatamata taucoo ni sa Alougata. ⁴⁹ Ni sa velee a alevu eso vei au o oya sa qaqa, io sa doai a ona yaca. ⁵⁰ A sa tu a ona loloma vei odra sa rerevai oya qa yacovia a tabutamata levu. ⁵¹ Sakaukauma a caacaa ni ligana, sa dui vasesei odra a via'vi'alevu oya ena vu'u ni nanuma ni yalodra. ⁵² Sa va siromi odra a kaukauma mai na odrai nono, a sa vaceceretai odra a tamata lailai. ⁵³ Sa vamaumautai odra edra sa mata ana ena are, a sa vatalai edra sa vutuniyau. ⁵⁴ Sa vuei odra tamata a Isireli, ni sa vananuma a loloma. ⁵⁵ Me tauvata a vosa vei odra eda qose vei Eparama, ei na ona awa sa maqa ni mudu. ⁵⁶ A sa notu vota aya o Meri a vula tolu bea, a sa qai lesu i rora vale. ⁵⁷ Ni sa yaco a siga i Ilisapeci me vasucu ina; qa vasucumia o oya e dua a gone tagane, ⁵⁸ Dra sa qai rogo o odra sa notu volea ve eya, ei edra a dauvena, ni sa lomani oya valevu a Turaga; qa dra marau tainia vata. ⁵⁹ Ia ina i a walu ni siga, dra sa qai lao mai me dra mai cilivi a gone; dra sa qai vayacani oya me o Sakaraia, me dru vei yacani ga ei tamana. ⁶⁰ Sa qai aya o Tinana, Me uwa; sa na ono yaca ga o Joni ⁶¹ Dra sa qai aya ve yea, sa maqa a weamu ni sa vayaca ina ina yaca ai. ⁶² Dra sa qai velee e dua ai vata ilaila vei tamana, se cava e gutia o oya, me yaca i luvena. ⁶³ Sa qai ere o oya e dua a papa ni volavola, dra sa qai ura bui taucoo, "Ni sa ona yaca ga o Joni." ⁶⁴ Sa qai serei a ona meme ei na ona gusu, sa qai vosa qa varooroo tainia a Alou. ⁶⁵ E dra sa rere o odra e dra no wavoliti edra, ni sa ai tai waqe a vosa tauco ai, i na coio taucoo va Jutia. ⁶⁶ E dra sa tugania ina odra lovaga a vei a edra sa rogo, qa dra sa aya. E na ena i vei bea ai valavala ni gone ai? Ni sa notu vata ei na liga ni Turaga. ⁶⁷ Sa qai vasinaiti ina Yalo Tabu o Sakaraia a tamana, sa qai parofisai mai, qa aya. ⁶⁸ Me varo'orootai a Turaga a Alou ni Isireli; Ni sa lao mai vei edra a ona tamata, qa vabulai edra. ⁶⁹ Sa qai vatuburia cae vei eda e dua a veivabulai sa tautauvata a kaukomea, Ina mataqali i Tevita a ona tamata; ⁷⁰ Me tautau vata a a sa aya o oya na odra gusu a ona parofita tabu mai na i vateivu ei vuravura. ⁷¹ A veivabulai mai na oda meca, mai na odra liga tauco leqa ga e dra sa cati eda. ⁷² Me vayacori a yalo loloma vei edra a oda qase, Me dra nanumia lewa ga a ona veiyalayalati tabu. ⁷³ A bubului sa bubului ina o oya vei Eparama a tamada. ⁷⁴ Me solia mai vei eda, me da vabulai mai na o dra liga a oda meca, qa qaravi oya, qa maqa ni rere. ⁷⁵ Ina yalosavasava ei na caa dodonu i na ona mata, i na veisiga taucoo ni oda bula. ⁷⁶ Ia o odra a gone, dra sa va toai me dra Farofita i oya sa cecere sara. Ni o na matai ve eya a turoga me caramainia a o na gauni sala. ⁷⁷ Me vatailai vei edra a tamata a, a me dra bula ina, Ni sa vooci a odra i valavala ca. ⁷⁸ Ina vuu ni ona loloma levu a oda Alou, sa ida mai ina vei eda a rarama mai cae, ⁷⁹ me vararamatai edra sa iloilo ei na yaloyalo ni mate, qa me tuberia a ona la ina gaunisala ni vei lomani. ⁸⁰ Dra sa qai tubucae a gone, sa yalomatua sara, sa notu i loma ni vei acu me yaco mada a ona siga me varairai ina vei edra a Isireli.