¹ Dra sa qai lao tauco mai ve eya o odra o dau soqonia ai vacavacava ei edra a tamata i valavala ca me dra mai varorogo vei Jisu. ² Dra sa vosa udruudru o odra Farisi ei edra a vunivola qa dra aya. "A tamata ai e viwalei ei edra a tamata i valavala ca, qa ana vata ga leqa ei edra." ³ Sa qai aga a vosa vatautauva ai ve edra, qa aya, ⁴ "O cei ve emudou, e notu e dua drau a ona sipi, qa reva e dua ve edra, e na maqa lii ni dainia tu a ciwa saga vulu a ciwa i vicoco qa lai vaigaoi eya e leva me yacovia ni sa igavia? ⁵ Ia ni sa igaoia sa na marau qa colatia mai ina ona tabataba. ⁶ Ni sa yaco mai i vale, sa na qai tarogi edra taucoo a weana, ei a lewe ni oro, qa oya ve edra, tou mai marau tainia vata a oqu sipi, ma sa reva qa sa qai igavi leqa. ⁷ Au sa aya ina ve emudou, e na marau valevu a lomalogi ina vuu ni dua walega a tamata i valavala ca ni sa vei vutuni, mai na le ciwa sagavulu a ciwa a tamata i valavala doodonu e maqa ni yaga ve edra a vei vutuni. ⁸ Se ocei a marama e notu ve eya e tini a tii ni Siliva, e sa varevania e dua tii ni siliva, e na maqa li ni va reania a cina, qa tavirainia a vale me vacacare vamatai laki me yacara ni sa igavia? ⁹ Na gauna sa ina, sa qai tarogi e dra taucoo a weana, ei edra a lewe ni oro qa aya, tou mai marau tainia niu sa igavia a oqu tii ni siliva ma sa reva qau sa igavia leqa! ¹⁰ Ena ga leqa ina, Au sa aya ve emudou, ena tubu valeoua marau i na o dra mata a Agilosi ni Alou, i na vuu ni dua wale ga a tamata i valavala ca sa veivutuni. ¹¹ Sa qai aya o Jisu. E dua a tamata e dru le rua a luvena tagane. ¹² Sa aya vei tamana o oya a gone "Tamaqu, solia mai vei au e dua ai wase ni yau o sa wase tu me oqu! Sa qai dui wase ve edru." ¹³ Sa oti e vica a siga, sa qai soqonia vata a a tauco a oya a gone, sa qai lao tani sara ina dua vanua voyawa, qa lai vayaga tainia ina a ona i you ina i valavala varou ca. ¹⁴ Ia ni sa vaotia taucoo, sa qai yaco mai e dua a dau siga levu i na vanua ana; sa qai dravudravu sara o oya. ¹⁵ Sa qai lai notu vei dua a lewe ni vanua e ne; sa qai dau talai oya me lao na ona were me lai vaani edra a vuaa, ¹⁶ sa qai dau gutia me ania a magiti e dra dau ania a vuaa, me sinai ina a ona ete; ni sa maqa ni dua e vaani oya. ¹⁷ Na gauna sa i lai yalona mai leqa mai ina, sa qai aya, sa levu a tamata oi tamaqu sa voli a odra caacaa, qa sa sinai a odra ete na madrai qa dra sa votu tu, io a au, au sa mate wale na mataana. ¹⁸ au na ia, qa lesu vei tamaqu, qau na aya ve eya, "Tamaqu, au sai valavala ca i lomalagi qa veio leqa ga. ¹⁹ sa maqa ina ni yaga meu vatoai meu luvemu: Wilii au meu tautau vata edua a omu tamata sa voli a ona caacaa. ²⁰ Sa oyi, qai lao vei tamana, Ni se yawa no waqe, sa igavi oya o yamana, qa sa lomania, qa ovu, qa nooti oya, qa yaboti oya. ²¹ Sa qai aya a luvena ve eya, ' Tamaqu, au sai valavala ca i lomalagi, qa ve io leqa ga, sa maqa ina ni yaga mo vatoai au leqa meu luvemu. ²² Sa qai aya ve edra a ona tamata caacaa o tamano. Dou dia mai a i sulu re, qa vai sulu tai oya ina qa daramainia a mama na ona ligo qa i vava na ona la. ²³ Dou dia mai e dua a luve ni bulu mokau qa vamate, me da ana qa marau; ²⁴ Ni sa mate a luvequ tagane, qa sa qai bula leqa. ²⁵ Ia a luvena ulumatua ma notu ina o dru i teitei; ni sa lao mai sa toso volea sara ivale, qa rogo a i vatagi ei na me e. ²⁶ Sa qai acivi dua ve edra a tamata caacaa qa tarogi oya a cava ai balebale ni a ai. ²⁷ Sa qai aya ve eya o oya a tamata caacaa, 'o tacimu sa lesu leqa mai vale, o tamamu sa vamate e dua a luve ni bulumakau baleta ni o oya sa lesu bula mai vale. ²⁸ Sa qai rarawa valevu o luvena ulumatua, qa maqa ni rawa ni curu i vale, sa qai curu mai tuba o tamana qa vamasuti oya. ²⁹ Sa qai vosa a luvena tagane qa aya vei tamana, "Igavia, ni vei yabai taucoo, au caacaa tu ga vei io, qau maqa bi bau talai dredre vei io; qo maqa ni bau solia wale vei au e dua a luve ni me, meu bau marau vata ina ei edra a oqu i toani. ³⁰ Ia ni sa yaca mai a luvemu tagane ai o oya sa vaotia a ona iyou vei edra a yalewa dau tagane, qo sa vamate e dua a luve ni bulumakau uro. ³¹ Sa qai aya ve eya o tamana, "Luvequ, o io o notu ga vata ei au, a a toucoo e tu vei e sa omu. ³² Ia e sa dodonu ga me da marau; ni sa mate a tacimu ai, sa reva, sa qai igavi leqa.