¹ O oya ai au masuti emudou ina oi au sa vesu tu ina vuu ni turaga mo dou ve lee no ai valavala sa iliili, ei nai tutu dou sa acivi ina. ² mo dou yalomalumalumu sara qa yalomalua, mo dou dau vosota qa veivosoti vai emudou i na loloma; ³ mo dou gumutua sara mo dou maroro a lomavata ni yalotabu, sa vauci vata ina vei vaaretai. ⁴ Sa dua vata ai soqosoqo lotu taucoo, qa dua bauga a yalo tabu, me tautauvata ni dou sa acivi i na i nuinui e dua bauga ni dou sa acivi. ⁵ sa dua bauga a turaga, sa dua bauga a vabauta, sa dua bauga a vei papitaisotai. ⁶ sa dua bauga a Alou ei na tamada taucoo sara, o oya sa lewa a a taucoo sara, qa sa curumia a a taucoo ga, qa notu ina lomamudou taucoo. ⁷ Ia sa soli vei edo yadua a lolooma me tautauvata ai varau ni solisoli oi Karisito. ⁸ Ni sa aya ina a ona vosa, ni sa lao cae o oya sa vabobulatai e dra a lewe vuqa me dra bobula, qa solia ai solisoli eso vei edra a tamata. ⁹ A cava ai balebale "Sa cava bea" sa ai ga ni sa lao sobu leqa ga i mada o oya ina yasa i vuravura ira? ¹⁰ O oya ga sa lao sobu mai sai oya leqa ga sa lao cae me yawa qa sitia tauco a lomalagi, ena qai rawa ni vaisinai tainia a a taucoo. ¹¹ A Karisito sa solia eso me dra i Apositolo, qa so me parofita, qa so me dauvunau, qa so mei talatala qa vavuvuli. ¹² me varautai ni edra a tamata ni Alou, na odra caacaa valotu, me tarai cae ina a yago i Karisito ¹³ me yacoviya ni sa yacovi e da taucoo a Nabauta, qa ila sara a luve ni Alou, a me da tautauva ei nai varau ni tamata dina edra sa sinai sara ei Karisito. ¹⁴ Sa qai buli eda cae a Karisito, me da uwa ni vagonegonea tu, qa veitosoyai qa vei di yaitu na cagi ei na uwa, ni vavuvuli, ei na lawai ca ni tamata, i na dauveivaqa seni sa sagai ina a veivacalai; ¹⁵ me da dau vosatainia a a dina, loloma me da tubucae vei oya ga a Uluda, sa i oya a Karisito. ¹⁶ A Karisito e bulia a yago taucoo, sa qai mai semasemai e dra vata, ni dra sa sema rawa, sa dra qai veivuei taucoo me dra caacaa vata, me rawa ni bulia cae vare a yago me rawa ni qai buli oya vai oya a loloma. ¹⁷ O oya au sa aya ina, mo varota matua ina vuu ni turaga, mo dou uwa ni valavala no me tautauvata ei edra a veimatanitutani, e na lomadra lialia, ¹⁸ ni sa iloilo a odra vaasama, qa maqa ni veisotari ei na bula sa lao mai vei oya a Alou, ina vuu ni lialia sa tu i na yalodra, qa sa kaukauwa a lomadra. ¹⁹ qa dra sa maqa ni madua rawa, ni dra sa soli edra ina caacaa vasisila, me dra velee a a taucoo ga sa tawasavasava ni dra sa dau garovia. ²⁰ I yana e maqa ni dou vulicia mai vei Karisito. ²¹ au ila ni dou sa rogo a veia me baleti oya, qa veia dou sa vatavulici ina, me tautauvata a dina sa tu vei Jisu. ²² O sa vatavulici mo dainiya tani a vei valavala ni bula i mada, qa dou dainiya tani a tamata maawa, o oya sa aca mai ina vuu ni gagadie ca sa dau veivaaisini; ²³ me dou vavoi mai ena yalomudou ei na lomamudou. ²⁴ qa modou vai sulu e na tamata vou, o, oya sa caa me tautau vata a Alou ei na yalododonu ei na yalosavasava. ²⁵ O oya ai mo dou dainia tani a seseni, qo vasatainia a a dina ve edra a tamata, ni o oda a veiu eani eda sa dua ga a yago. ²⁶ Nio sa civo me uwa ni vaivalavala ca tai ni io, me uwa ni dromu a mata ni siga qo se civo no ga. ²⁷ Uwa ni solia e dua a gauna ve eya a tevoro. ²⁸ O oya e dau butao me uwa ni dau vutao no, me daucaacaa ga, qa velee a caacaa e yaga na ona liga, me rawa ni rawatia e so a a, qa me wase vei edra a dravudravua. ²⁹ Me uwa ni lao mai na omu gusu e dua a vosa velavela, vasa tainia ga a vosa re, me rawa ni veilaveti cae, me yaco ina a are vei edra na rogo. ³⁰ Ia mo dou uwa ni vararawa tainia a yalotabu ni Alou, o oya mo dou na qai dregati ina, me yaco ma a siga ni bula. ³¹ Dainia tani a yaloca, a dau veiba ei na civocivo, ei na dau veivacacani ei na a tauco e maqa ni dodonu. ³² io dou veilomani vai emudou, dou lomare dou uwa ni dau veieivoti, dou dau veivosoti me tautauva a ona vosoti io Alou ina vuu i Karisito.