¹ Au mata vananumi emudou, a taciqu, na vosa ni Alou au vunautainia ve emudou, mo dou ciqomia qa dou tu dei ina. ² o oya dou sa vabulai mai ina, e mudou na tauriya dei a vosa ni Alou, au vunau tainia ve emudou, va vo mo mudou uwa ni va'awaletainiya a omudou vabauta. ³ Au wase i mada ve emudou a matai ni a bibi ma varaitai vei au, ni sa mate a KArisito ena vu'u ni oda i valavala ca me tautau vata sa aya ai volatabu. ⁴ ni sa bulu, qa tucae leqa nai a tolu ni siga ni sa ai ena i vola tabu. ⁵ A Karisito ma basia vei kifa, qai muri vei edru a lewe tiniarua. ⁶ Sa oti ana sa qai basia vei edra a vi weani e dra lewe lima a drau, e levu ve edra e su bula no ga, qa so edra sa moce lutu ga. ⁷ Oti sa qai basia ve Jemesa, qa basia leqa ve edra a Apositolo. ⁸ Qa ena i oti oit, sa qai basia vei au, na oqu ma sucu bere. ⁹ O au, au a lailai sara mai ve edra a Apositolo, e maqa ni ganiti au meu acivi meu Apositolo, au dau vararawa tai ni era ai Soqosoqo lotu. ¹⁰ Io, a loloma ga ni Alou sa yaco ina a oqu notu ni uwa. a ona yalo loloma vei au e maqa ni awale, au gumatua in a oqu caacaa mai ve edra tauco ga, io e maqa ni o au, a loloma wale ga ni Alou e notu vei au. ¹¹ O oya ai, e o au se o odra e a bibi ga me vunautai qa dou vabautia ¹² Ni sa vunautainia a Karisito ni sa tu cae mai na mate, qa so e dra aya ni maqa ni tu cae mai na mate? ¹³ E dra sa maqa ni tucae mai na mate, sa qai maqa ni tucae leqa mai a Karisito ¹⁴ E sa maqa ni tucae a KArisito, e na tamuyaga a omudou i vunau, e na maqa leqa ga ni yaga a omudou vabauta ¹⁵ Io, oi tou na i gavi ni tou mai senitainia ai tu'utu'u ni Alou, ni tou a mai aya ni o Karisito ma va tucae tani eya a Alou, e maqa ni tucae dina mai o oya, e maqa ni dra tucae mai o odra a mate. ¹⁶ E maqa ni tucae leqa o odra a mate, e na maqa ni tucae leqa a Karisito. ¹⁷ E maqa ni tucae leqa a KArisito, e na maumau wale a omu vabauta, qa dou vesui tuga i nai valavala ca ¹⁸ E dra na rusa leqa ga o odra sa oi KArisito, qa dra sa moce tu. ¹⁹ E da sa vanuinui me yaga vei eda a KArisito i na bulai ga ai, e da sa qai valoloma valevu cae vei edra tauco'o a tamata. ²⁰ Io, sa qai tucae leqa mai na mate o Karisito, qa sa yaco me edra i sevu sa moce tu. ²¹ Ni sa vuni mate a tamata, qa so vuni tu cae leqa mai na mate a tamata leqa ga. ²² Ni dra sa qai mate tauco'o ina vu'u i Atama, e dra na vabulai tauco'o ina vu'u i KArisito. ²³ Io eda na dui muria ga ai tuvatuva, o Karisito, sa ena i sevu, o odra sa wili vata ei Karisito, e dra na vabulai na ona lesu leqa mai. ²⁴ Na ena i vata oti oti, e na solia lesu leqa m matanitu ni Alou vei tamana, ni sa varusai tauco'o a lawa, ei na lewa tauco'o, eina Kaukauwa. ²⁵ E na qai yaco me vatulewa ni dra sa vamalumalumu tai tauco'o a ena meca me dra na tu ina vu'u ni ona la. ²⁶ A ena meca me qai varusai i muri, i yana o mate. ²⁷ Ni sa vamalumaluma tainia a a tauco'o ni sa tu na ona qeteqete ni la ira, ni sa qai aya, "ni sa dainiya a a tauco'o", sa qai matata mai ni maqa ni wili ina e dua sa vamalumalumu tai ni eya in a tutu ni ona la. ²⁸ Ni sa vamalumalumu tai oti ve oya a atauco'o, e na qai vamalumalumu tai ni eya leqa ga a luvena ve eya, me lewa ece ga a Alou a atauco'o. ²⁹ E sa maqa ni ve ai, qai ena i vei o odra sa papitaisotai ina vu'udra a mate? e dra sa maqa ni tucae leqa mai o odra a mate, qai cava edra papitaiso tai ina ina vu'udra a mate. ³⁰ Qa cava me itou bole leqa ga ina a mate ina vei yauwatauco'o. ³¹ Au sa aya dina sara niu sa marautai ni emudou a viweani ina vu'u i Karisito Jisu na oda turaga, niu sa mate no ina vei siga. ³² E sa vatamata a oqu vei vala ei e dra a manumanu dau ata mai Efeso, a cava a betena vei au, e dra sa maqa ni tuca'e leqa na mate. " Me do ana ga qa somi ni da na mate ni mata'a. ³³ Dou uwa ni va'aisini tai ni emudou vaiemudou "Aveitoani ei edra ai valavala lawai edra na vaboi ca tainia a are." ³⁴ Dou yadravia a bula dodonu, dou uwa ni valavala ca no, ni so i emudou e se maqa ni ila vare no a Alou, au vosa ve ai modou rawa ni madua ina. ³⁵ Io ena aya e dua, edra na tucae lea vacava o odra a mate, qa yago cava edra na lao mai ina. ³⁶ O io a lialia a a ona tea ena maqa ni bula cae mai, e sa maqa ni mate. ³⁷ Io a'a ona tea, o maqa ni tea ina yago, ena tubucae mai me Sila wale ga se witi se dua tani leqa a'a. ³⁸ A Alou ena Solia ina gau a'a e ganiti eyo, a sore ni tei tauco'o edra na dara mainia a gau vou ni sa bula cae mai ³⁹ E maqa ni tautauvata a lewe tauco'o; tautauvata-e notu a lewe ni tamata, qa dua tani a lewe ni manumanu yavai va, qa dua tani a lewe ni manumanu vua, qa dua tani a lewe ni ia. ⁴⁰ E notu a gau valomalagi, qa notu a gau va vuravura, qai u'u'u'u ni ni yago valomalagi e dua tani, qai u'u'u'u ni yago vavuravura e dua tani. ⁴¹ Sa dua tani ai u'u'u'u ni mata ni siga, ga dua tani au u'u'u'u ni vula, qa dua tani ai u'u'u'u ni Aloalo. E na dua tani leqa ai serau ena solia a Aloalo yadua. ⁴² Sa tautau vata leqa ga ina a tu ca'e mai na mate ni sa tei, qa sa vuca, qa vatucae tai leqa, qa maqa ni vuca. ⁴³ Ni sa tei sa vasisilatai; ni sa vatucae tai leqa, Sa vai u'u'u'u tai ni sa tei, sa malumalumu ni sa va tucae tai leqa sa kaukauwa. ⁴⁴ Ni sa tei sa yago dina vatamata, ni sa va tucae tai leqa, sa yago va yalo, e notu a gau dina vatamata qa notu a gau dina vayalo. ⁴⁵ Ni sa volai, a matai ni tamata o Atama ma soli v eya a gau vatamata A Atama ma qai muri mai sa yaco o oya me yalo sa solia a vivabulai. ⁴⁶ E maqa ni matai o oya sa vayalo, e matai o oya sa vayalo, e matai o oya sa vayago, sa qai taravia mai a a vayalo. ⁴⁷ A matai ni tamata ma buli mai na uvu ni somo, a i arua ni tamata a turaga, sa lao sobu mai lomalagi. ⁴⁸ Me tautauvata ei eya sa buli mai na uvu ni sosommo, e na tautauva leqa ga ina odra e dra uci eya; me tautauvata tai mo'oya sa lao sobu mai lomalagi, e dra tautauvata in a o odra sa uci oya. ⁴⁹ Ni sa tautauvata ei eya sa buli mai na uvu ni sosomo, me dra saga sara medra tautou vata ei eya sa lao mai lomalagi. ⁵⁰ Meu aya ve emudou a taaqu, sa dredre me curu ina matanitu valomalagi a lewe ei na dra, a gau vucavuca rawarawa ai, e na maqa ni bulibuli no qa maqa ni mudu. ⁵¹ Au na aya ve emudou a ena a vuni: E da na maqa ni moce taucoo, ia eda na vamataliatai taucoo. ⁵² E na vasauri sara ni na tautauvata a sauriva ni o da mata, ni sa tautau vata a ena uvi ai otioti ni ta vui, e na uvi a tavui, e na qai tucae leqa o odra a mate, e maqa ni ba uvi leqa, o da e da na vamataliatai leqa ga. ⁵³ Sa na vi sau a gau ai me uwa ni vuca leqa, qa visau a gau mate ai me ua ni mate rawa. ⁵⁴ Ni sa vavoni eii a gau vuca ai, me uwa leqa ni vuca rawa, sa na qai vavovui leqa a gau mate ai me uwa ni mate rawa e na qai ala ina a vosa sa volai a qaqa ni tucae leqa sa va oti vadua ina o mate. ⁵⁵ O io mate sai ivei a omu bati gaga? O io bulubulu sa i vei a omu gugumatua ⁵⁶ Sa ena bati gaga ni mate ai vala vala ca, qa sa lena kaukauwa ni valavala ca ai vunau. ⁵⁷ Io me vavinavinaatai ga a Alou ni solia ve eda a qaqa ena vu'u ni oda turaga o Jisu Karisito. ⁵⁸ O oya ai omudou a weaqu lomani mo dou qai tudei sara, mo dou uwa ni yavala, mo dou uwa sivi cae ina ca'aca'a ni turaga ina gauna tauc'o, mo dou ila ni maqa ni a wale ga a omudou caacaa ina turaga.