¹ Ẽbe zot gãiẽ dji fe kumã Bõdje fe,kumã pitxit ki li kõtã, ² Maxe ãdã kõtãtmã,kumã jezi khi hete kõtã dji no i so ko li hãde pu no,kumã un ofeht dji sakhifis dji losiõ ki bõ pu Bõdje. ³ Pa djivet gãiẽ lamitã dji no photxituisiõ o nẽpot kobiça,kumã pu sẽ-iela. ⁴ Pa puve dji pahol ki pa bõ,i pahol ki fu o ki sal,ki pa puve dji,ãvã djivet gãiẽ asiõ dji ghãs. ⁵ Mẽ hete jix dji sa ke pies photxituisiõ i bagaj ki salan kobiça ki sa ki ka adohe uot bõdje,pa gẽ ãiẽ pies hixes lahosiel kote Bõdje. ⁶ Pa lese pies mun fe mãto pu zot ke pahol ki vid.Palakos sa bagaj-iela,Bõdje ke pini pitxit dji sa ki pa ka obei. ⁷ Ẽbe zot pa patxisipe ke ie. ⁸ Mẽ ãvã zot te la suku,mẽ ato zot sa limẽ lasu no dji Sẽiẽ.Ẽbe maxe kumã pitxit dji limẽ , ⁹ (Mẽ fui dji limẽ a dji bei,jutxis i lavehite), ¹⁰ Sase tut tã save bagaj ki ka fe Bõdje kõtã. ¹¹ Pa gẽ pies patxisipasiõ ke bagaj sã vale dji suku,mẽ pa asekte. ¹² Mẽ sa bagaj ki li fe ã se ghe a boku hõte pu dji. ¹³ Tut sa bagaj-iela,kã ie ka ale pu limẽ,ie ka pahet. ¹⁴ Pase tut sa ki ka pahet a limẽ.Apusa li ka dji:"leve u ki ka dhomi,leve dji mitã dji sa ki muhi-iela,Jezi ke klehe ãleu". ¹⁵ Ẽbe gãiẽ pokosiõ kumã u ka maxe,no kumã u fu,mẽ kumã un mun iteligã, ¹⁶ Pofite tã la,pase ju-iela mal. ¹⁷ Pa hete fu,mẽ kophãn plezi dji Bõdje. ¹⁸ Zot pa hete su ke djivẽ,pa se sa ka pote djisthuisiõ.Ãva sa,zot hete ple ke lesphui sẽ. ¹⁹ Bladje un ke uot ke salmos,xãte i xãte ãlesphui;ka xãte ke tut mo txo pu Sẽiẽ. ²⁰ Tut tã bai ghãs pu tut sa bagaj dji no Bõdje papa,lasu nõ dji no Sẽiẽ jezi khi. ²¹ Hete un ke uot lasu no dji jezi khi. ²² Fam-iela, obei zot om-iela kumã sẽiẽ. ²³ Pase om la a tet dji fam la,kumã osi jezi khi a tet dji leglis la,li ka sove ko-la. ²⁴ Mẽ, kõsa kumã leglis ka obei jezi khi,ẽbe osi fam-iela gãiẽ dji obei ie om-iela ãdã tut. ²⁵ Om-iela,kõtã zot fam-iela kumã jezi kõtã so leglis i kõsa mẽm li bai so lavi pu li. ²⁶ Li fe pu li te puve tõnẽl sẽ,pu puhifik i lave mo ke klo pu pahol. ²⁷ Dji mãiẽ ki puve phuezãte pu li un leglis glohiosa,sã tax i sã vehi nē bagaj ãtxe sa iela,mẽ ki sẽ i ki jix. ²⁸ Dji mẽm fõn,om-iela gãiẽ pu kõtã ie phop fam-iela kumã ie phop ko.Sa ki kõtã ie fam ie kõtã ie ko mẽm. ²⁹ Pase pies mun pa ke hete kõt ie phop ko.Ãva sa ,ie bai li mãje i ithupe dji li kumã jezi khi osi ka ithupe dji so leglis, ³⁰ Pase no sa pahtxisipã dji ko. ³¹ "Pu sa haziõ-la,om-la ki lese so papa i so mãmã i li ke phã ke so fam,i ie de ke tõnẽ un sel laxe". ³² Sa a un gha lavehite,mẽ mo pale suje jezi i leglis-la. ³³ Mẽ osi xak un dji mo gãiẽ pu kõtã mo fam kumã mo phop ko,i fam-la gãiẽ dji hespete so om.