¹ Mo mẽm,kumã phisionẽ dji sẽiẽ Jezi khi,mo ka dji pu zót maxe dji fom i maiẽ ki jix la sa ki able zot, ² Ki zót viv kom mun ki pa gho uei,i ke thãkilite,i pasiãs,i husuve un a uot la kõtatmã. ³ Fe zót sa ki pi bom dji zót pu ghã uniõ dji lesphui i ligasiõ la thãkilite. ⁴ Gãiẽ un ko i un Lesphui,osi kumã un bagaj ke Bõdjie osi able pu no gãiẽ konfiãs i ãtan li fe. ⁵ I gãiẽ un Sẽiẽ, un Lesphui,i un batem, ⁶ I un Bõdjie i Papa dji tut.Lisa ãle dji tut-iela la mitã dji tut i ãn tut-iela. ⁷ Pu xak un dji no,li bai un kado kofom povua dji Jezi Khi. ⁸ Kumã ka dji la sa ki ekhi:"kã li ale pu ãle, pote puiziõnẽ la puiziõ,i li bai kado pu xak mum. ⁹ A kisa signifikad dji " li mõte",si nõ li osi desãn,ofõn late? ¹⁰ Mun ki desãm a mem mum ki mõte pihot dji Lahosiel-iela,pu li puve plẽ la tut kote-iela. ¹¹ Jezi khi bai pu xak un dji no pu ie sa apostolo,phofet,mun ki ka pase bõ nuvel dji pahol dji bõdjie,i uot pu paxte i methes. ¹² Li bai pu xak mum hespõsabilite pu Legliz pu ekipe so lafami la ispua pu ki ie puve siavi uot-iela pu edjifikasiõ dji ko dji Jezi khi. ¹³ Li kõtinẽ edjifike so ko juk kã no tut khẽdjiẽn konet Jezi kumã pitxit dji Bõdjie pu ie hasãble ie la lesphuas i hete mi kom khẽdjiẽm. ¹⁴ Li le ki no pasa ãko kom un tximum ki lame-la ka gite pu deie i pu djivã , ki tut vã dji konetmã ka xaie , mun kia kuienẽ khẽtxiẽ-iela ke mãto ĩtelijã ¹⁵ ãvam djisa, pale sa ki a vuemẽn ke kõtatmã,i no ka ghã la ximẽ-iela ki ka poteno kote li, kisa tet,Jezi Khi. ¹⁶ Jezi Khi ka edjifike tut ko, sa ki ãsãn ke ide dji ligasiõ-iela;i, kã xak bo thavai ãsãn,sa ka fe ko-iela hete ghã i edjifike li mẽn la kõtatmã. ¹⁷ mẽ mo ka dji i suplike lasa,la Sẽiẽ:ki paka viv ãko kõm judeus ka viv,ke ie mãginasiõ ki pa bom. ¹⁸ Ie imãginasiõ la suku,ie pa save dji ãiẽm dji lavi dji Bõdje pase ie pa gãiẽ konetmã pase ie txo du. ¹⁹ Ie pa gãiẽ hõte,dji mete ie ko la phostxituisiõ ,i ie ka kõtinẽ fe tut sa ki pa bõm ²⁰ Mẽ apa kõsa ki u ãphan xuje Jezi Khi. ²¹ Mo ka thuve ki zot kute dji li,ie mõthe dji li,kumã lavehite ki la Jezi Khi. ²² Zot ãphan lese sa ki ate dji zót vie mãiẽ dji viv,lese vie om pu deie.sa a vie om-la kohõpi palakos dji sa volũte ki ka kuienẽ. ²³ zot ãphãn kumã pu zot puve fe djinov lesphui dji zot imaginasiõ, ²⁴ i zot mete un nov om ki fet la imag dji Bõdje,la vuemã dji justis i Sant ²⁵ Ẽbe zot lese mãto i zot pale lavehite ke mun ki ka hete obo u , pase no ka fe pa un dji uot . ²⁶ Zot hete kole mẽ zot pa fe pexe . Zot pa piamĩ ki solei poze lasu zot mixã. ²⁷ zot pa bai opohtunite pu diab-la ²⁸ Sa ki te ka volo pa volo ãko ; u djivet thavai , ka fe bagaj ki bõ ke zot phop lamẽ , dji un mãiẽ ki zot ke kõpahtxilie ke tut sa ki ã nesesite . ²⁹ Zot pa lese ki pies pahol ki pa bõ sotxi dji zot bux , koze selmã pahol ki bõ pu edjifike uot-iela , kõfom nesesite . ³⁰ Pa blese Lesphui dji Bõdje ke pahol , sa ki make zot pu ju ki li ke libiate zot. ³¹ Zot gãiẽ dji hale zot ko dji tut mixã , kole , hele , juhe , asam ke tut kalite bagaj ki mal; ³² i zot hete bõ un ke uot , ka ue lapen , ka padõnẽ un a uot , kõsa kumã Bõdje lasu Jezi padonẽ zot.