¹ Kaka, amwiimbile Jehova lwiimbo lupya; mwiimbe kuli Jehova, nyika yoonse. ² Amwiimbile Jehova mulongezye zina lyakwe; mwaambilizye lufutuko lwakwe buzuba abuzuba. ³ Mwaambe bulemu bwakwe aakati kazisi, inchito zyakwe zibotu aakati kazisi zyoonse. ⁴ Nkaambo Jehova mupati alimwi weelede kulumbayizigwa kapati. Weelede kuyowegwa kwiinda bamwi baleza. ⁵ Nkaambo baleza boonse bazisi mituni, pesi nguJehova wakapanga majulu. ⁶ Mumuni mupati abulemu zili mubuliwo bwakwe. Nguzu abweebesi buli mubusena bwakwe busalala. ⁷ Amulembe kuli Jehova, nywebo nomikowa yabantu, mulembe kulumbayizya kuli Jehova akaambo kabulemu anguzu zyakwe. ⁸ Amupe bulemu kuli Jehova bweendelana azina lyakwe. Amulete chipayizyo akunjila mumbuwa zyakwe. ⁹ Amuvundame ansi kuli Jehova mumumuni wabusalali; mukankame kunembo lyakwe, nyika yoonse. ¹⁰ Mwaambe kuti aakati kazisi, ''Jehova uleendelezya.'' Nyika ayilayo yakayimikwa; tikonzyi kuzungaanisigwa. Ulabeteka bantu kabotu. ¹¹ Amuleke majulu asekelele, alimwi amuleke nyika ikondelelwe; muleke lwizi luvute azeezyo ziluzuzya zyoompolole alukondo. ¹² Amuleke myuunda ikondelwe azyoonse zilimulinjiyo. Mpawo muleke misamu yoonse iili mulusaka yoompololechakukondwa ¹³ kunembo lyaJehova, nkaambo uyobuza. Uyobuza kuzobeteka nyika. Uyoyibeteka nyika mubululami alimwi bantu mukusyomeka kwakwe.