Intembawuzyo ya Devidi, elyo nakali munkanda ya Juda. ¹ Leza, nduwe Leza wangu! Ndakuyandawula chabusungu, moyo wangu ulakufwida nyota, alimwi mubili wangu wakuzimba, munyika yachimpayuma alimwi kila buyumuyumu nyika oko kutakwe manzi. ² Aboobo ndakakulangula muchikombelo, kuti ndibone nguzu zyako aa bulemu bwako. ³ Nkambo chisyomezyo chabusyomesi bwako mbubotu kwinda buumi, milomo yangu iyokutembawula. ⁴ Aboobo njokutembawula nenchipona; ndiyonyampula maboko angu muzina lyako. ⁵ Kuyobaanga mbuli ndalya chakulya chinoono na mafuta; amilomo yangu iboteledwe iyokutembawula, ⁶ kuchiindi nenjibaluka nduwe abulo bwangu akukuyesesya nduwe muzyindi zyamansiku. ⁷ Nkambo nduwe mugwasyi wangu, alimwi amucheenzule chamababa aako njosekelela. ⁸ Ndajatilila kulinduwe; kuboko kwalulyo kwako kundigwasya. ⁹ Pesi abo bavwiima kujaya buumi bwangu bayoyinka aansi kumagolelo anyika; ¹⁰ bayopedekezya kulibabo babelesya panga mumaboko aabo, alimwi bayaba kulya kwaba mwaaba. ¹¹ Pesi mwami uyosekelela muli Leza; woonse oyo ukonka anguwe uyobotelwa anguwe, pesi milomo yabaabo baambula mabejo iyo wumuzigwa.