Kumupati wabasikwimba; musule amachitilo a Jedutuni. Intembawuzyo ya Devidi. ¹ Ndalindila mubumuzi kuli Leza alikke; lufutuko lwangu luzwa kuli nguwe. ² Lwakwe alikke ngomwaala wangu a lufutuko lwangu; nguwe ng'anda yangu ndamfu; ikapati nsikoyogwisigwa pe. ³ Mulaleka lili, moonse nywebo, kulwana muntu, kuti mukamujaye mbuli bulambo buyanda kuwa nanka lubaya lutajisi? ⁴ Balabuzya kuli nguwe biyo kuti bamuseluzye kuzwa kubulemu bwamulimo wakwe; balayanda kwamba mabejo; balamulongezya amilomo yabo, pesi mumyoyo yabo balamutuka. Selah ⁵ Ndalindila chumunizi kuli Leza alikke; nkambo bulangizi bwangu bubikidwe kuli nguwe. ⁶ Lwakwe alikke ngomwala wangu alimwi ndufutuko lwangu; ning'anda yangu ndamfu; nsikoyogwisigwa. ⁷ Aa Leza ndufutuko lwangu abulemu; mwala wanguzu zyangu aa machijilo angu ali muli Leza. ⁸ Amumusyome zyiindi zyoonse, Inywebo nobantu; Amutule myoyo yenu kunembo lyakwe; Leza machijilo esu. Selah. ⁹ Nchobeni bantu babikidwe ansi mbabuyo, alimwi bantu bayimikisidwe mbubeji; na bapimwa mbawuba wuba mubulemu; bapimwa antomwe, mbawuba kwiinda chitawo. ¹⁰ Mutayowi mumapenzi nanka mububbi; alimwi mutalangilili mubutagwasyi mubuvubi, nkambo nkambo tazikozozyala michelo; mutabiki myoyo yanu alimbubo. ¹¹ Leza wakaambula lumwi, Ndakamuswilila obo zyindi zyobile: kuti inguzu nzizya Leza. ¹² Alubo kuli nduwe, Mwami, nkukuzwa chizuminano chabusyomesi, nkambo ulapa woonse muntu kuli ezyo nzyachita.