Chaandano 61
Kumwami wabasikwimba; anyimbo zyakulizya tuntimbwa. Intembawuzyo ya Devidi.
1
Mvwa kulila kwangu, Leza; swilizya nkombyo yangu.
2
Kuzwa kumagolelo anyika ndiyokwiita elyo moyo wangu niwawizuka; ndeenzye undisisye kundomba indamfu kwinda ndime.
3
Nkambo webo waba mayubilo aangu, njanda njumu kuzwa kuli sinkondoma.
4
Njokkala muchilawo chako lyoonse! Njochita mayubilo angu munsi acheenzule chamababa aako.
5
Nkambo webo, Leza, wakamvwa zikonke zyangu, wakandipa lukono lwabaabo balemeka zina lyako.
6
Uyo wongozya buumi bwa Mwami; minyaka yakwe iyooba mbuli mazyalane miingi.
7
Uyoyendelezya kunembo lya Leza kwalyonse; amupe lusinizyo lwaluyando abusyomesi kuti amukwabilile.
8
Ndiyoyimba intembawuzyo kuzina lyako kwalyonse kuchitila kuti nkazuzikizye zikonke zyangu mazuba woonse.