Lwiimbo; intembawuzyo yabana balombe baKkola. ¹ Jehova mupati alimwi uleelede kutembawulwa loko, mudolopo lyaLeza wesu aachilundu chakwe chisalala. ² Cheebeka mubulamfu, lukondo lwanyika yoonse, nchiLundu chaZayoni, kumabazu aakunyika, munzi waMwami mupati. ³ Leza walichita kuti azibwe lwakwe mumaanda abami kuti nchiyubilo. ⁴ Nkaambo, bona, bami balibungania beni; bakayinka antoomwe. ⁵ Bakabona, mpawo bakagamba; bakayoosegwa, alimwi bakachija. ⁶ Bakakankama mpawaawo, machise mbuli mwanakazi uulikutumbuka. ⁷ Aluuwo lwakujwe ulatyoloola maato aakuTasyisyi. ⁸ Mbuli mbutwakamvwa, aboobo mbubo mbutwakabona mumunzi waJehova wamakamu, mumunzi waLeza wesu; Leza uyochiimika lyoonse. Sela ⁹ Twakayeeya aatala abusyomesi bwachizuminano chako, Leza, aakati kang'anda yako yakukombela. ¹⁰ Mbuli zina lyako mbulibede, Leza, aboobo mbiibede ntembawuzyo yako kusika kumagolelo aanyika; luboko lwako lwalulyo luzwide busalali. ¹¹ Leka Chilundu Zayoni abotelwe, bana basimbi baJuda ngabakondwe akaambo kambeta zyako zyabululami. ¹² Amweende muzyunguluke Chilundu Zayoni, muzyunguluke; amukabale maanda akwe malamfu, ¹³ mukalangisisye kabotu bulambo bwakwe, alimiwi mukalange kumaanda akwe aabwami kuchitila kuti muzolwiide izyalane litobela. ¹⁴ Nkaambo ooyu Leza nguLeza wesu lyoonse alyoonse; nguyotweenzya kusikila kulufu.