Yamupati wabasikwiimba. Intembawuzyo yabana balombe baKkola. ¹ Amuswiilile eechi, moonse nobantu; mupe kutwi, moonse nimukkala munyika, ² moonse bali aansi abali kujulu, bavubi abachete antoomwe. ³ Mulomo wangu uyowambuula busongo amiyeyo yamoyo wangu iyooba aakumvwisisisya. ⁴ Ndiyochenjekezya kutwi kwangu kumaambilambali; ndiyootalika maambilmbali aangu akantimbwa. ⁵ Nkaambonzi nensikayowe mazuba aabubi, aawo chiindi zibi nizindizyungulukide kutusindi twangu? ⁶ Nkaambonzi nenjooyowa aabo babika lusyomo lwabo mubuvubi bwabo kabalikankayizya abavule bwabuvubi bwabo? ⁷ Nisimpe kuti takwe muntu pe ukonzya kuunununa mukulana wakwe na kuti kupa Leza chilubuzyo chabuumi bwakwe, ⁸ nkaambo kuunununwa kwabuumi bwawumwi kuladula, alimwi tawo pe ukonzya kuliya chikkwelete nchituli acho. ⁹ Tawo pe ukonzya kupona kwalyoonse kuti mubili wakwe ukaleke kubola. ¹⁰ Nkaambo uyobona kubola. Baalumi basongo balafwa; bafubafuba abachenjede boonse balaloba akusiya buvubi bwabo kuli bamwi. ¹¹ Miyeeyo yabo yamukati njakuti mpuli zyabo ziyopona kwalyoonse, amasena aabo ooko nkubakkala, kumazyalani woonse; bayita masena aabo kabatobelezya mazina aabo. ¹² Pesi muntu taponi kwalyoonse, nikuba waba aabuvubi boonse; ulimbuli banyama bamusokwe banyonyooka. ¹³ Eeyi nzila yabo, njabufubafuba; pesi musule lyabo, bantu balazumina zyaambo zyabo. Sela ¹⁴ Mbuli mbelele basalilwa Syiyoli, alufu luyooba mweembeli wabo. Baluleme bayobeendelezya chifumo, alimwi mibili yabo iyoolobesegwa mu Syiyoli, kakutakwe busena bwabo bwakukkala. ¹⁵ Pesi Leza uyonununa buumi bwangu kuzwa kunguzu zyaSyiyoli; uyonditambula. Sela ¹⁶ Mutakayowi eelyo umwi nayooba aabuvubi, abulemu bwang'anda yakwe bwayungizigwa. ¹⁷ Nkaambo aawo nayoofwa takwe nchatakabweze pe; bulemu bwakwe tabukoyomutobela pe. ¹⁸ Wakalongezya muuya wakwe nakachilikupona - alimwi bantu balakutembawula aawo nochiliponena - ¹⁹ uyoyinka kuzyalani lyamawisi alimwi tabakoyoobona limbi mumuni. ²⁰ Ooyo uuli aabuvubi pesi katakwe kumvwisisisya uli mbuli banyama banyonyooka.