Intembawuzyo yaDeviti. ¹ Jehova, beleka kulwisya aabo bandilwisya; lwana aabo bandilwana. ² Jata ntibi yako niini antibi yako mpati; nyampuka akundigwasya. ³ Belesya sumu lyako akaleba kenkondo kulwana aabo banditandaania; tedi kumuuya wangu, ''Ndime lufutuko lwako.'' ⁴ Ikaka aabo bayanduula buumi bwangu bawusigwe nsoni abweeme. Ikaka aabo babamba kundibisizya bafutatike akuzundwa. ⁵ Ikaka babe mbuli buungu bupupuluka aluwo, aawo mungelo waJehova nabatanda. ⁶ Ikaka munzila zyabo akube mudima abutezi, aawo mungelo waJehova nabatandaania. ⁷ Aatakwe kaambo banditeya kakole; aatakwe kaambo bandisyida dindi lyabuumi bwangu. ⁸ Inche lunyonyoono ngalubabweedele chakubagambya. Inche kansabwe nkibateya kache mbabo. Ngabakawide mulinkako, kulunyonyooko lwabo. ⁹ Pesi ndinokondedwe muliJehova akukondwa mulufutuko lwakwe. ¹⁰ Mafuwa angu woonse ayowamba kuti, ''Jehova, ngwani ulimbuli nduwe, ooyo uuvuna badyamizigilwe kuzwa kuli baabo bali aanguzu mpati kulimbabo, bachete ababula kuzwa kulibaabo beezya kubabbida?'' ¹¹ Bakamboni babi babuka; balandibejelezya. ¹² Bandichitila bubi aawo mpebachitila mubotu. Ndiwuside. ¹³ Pesi aawo nibakachisidwe, ndakazwete maska; ndakalyiimya kulya nkebakombela mutwe wangu kuusunaminide aakango kangu. ¹⁴ Ndakawusa aanga mukulana wangu; ndakakotama aanga ndilila baama. ¹⁵ Pesi aawo nindakawa bakakondwa alimwi bakabungana aantomwe; bakandibunganina kundilwanisya, bakandigambya. Bakali kundilengelela kaambo chakutaleka. ¹⁶ Bakandisampawula chakutandilemeka; bandilumina ntwino mukunyema. ¹⁷ Mwami, kukabe lili kolangide? Vuna muuya wangu kuzwa ukulwanisya kwabo kunyonyoona, buumi bwangu kuzwa kubalavu. ¹⁸ Mpawo ndiyokulumba mumbungano mpati; ndiyokutembawula aakati kabantu biingi. ¹⁹ Utalekeli basinkondoma basikweenena babotelwe aatala lyangu; utabalekeli kuti bachite mabambe aabo mabi. ²⁰ Nkaambo tabaambuuli luumuno, pesi babamba makani akweenena aatala abaabo bali munyika yesu bakkede muluumuno. ²¹ Bakajulisya milomo yabo kulwisya ndime; bakati, ''Aha, Aha, menso esu azibona.'' ²² Wazibona, Jehova, utawumuni; Mwami utabi kule andime. ²³ Libusye lwako mwini akundivuna; Leza wangu Mwami wangu, lwanina kaambo kangu. ²⁴ Ndikwabilile, Jehova Leza wangu, akaambo kabululami bwako; utabaleki kuti babotelwe aatala andime. ²⁵ Utabaleki baambe kuti mumyoyo yabo, ''Aha, twazijana nzitwalikuyanda.'' Utabaleki baambe kuti, ''Twamumaninsya.'' ²⁶ Ikaka ngabakawusigwe nsoni akuzundwa aabo babotelwa mumapenzi angu. Ikaka aabo balisumpula aatala andime bakazwaatikwe nsoni abweeme. ²⁷ Aabo bayanda kufutulwa ngaboompolole chakukondwa akusekelela; abiinkilile kabaamba kuti, ''Jehova ngatembawulwe, ooyo ubotelwa mubulondozi bwamulanda wakwe.'' ²⁸ Mpawo ndiyowamba bubotu bwako akukutembawula buzuba boonse.