Intembawuzyo yaDeviti, aawo nakachitaanga ulipengede kunembo lyaAbbimeleki, ooyo wakamwaanda. ¹ Ndiyotembawula Jehova muzyiindi zyoonse, intembawuzyo yakwe inoli mumulomo wangu lyoonse. ² Ndiyotembawula Jehova! Badyamizigilwe ngabamvwe alimwi bakondelelwe. ³ Amutwmbawule Jehova andime, atunyampule zina lyakwe antoomwe. ⁴ Ndakayanduula Jehova alimwi wakandivwiila, alimwi wakandipa kuzunda aatala lyakuyowa kwangu koonse. ⁵ Aabo balanga kulinguwe bali aalumwemwe, alimwi kumenso kwabo takufwisyi nsoni pe. ⁶ Ooyu mwaalumi wakadyamizigilwe wakakwiila alimwi Jehova wakamuvwa alimwi akumuvuna kuzwa kumapenzi akwe woonse. ⁷ Mungelo waJehova ukkala aalibabo bamuyowa alimwi ulabawunununa. ⁸ Amulabile alimwi mubone mubotu bwaJehova. Ulilongezegelwe muntu uuyuba mulinguwe. ⁹ Amuyowe Jehova, nobasalali bakwe. Takwe kubula kulibabo bamuyowa. ¹⁰ Chimwi chiindi bana ba balavu ngababula chakulya akufwa nzala, pesi aabo bayanduula Jehova tabakoyoobula kufumbwa chintu chibotu. ¹¹ Nobana balombe amuboole mundiswiilile. Ndiyomuyiisya kuyowa Jehova. ¹² Ngwani muntu ooyo uyandisya buumi alimwi uyanda koongolo kuti akabone mubotu? ¹³ Aboobo bamba lulimi lwako kuzwa kububi amulomo wako kuzwa kukwaamba mabejo. ¹⁴ Zwa kububi alimwi uchite bubotu. Yanduula luumuno alimwi ulutobele. ¹⁵ Menso aaJehova ali aabalulami amatwi akwe achenjekezegelwe kukulila kwabo. ¹⁶ Busyu bwaJehova buli aatala abaabo bachita zibi, kubagwisya kuzwa kukuyeyegwa munyika. ¹⁷ Basalali balakwiila alimwiJehova ulabamvwa akubavuna kuzwa kumapenzi aabo. ¹⁸ Jehova uli afwifwi ababo batyokede mumyoyo, alimwi ulabafutula batyokede mumuuya. ¹⁹ Avula mapenzi aabasalali, pesi Jehova ulabagwisya kuzwa kulingawo woonse. ²⁰ Ulabamba woonse mafuwa aakwe, kakutakwe nikuba lyomwe litakatyoke. ²¹ Bubi buyoobajaya babi. Aabo basula basalali bayoopegwa mulandu. ²² Jehova uvuna mawumi aabalanda bakwe. Takwe wababo bayuba mulinguwe uuyopegwa mulandu.