¹ Amubotelwe muliJehova, nimululeme; kutembawula kuleelela baluleme. ² Amupe kulumba kuliJehova azisibyo; mwiimbe ntembawuzyo kulinguwe atuntimbwa buli aatuwayile tuli kkumi. ³ Amwiimbe kulinguwe alwiimbo lupya; mulizye chakukonzya akwiimba chalukondo. ⁴ Nkaambo ijwi lyaJehova lililuleme, azyoonse nzyachita zilikabotu. ⁵ Uyanda bululami abubotu. Inyika izwide busyomesi bwachizuminano chaJehova. ⁶ Ajwi lyaJehova majulu akabumbwa, alimwi zyoonse nyenyeezi zyakachitwa amuuya wamulomo wakwe. ⁷ Ulabunganisya manzi amulwizi antoomwe mbuli chilwi; ulabika lwizi mung'anda yachibikilo. ⁸ Inyika yoonse ngayiyowe Jehova; aboonse bakkala munyika bayime chakugamba nguwe. ⁹ Nkaambo wakambuula alimwi zyakachitika; wakalayilila alimwi zyakayimikila mpuzyeelede. ¹⁰ Jehova wamwayuula tubungabunga twazisi; wamwayuula mabambe abantu. ¹¹ Mabambe aJehova aliimikila kwalyoonse, mabambe amoyo wakwe kumazyalane woonse. ¹² Chililongezegelwe chisi chili aLeza ulinguwe Jehova, bantu mbaakasala mbuli basilukono bakwe. ¹³ Jehova ulalanga kali kujulu; ulabona bantu bonnse. ¹⁴ Kuzwa kubusena nkwakkala, ulalanga aansi kuliwoonse ukkala enyika. ¹⁵ Ooyo uzyotolola myoyo yabo boonse ulabona nchito zyabo. ¹⁶ Takwe mwami uvunwa akukomena kwa mpi; silumamba tavunwi anguzu zyakwe mpati pe. ¹⁷ Ibbiza mbulangilizi bwakubeja bwakuzunda; nikuba kuti nguzu zyakwe nimpati, takonzyi kulivuna pe. ¹⁸ Bona, linso lyaJehova lili alibaabo bamuyowa, alibaabo balangilila mubusyomesi bwachizuminano chakwe ¹⁹ kuunununa mawumi abo kuzwa kulufu akubabamba nkabali bawumi muzyiindi zyebbalangwe. ²⁰ Tulindila Jehova; ngomugwasyi wesu alimwi nintobo yesu. ²¹ Myoyo yesu ilakondwa mulinguwe, nkaambo tusyoma muzina lyakwe lisalala. ²² Busyomesi bwachizuminano chako, Jehova, abube andiswe nitubika bulangilizi bwesu mulinduwe.