Kumupati wabasikwimba. Intembawuzyo ya Davida. ¹ Mulinduwe, Jehova, munjubila; ntawusigwi nsoni. Ndivuna mubululami bwako. ² Kondiswilila; undivune chakufwambana; ube ibbwe lyamayubilo aangu, ng'anda njumu yakundifutula. ³ Nkambo ulibbwe lyamayubilo angu amachijilo aangu; nkinkaako nkambo kazina lyako, kondizulwida akundibamba. ⁴ Kondigwisya mukazamba nkibanditeya, nkambo uli mayubilo aangu. ⁵ Mumaanza aako ndatuula muuya wangu; uyondinununa, Jehova, usyomekesya. ⁶ Ndisulide aabo babelekela baleza babuyo, pele ndisyoma muli Jehova. ⁷ Ndiyobotelwa akukondwa muchizuminano chako chakusyomeka, nkambo wakabona mapenzi angu; ulizi kupengana kwamuuya wangu. ⁸ Takwe niwakandaaba mumaanza abasinkondoma. Wakayimika mawulu angu munkwaalale. ⁹ Kondifwida luse, Jehova, nkambo ndimumapenzi; menso angu awubila mumapenzi akulyetezya amuuya amubili wangu. ¹⁰ Nkambo buumi bwangu bwaba mubuusu amyaaka yangu akutongela. Inguzu zyangu zyamana nkambo kazibi zyangu, azifuwa zyangu zyamana. ¹¹ Nkambo kabasinkondoma boonse ndayowelelwa kubeenzuma; benzuma bayoowa nkambo chiimo changu, abaabo bandizi balayoowa. Abaabo bandibona mumigwagwa balandichija. ¹² Ndalubwa mbuli muntu muntu ufwide utachiyeeyi. Ndaba mbuli muntu chilongo chipwayikide. ¹³ Nkambo ndamvwa kuvwiyavwiya kwabanji, kumabazu woonse kulayoosya balavwiiya antomwe akundilwisya. Balabamba kumaninsya buumi bwangu. ¹⁴ Pele ndisyoma mulinduwe, Jehova; ndati, ''Nduwe Leza wangu.'' ¹⁵ Mazuba angu alimujanza lyako. Ndivuna kuzwa kumanza abasinkondoma abaabo bandiyandawula. ¹⁶ Busyu bwako ngabumweeke kumuzike wako; ndivuna muchizuminano chako chakusyomeka. ¹⁷ Utanduusyi bweeme, Jehova; nkambo ndakwilila nduwe! Basizibi bawusigwe nsoni! Bawumune mukabanda. ¹⁸ Milomo yababeji iiwamba majwi akusampawula baluleme chakulisumpula achakantukantu. ¹⁹ Mbupati loko bubotu bwako kujulu mbolondwedede aabo bakuyoowa, aabo mbobachitila aabo bachijila mulinduwe kuzwa kubana ba Adamu! ²⁰ Muchiyubilo chako, ulasisa kuzwa kukuvwiiya kwabantu. Ulabayubika muchiyubilo chako kuzwa kunkondo yandiimi. ²¹ Alongezegwe Jehova, wanditondezya zigambyo zyachizuminano chakusyomekana nindakali mumunzi wamapenzi. ²² Nikuba ndakati mubu fubafuba bwangu, ''Ndanyonyooka kumenso aako; pele wakaswilila majwi akukumbila kwangu nindaka kukwilila. ²³ Amuyandisye Jehova, nyoonse nomusyomekede. Jehova ulakwabilila basyomekede, pele ulabwedezezya bachita zibi buzwide. ²⁴ Amuyume akuba bakozu, nyoonse nomusyoma kukugwasigwa a Jehova.