Intembawuzyo ya Davida. ¹ Jehova ndilampi lyangu alufutuko lwangu; Ngwani ngwenjoowa? Jehova mayubilo abuumi bwangu; ngwani ngonchija? ² Basizibi nibasika kuli ndime kuzondilwisya nyama, bandilwisya abasinkondoma balalebwa akuwida aansi. ³ Nikuba kuti inkamu yaba silumamamba yalibamba kundilwisya, moyo wangu tuyoowi; nikuba nkondo yabuka kundilwisya, moyo wangu tuyoowi. ⁴ Chintu chomwe nchenkumbila kuli Jehova, anchenjandawula. Nkuti ndikkale mung'anda ya Jehova mazuba angu woonse abuumi bwangu, akubona bubotu bwa Jehova akuliya muchikombelo chakwe. ⁵ Nkambo mubuzuba bwamapenzi ulandiyubika muchilawu chakwe; wanditansika ajulu abbwe! ⁶ Eelyo mutwe wangu uyosumpulwa kwiinda basinkoma boonse bandeengelede, alimwi njotuula chimpanzi chakukondwa mutente lyakwe! Njoyimba akutembawula Jehova! ⁷ Swilila, Jehova, ijwi lyangu nendila! Ndifwida luzyalo mebo, akundiwiila! ⁸ Moyo wangu ulaamba kuti, ''Yanduula busyu bwakwe! Njanduula busyu bwako, Jehova! ⁹ Utandisisili busyu bwako; ulandisowa chabukali ndemulanda wako! Wakali mugwasyi wangu; utandisiyi nekuba kundilekelezya, Leza walufutuko lwangu! ¹⁰ Nekuba kuti ndeende abaama bandisiya, Jehova ulandibamba. ¹¹ Ndiyiisye nzila yako, Jehova! Undeenzye munzila itandabete nkambo kabasinkondoma. ¹² Utandaabi kumakanze abasinkondoma, nkambo bakamboni babeji babuka akkati kangu, balayooya inkondo! ¹³ Ninzi chitika chitike kuli ndime nindakatasyoma kuti ndiyobona bubotu bwa Jehova munyika yaba pona? ¹⁴ Lindila Jehova; koyuma, alimwi moyo wako ujate changuzu! Lindila Jehova!