¹ Mutembawule Jehova. Mutembawule Jehova, nywebo nimuli kumajulu; mumutembawule, nywebo nimuli kumilengalenga. ² Mumutembawule, moonse nobangelo bakwe; mumutembawule, nomakamumakamu akwe. ³ Mumutembawule, zuba amwezi; mumutembawule, moonse nonyenyeezi zimweka. ⁴ Mumutembawule, julu lili aajulu andinywe nomaanzi nimuli aatala lyajulu. ⁵ Ikaka ngabakatembawule zina lyaJehova, nkaambo wapa malayilile, alimwi bakalengwa. ⁶ Alimwi wakabayimika kwalyoonse alyoonse; wakapa mbeta iitachinchi. ⁷ Mumutembawule kuzwa munyika, nobanyama bapati bamulwizi azyoonse zijanika mubunike bwamulwizi, ⁸ mulilo achivulamabwe, lume amayoba, muuwo mukali kuzuzikizya jwi lyakwe. ⁹ Mumutembawule, zilundu atulundu toonse, misamu yamichelo amasida woonse; ¹⁰ boonse banyama bamusokwe abuvubi boonse, zilengwa ziyavula atuyuni tuli aamababa. ¹¹ Mutembawule Jehova, bami banyika amanyika woonse, bana bababmi aboonse beendelezya munyika, ¹² boonse baalumi baniini abanakazi baniini, bapati abana. ¹³ Ikaka boonse ngabatembawule Jehova, nkaambo zina lyakwe alilike lilisumpukide alimwi bulemu bwakwe bulazulila nyika akusika kumajulu. ¹⁴ Wanyampula lwija lwabantu bakwe kukutembawulwa kuzwa kubasyomekede bakwe, baIzilayeli, bantu bali aafwiifwi anguwe. Mutembawule Jehova.