¹ Mutembawule Jehova, nkaambo nkubotu kwiimba ntembawuzyo kuli Leza wesu; nchibotu, alimwi ntembawuzyo ileelede. ² Jehova ulayakulula Jelusalemu; ulabungania bantu baIzilayeli basanseene. ³ Ulaponia batyokede mumyooyo akusilika zilonda zyabo. ⁴ Ulabala nyenyeezi; ulapa mazina kulizyoonse. ⁵ Mupati Mwami wesu alimwi ulagambya munguzu; kumvwisisisya kwakwe takweeleki. ⁶ Jehova ulabusya badyaamizigilwe; basizibi ulabawisizya aansi. ⁷ Imba kuli Jehova akulumba; imba ntembawuzyokuli Leza wesu amutetele. ⁸ Ulavumba majulu amayoba akubambila nyika mvula, kuchita masokwe kuti akomene aazilundu. ⁹ Ulapa kulya kubanyama bamusokwe akulibachikwaangala baniini aawo nibalila. ¹⁰ Tabotelwi mumanguzu aabbiza; tabotelwi mumawulu aasimide aamuntu. ¹¹ Jehova ubotelwa muli baabo bamulemeka, balangilila mubusyomesi bwachizuminano chakwe. ¹² Tembawule Jehova, Jelusalemu; tembawula Leza wako, Ziyoni. ¹³ Nkaambo ulasimya njimiima zyamilyango yako; ulalongezya bana bako aakati kenu. ¹⁴ Weeta kuzwidilila mukati kamigaano yako; ulakukutya abusu bunante bwabbali. ¹⁵ Ulatuma malayilile akwe munyika; malayilile akwe alafwambana loko. ¹⁶ Uchita lume mbuli buluba; umwayuula mume mbuli dota. ¹⁷ Umwayuusya chivulamabwe mbuli makololo; ngwani wiiminana aampeyo njatuma? ¹⁸ Utuma malayilile akwe akwaayeemuna; uchita luuwo kuti luunge amaanzi kuti akunke. ¹⁹ Wakaamba jwi lyakwe kuli Jekkobbu, milayizyo yakwe ambeta zyakwe zisalala kuli Izilayeli. ²⁰ Takwe nakalinachichita ayimwi nyika, alimwi mbuli mbeta zyakwe, tabazizi pe. Tembawule Jehova.