¹ Amupe kulumba kuli Jehova, mwiite zina lyakwe; mukazibye nchito zyakwe aakati kamanyika. ² Mwiimbe kulinguwe, mwiimbe ntembawuzyo kulinguwe; mwaambe milimu yakwe yoonse mibotu. ³ Mulikankayizye muzina lyakwe lisalala; moyo wabaabo bayanduula Jehova ngawubotelwe. ⁴ Muyanduule Jehova anguzu zyakwe; muyanduule muliwo bwakwe lyoonse. ⁵ Muyeeye milimu mibotu njaakachita, zigambyo zyakwe ambeta zyakwe kuzwa kumulomo wakwe, ⁶ nywebo nolunyungu lwaAbbulahamu mulanda wakwe, nobantu baJekkobbu, basale bakwe. ⁷ NguJehova, Leza wesu. Mbeta zyakwe zili munyika yoonse. ⁸ Ulabamba chizuminano chakwe lyoonse, jwi ndyaakalayilila kumazyalane aali chuulu. ⁹ Ulayeeya chizuminano nchaakachita aAbbulahamu achikonke chakwe kuli Ayizekki. ¹⁰ Eechi nchicho nchaakaamba kuli Jekkobbu mbuli chizuminano akuli Izilayeli mbuli chizuminano chalyoonse. ¹¹ Wakati, ''Ndiyoomupa nyika yaKkenani mbuli chaabilo chalukono lwenu.'' ¹² Wakazyaamba eezi aawo nibakachili bache, bache loko, alimwi bakachili beenzu munyika. ¹³ Balikweenda kuzwa kunyika kabaya kunyika iimbi akubwami kuya kuli bumwi. ¹⁴ Taakazumizya naba womwe kuti abapenzye; wakakalalila bami akaambo kabo. ¹⁵ Wakati, ''Utagumi bananike bangu, alimwi utabisizyi basinsimi bangu. ¹⁶ Wakiita bbalangwe eenyika; wakiimikizya kujanika kwachinkwa. ¹⁷ Wakatuma mwaalumi kunembo lyabo; Jozefu wakawuzigwa mbuli mulanda. ¹⁸ Mawulu akwe akaangidwe amakkole; munsingo yakwe kwakabikidwe mukonde wabutale, ¹⁹ kusikila eezyo nzyakaambide zyazuzikizigwa. Jwi lyaJehova lyakamusunka. ²⁰ Mwami wakatuma balanda kuti bakamwaangunune; mweendelezi wabantu wakamwaangununa. ²¹ Wakamubika mubweendelezi bweng'anda yakwe mbuli mweendelezi wabuvubi bwakwe boonse ²² kulayilila bana bamwami mbuli mbaakali kuyanda akuyiisya basilutwe busongo. ²³ Mpawo Izilayeli wakaza muIjipiti, alimwi Jekkobbu wakakkala kwachiindi munyika yaHemu. ²⁴ Jehova wakachita bantu bakwe kuti bazyale michelo, akubachita basinguzu kwiinda basinkondonyina. ²⁵ Wakachita basinkondonyina kuti basule bantu bakwe, kusyonsya balanda bakwe. ²⁶ Wakatuma Mozesi, mulanda wakwe, aAloni, ooyo ngwaakasala. ²⁷ Bakachita zitondeezyo zyakwe aakati kabaIjipita, zigambyo zyakwe munyika yaHemu. ²⁸ Wakatuma mudima akusizya nyika eeyo, pesi bantu bayo tebakalemeka milawu yakwe pe. ²⁹ Maanzi aabo wakaachita bwaba bulowa alimwi wajaya nswi zyabo. ³⁰ Nyika yabo yakazula machulwa, nikuba mumaanda aabeendelezi babo. ³¹ Wakaambuula, alimwi tanga lyenzi atuntantabwa zyakazula munyika. ³² Wakachincha mvula yabo yaba zambangulwe, amulilo uulikuyaka munyika yabo. ³³ Wakanyonyoona misaansa amikuyu yabo; wakatyola misamu yenyika yabo. ³⁴ Wakaambuula, alimwi mpasu zyakasika, mpasu nyingi loko. ³⁵ Mpasu zyakalya woonse masokwe amateyo munyika yabo; Zyakalya zyoonse zilyo zyenyika. ³⁶ Wakajaya boonse bana bataanzi munyika yabo, michelo mitaanzi yamanguzu aabo woonse. ³⁷ WakagwisyabaIzilayeli kabali aansiliva angolide; takwe wakakatala pe munzila. ³⁸ Ijipiti wakabotelwa nibakayinka, nkaambo baIjipiti bakali kubayoowa kapati. ³⁹ Wakayala joba kuti libavumbe akuchita mulilo kuti ubamunikile mansiku. ⁴⁰ BaIzilayeli bakakumbila chakulya, alimwi wakeeta tundonga akubakkutya achinkwa kuzwa kujulu. ⁴¹ Wakaandula bbwe, alimwi maanzi akazwa mulindilyo; akeenda muchimpayuma mbuli mulonga. ⁴² Nkaambo wakayeeya chisyomezyo chakwe chisalala eecho nchaakachita kuliAbbulahamu mulanda wakwe. ⁴³ Wakazulwida bantu bakwe alukondo, basale bakwe aloompololo lwakuzunda. ⁴⁴ Wakabapa masena aamanyika; bakabweza akulijanina lubono lwabantu ⁴⁵ kuchitila kuti bakabambe malayilile akwe akulemeka milawu yakwe. Mutembawule Jehova.