¹ Nkaamboonzi, Jehova, niwimina kule? Nkaamboonzi nolisisa muzyiindi zyamakataazyo? ² Nkaambo kakasampusampu kabo, bantu babi, batandaabo badyamizigwa; pesi inche, ibabi ngabachigwe abumpelenge bwabo mbubachita. ³ Nkaambo imuntu mubi ulalidundilizya loko aziyandisyo zyamoyo wakwe; ulongezya balyabi, kutukila Jehova. ⁴ Muntu mubi ulaabusyu bunyampukide; tayaanduli Leza. Takwe nayeeya aatala a Leza nkaambo takwe pe mulimu anguwe abunini. ⁵ Webo ulilondokede zyiindi zyoonse pesi twambo twako tululeme tuli ajulu loko anguwe, ulabasimbwida boonse basinkondonyina. ⁶ Waamba kuti mumoyo wakwe, ''Nsikoyoofwa ndakachilwa pe; mumazyalane woonse nsikoyoswanana alukazyanio pe.'' ⁷ Mulomo wakwe uzwide lutuko, abubeji abudyamizyi; munsi alulimi lwakwe muli kuputuuka abusofwaazi. ⁸ Ulayubilila mumbali amyunzi; mumasena asisikide ulajaya batakwe mulandu; menso aakwe ayanduule batakonzyi kulivuna. ⁹ Ulayubilila musisikide mbuuli mulavu muchimpote; ulayubilila kalinda kujata aabo badyamizigwa. Ulajata aabo badyamizigwa nakwelela mukati bunsabwe bwakwe. ¹⁰ Mbaajata balapwachuulwa akuminwa aansi, bawida mubunsabwe bwakwe busimide. ¹¹ Mumoyo wakwe waamba kuti, ''Leza wakaluba; uvumba busyu bwakwe; takoyolikatazya kulanga.'' ¹² Nyampuka, Jehova! Nyampula kuboko kwako Leza! Utabalubi badyamizigwa. ¹³ Nkaamboonzi muntu mubi nakaka Leza akwaamba kuti mumoyo wakwe, ''Tokoyondimanikizya kwiminina nzyayanda''? ¹⁴ Wazibona, nkaambo lyoonse ubona ooyo uyetela bamwi kupengaana amawuse. Oyo uutakonzyi kuligwasya ulyaba kuli nduwe; ulabavuna batakwe mawisi. ¹⁵ Tyola kuboko kwamuntu musofwazi sizibi. Komuchita kuti ayiminine inchito zyakwe zisofwede nzyalikuyeeya kuti tokoziziba. ¹⁶ Jehova Mwami lyoonse alyonse; manyika alatandwa kuzwa munyika yakwe. ¹⁷ Jehova, wazimvwa nzibabula badyamizizigwe; usimya moyo wabo, uswilizya inkombyo zyabo; ¹⁸ Ulabakwabilila batakwe mawisi abadyamizigwa kuchitila kuti kutabi muntu utaketelezye kutuntuulika alimbi.