YESUS NAPA PANJANYA NA TAU NAMA HIDU KILLA (Mrk.1:40-45; Luk. 5:12-16) ¹ Ba talanga puruna na hi Yesus welingu la pinu palindi nuna, na dangu na tau nama tundunya. ² Dangu, ngitaya, na haatu tau killa namai lai Nyuna, hina patika la hangga-Na, hina pakaluakangu,"Umbu, djakau mbuhangu, hu njadi Nyumu pa panjangga." ³ Halla, hi Yesus na pajualanya lima-Na hala hina damaya, hi wana-Nya," Ku mbuhanguma, panjanguwa."La rehi nuna ma a, panjangu ma ananya welingu la killana na tau nuna. ⁴ Halla, hi wana hi Yesus bana pa banjaru danya, "patingingu, ambu djia ninguka pa paniwamu lai nggamu biaya, taka lakuwa, kau pangitangu wikimu la ratu, dangu kau marakungu pamaraku wangu panamatunya na paretana hi Musa beri pahaka hingumu dangu nyuda. " ⁷ " NA HAATU MAPALOKU LA KAPALA TENTARA ROMAWI NAPA PANJANGU" ( Luk. 7:1-10;Yoh. 4:43-53) ⁵ Bana tamaka hi Yesus la Kapernaum, na haatu kapala tentara namai lai Nyuna, na kamahinya, ⁶ halla hi wanna, Umbu, na atanggu na katuda ba kaliparu nanya la uma, dira mayilla ya. Taka, wana hi Yesus, mata Kaku lua lapa papanjanya. ⁸ Taka ba tunanu, na kapala tentara wanna bana hiamaya. Umbu, ndaku parakangu a duku kau tamanya na lumbu umanggu, milli hu pakaluakangu a na atangu daingu panjangu mana. ⁹ Djaka djiaya, nyungga tau ma ningga la lumbu ma kuahaka, dangu da tentara-tentara ninja la wawanggu. Halla, djaka wanggunya na haatu lakuwa, nyuna na laku, dangu da hawiangu, mainguwa, dangu nyuda da pamaingu, dangu la atanggu, palakuya yiana djaka wanggunja, daingu da palakuya. ¹⁰ Bana ronguyaka hi Yesus na rukuna nuna, na bokulu eti, halla hi wananja da tau dama kikunya, nahu wanggu nggai , ndedi Ku ngalangu a ma bokulu parahaya hamana yiana la juanga tau Israel. ¹¹ Nahu wanggu nggai na dangu na tau nama mai welingu la pahunga dangu la patama, halla hina uhuku pangangu dua danyai Abraham, Isak, hamanai Yakub la pahanganji Surga, ¹² taka da ana-ana pahanganji nuna pawarunguha la pangia makapatangu la marihi pa kapatangu. Lai nu djiaya na hii padudurungu dangu na pangihing gandu aka. ¹³ Halla, hi Yesus wananya na kapala tentara nuna, Lakuwa, mata kana njadiwa lai nyumu hama djiangu napa parahayamu. Halla, la rehi nuna ma, na atana bana panjangu.. ¹⁴ Bana taka ka hi Yesus la uma nai Petrus,Nyuna na ngitaya na ina yeranai Petrus bana katuda ba kanggaduku nanya. ¹⁵ Hala, hi Yesus hina damaya nalimana na kawini nuna ka munangu ma ananya na kanggadukuna. Halaka hadangu nanyaka hina palokunya pangangu hi Yesus. ¹⁶ ba mareni rudungu naka, hida gandinya bada dangu da tau parunuku wandi akatu, halla hi Yesus hi nawanggaha da wandi-wandi akatu nuda wangu hauma a kareuku, hala hina pa panjanja mbulu halada da tau dama hidu, ¹⁷ mata kana padeninguwa na pambada pataka nai wunang Yesaya: " Nyuna maka nama tanggu pitiha da malai malijangu nda nyuta dangu nama tanggunja da panyaki nda nyuta." ¹⁸ Nu, halla bana itahaka da tau dangu pariana hi Yesus, halla Nyuna hina wuangu pareta lapa pala la hapapa. ¹⁹ Halla, na haatu ma pingu uku Taurat na mai hina pabanjaru dua-Nya, " Guru, kaku kikunya la nggi biaya na ngia palaku-Mu." ²⁰ Halla, hi Yesus hina pabanjaru duanya hiwananya," da banda mbeni ningu ngia pa mauda dangu dama dama hawurungu ningu hibuda. Taka, na Ana Tau nda ningu a ngia pabanjalu nanya na katiku-Na." ²¹ Na haatu nama kiku-Nya hina pabanjaru da-Nya" Miri, pulingga kaku lua paku pataninya na amanggu." ²² Halla, hi wanai Yesus, " Kikungga Nyungga, mata bianya na tau meti kana taningu hama tau metina." ²³ Dangu, bana heika hi Yesus la tiana, dama kiku-Nya hida karia-Nya. ²⁴ Dangu, ngitaya, tungu nanyaka na galingu bokulu la tamma hallaka na tiana hina padabinya galingu. Hala, hi Yesus katuda nanya. ²⁵ Dangu, dama kiku-Nya damai tuamaya hi Yesus hida bengi-Nya, wadanya, " Miri, pamana nggama! Meti ndanyaka!" ²⁶ Dangu, Nyuna hi wananja nyuda, " Nggikina hi mangadatu, ha nyimi maha kudungu parahayami?" Halla, hina ndualaku hina kayambakunya na ngilu dangu na Tamma nuna, halla kamandalu madua nanyaka. ²⁷ Halla, da tau nuda ka hangataru danyaka hala hi wada, " Nggara tauyaka Nyuna yiana, na ngilu dangu na tamma da karudukunya?" ²⁸ Bana takaka la hapapa tamma, la pangia tau Gadara, da tau madua da parunuku wandi akatu da pahamburu da-Nya. Nyuda da luhu welingu la reti wangu karau etida hinda ningu a tau malaku li la anda lai nu. ²⁹ Dangu, ngitaha, nyuda bada wara, hi wada, " Ngarayaka na pawukumu Nyumu lai nyuma, ha Ana nai Allah? Mai mu-Nya lapa pamayila kamaka la dalu ndedi djiaya na rehina?" ³⁰ Dangu, na marau hakudu welingu lai nyuda na ngiapa ninja da wei dama talanga himbuda pangada. ³¹ Da heitangu nuda da karaiya Nyuna hiwada," Jaka mbuhangu Munya papaluhu kama, paraha nggama kama lelingu la wei nuda." ³² Halla, hi Yesus hiwananja nyuda, "Lakuwa! Hala, kaluhu danyaka hida laku la wei nuda. Hallaka, da wei nuda hida palirungu la kiala hida tama la tamma hida meti la wai. ³³ Da tau dama pawanja da wei nuda hida palai, hala hida tama la paraingu, hida pakaluaka hallanya rukuna nuna, hamang mai nama tumbu la wikida da tau da parunuku wandi akatu nuda. ³⁴ Dangu, ngitaya, mbu halana la paraingu da luhu la patabukuya hi Yesus. Bada itayaka hi Yesus, da karaiya kana marau welingu la pangiada nyuda.