DA KAHILI DANYA HI MIRI YESUS NDUMANG LA PA PAMETIYA (Mrk. 14:1-2;Luk. 22:1-2; Yoh. 11:44-53) ¹ Ba na halaka hi Yesus la pa pani halaha yiada, hala Nyuna hina paninja dama kiku-Nya, ² Mi pinya ba dambu lodu kinaka na lodu Paskah, hala na Ana Tau hi wuaya ndumangu la paharika-Nya. ³ Hala, da ratu bokul dangu da ama bokul banjaru nuna da pahamangu la uma Ratu bokul, nama tamungu Kayafas. ⁴ Hala, nyuda da pahamangu kata yapaya hi Yesus ba wangu mahinda hala kata pametiya Nyuna ba wada. ⁵ Taka hi wada, ambu ta palaku duya la rehi mbabu ka ambu na pariu raungu na tau dangu. ⁶ Nu baninya la betania hi Yesus, la uma nai Simon na ma hidu killa, ⁷ Na haatu na tau kawini na mai lai Nyuna hina ngandi hau boti kuduna na minyak nama mbi hingat nama mbotu wilina, hala na tau kawini nuna hina burinya la pinu katiku nai Yesus ba talanga uhukuna na pangangu. ⁸ Bada ngitayaka nama tuna nu dama kiku-Nya, ka mbeni danyaka hala hi wada, ka nggikina hi padimanya yiana? ⁹ Na minyak nama mbi hingat nuna djaka dangganya hala na wilina ka wuanja da tau milla. ¹⁰ Taka, hi Yesus, hi wananja nyuda, ka nggikina himi pahandukaya na kawini yiana rukuna nuna? Tu nanya na mahamu duku lai Nyungga. ¹¹ Nama mila bani manu manya lai nyimi, taka Nyungga nda ni manu angga lai nyimi. ¹² Bana burinya nama mbi hingatu na ihi-Nggu, nyuna paloku nanya la patani-Ngga. ¹³ Langa taka kaku paninggai, la nggi bia na ngiapa buabaruya na Injil yiana la nggubulu pinu tana, nggaraya napa mbada palakuna na tau kawini yiana papani manuya ka pangada wa manunya nyuna. ¹⁴ Hala, na haatu welingu la tau hakambulu madua, nama tamungu Yudas Iskariot, na laku la Ratu bokul, ¹⁵ Hala hi wana, nggaraka pa wua mingga nyungga djaka ku wua nggainya Nyuna lai nyimi? Hala, nyuda hida wuanya nyuna 30 amahu bara. ¹⁶ Taka,piti welingu la rehi nu, nyuna hina himbu rehi ma hamu lapa wuaya hi Yesus. ¹⁸ NA PANGANGU PASKAH Mrk. 14:21-22;Luk. 22:7-14;Yoh.13:22-30 ¹⁷ Nahu, la kawunga lodu Roti nda ningu ragingu, dama kikungu da mai lai Yesus hala hida pa arangu, mala la ngginika nu ka paloku niya na mbabu Paskah nduma mu Nyumu? 18Na hiama hi Yesus, luawa la paraingu, la haatu tau, hala ka wami-Nya, mareni nanyaka na rehinggu, wana hi Guru. Nyungga kaku palokuya na Paskah la umamu pakariangu dama kiku-Ngga. ¹⁹ Da makikungu da nunju halaya panamatunya na pa paninja hi Yesus, hala hida palokuya na Paskah nuna. ²⁰ Nu, bana rudung ka, hi Yesus na mandapu pakariangu da hakambulu madua dama kikungu hala hida ngangu. ²¹ Hala, ba talanga ngangu daka, hala wanaka Nyuna, langa taka Ku paninggai nyimi na haatu welingu la huangami djiaya nama kaliaka-Ngga. ²² Ka handuka halawalla danyaka nyuda, hala hida marangga pa ara-Nya, nda, nyungga a nyuna, Miri? ²³ Hala, hina hiama Nyuna, nyuna nama labu dangga limana la kaba moku, djiaya nyuna maka nama kaliakangga Nyungga. ²⁴ Na Ana Tau djiangu maka bana laku hama tuna na pambada tulihu rukuna Nyuna.Taka, ura dedi nanyaka na tau nuna, ka ba lailu nyuna duka hi kaliakanya na Ana Tau! Na rihi hamu biapa lati nyuna ambu ka padediya. ²⁵ Hala hi Yudas, nama mbuhang pawuaya hi Yesus, hina pa ara-Nya, nda nyungga a nyuna, Rabi? Na hiama hi Yesus, ba mbada pani ma dumunyaka. ²⁶ Ba djiayaka na nganguda, hi Yesus na pitiya na Roti. Dangu, bana halaka pa pakanyurunya, hala hi Yesus hina kawitaya hala hina wuanja dama kikung hala hi wana, Pitiwa dangu nganguwa, yiana yaka na tolu-Nggu. ²⁷ Hala, hina hili pitiya na kaba wai, hina pamalangungu, hala hina wuanja nyuda, hala hi Wana, hi ununguwa nyimi welingu lai yohu. ²⁸ Kanadu, yiana yaka na wai ria-Nggu, wai ria parandingu, nama mbungu nduma tau dangu nduma pa aingu wangu njala. ²⁹ Langa taka kaku paninggai Nyungga ndaku hili unung apa welingu la pingi anggur yiana, weli nahungu lupa taka la lodu nuna, baku unu danggai anggur ma bidi la pahanganjina na Ama-Nggu. ³⁰ Bada halaka pa wunda hau ludu wotungu, hala hida laku la palindi Zaitun. HI PETRUS BANA PAHININYA HI YESUS (Mrk.14:27-31;Luk. 22:31-34; Yoh. 13:36-38) ³¹ Hala hi Yesus hina paninja dama kikungu, la rudungu yiana maka nyimi bai tunjuru lalu ruku Nyungga. Kaba nidunya na patulihu, napa Nyungga ku paluya nama pawangu, taka da kababa mbimbina hida tanyalangu. ³² Na nyuna, djaka Ku luri belika, Nyungga ku mangilu nggai nyimi la Galilea. ³³ Ka pani nanyakai Petrus, nyuda hawiangu da tunjuru lailu ruku Nyumu, nyungga nda djia tunjuru anggu. ³⁴ Na hiama hi Yesus, langa taka Nyungga ku paninggau la rudungu nahu ma, ba ndedi na hakuku na manu, hu pahiningga pandailu wundangu. ³⁵ Na hiama hi Petrus wana-Nya, djiapa ku meti karin-Nggau, nda djia pahini anggau Nyumu! Mbu halada dama kikungu djia hala maya napa panida. ³⁶ Hala kataka danyaka hi Yesus dangu dama kiku-Nya la pangia nama tamungu Getsemani hala Nyuna hi wananja nyuda dama kiku-Nya, uhukuwa lai yohu, ba luma laku Nggunya pa hambayangu. ³⁷ Hala, hina karianya hi Petrus dangu ba tau maduaha da anana hi Zebedeus dama karia-Nya, hala Nyuna pakiringu nanyaka pa handuka dangu pahidu na etina, ³⁸ Hala, hiwananja nyuda, na Eti-Nggu lalu handukaya, djangu nama mbuhang pametika baku padanya. Ndadikuwa lai yohu dangu kai pawala da-Ngga. ³⁹ Hala, hina marau hawutu, hina patika hina pudukuya na tana, hi wana bana hambayangu, Ama-Nggu djaka na peku, pamarau aru kiya na pamayila wangu welingu lai Nyungga. Na nyuna, ambu djiaya na pambuhanggu Nyungga, taka djiaya na pambuhamu Nyumu badi. ⁴⁰ Hala kabeli nanyaka la makiku-Nya ba talanga katuda da. Hala, hina paninya hi Petrus, ndai maka ma lapa pawala dangga Nyungga ana hau jamu? ⁴¹ Rimangu dangu hamayanguwa ka ambi kanabu la mapa kamangu. Na Ngahu na paka pipima taka na tolu na malidjangu. ⁴² Na hili laku panduangu wangu hi Yesus pa hamayangu, hi Wana, Ama-Nggu, djaka ndana njadi ma dupa yiana pa marau djiaya Baku unu ma anyaka, na pawuku-Mu nyumu aka nama njadi. ⁴³ Hala, hina beli na tuamanja ba talanga katuda da nyuda kaba mbotu madanyaka da matada. ⁴⁴ Hina matanja nyuda, hina hili laku handakangu, hina hili hambayangu pandailungu wangu, hina hili paniha da pambada panina kawai. ⁴⁵ Halaka nu hina beli lama kiku-Nya hina paninja, katudawa nahu kai hangilu. Ngitaya, mareni manayaka na rehina na Ana Tau ba wuaya la lima tau manjala. ⁴⁶ Hadanguwa, maiwa kata laku. Ngitaya, na tau nama wuaka Nyungga ba mareni nanyaka. ⁴⁷ Ba talanga pani napa hi Yesus, hi Yudas, na haatu welingu la hakambulu madua dama kikung nu na mai. Nama mai karianya nyuna, na dangu na tau nama ngandi hapanda dangu kadipu ai, welingu la ratu kapala dangu ama bokul banjaru nuna. ⁴⁸ Nahu, nama kaliakanya hi Yesus na wuangu hau tanda, wana, Nggamuya na pa pudukunggu, djiamayaka Nyuna, yapa yawa Nyuna. ⁴⁹ Hala hi Yudas hina ndaharungu lai Yesus hala hi wana, tabiwa Rabi! Hala, hi Yudas hina puduku-Ya. ⁵⁰ Na hiama hi Yesus, angu mbuhanggu palakuyawa na pamai wamu. Halaka da tau dangu hida ndaharungu, hida dama wanya limada hi Yesus, hala hida yapa-Ya. ⁵¹ Ngitaya, na haatu welingu lai nyuda nama kikunya hi Yesus, na padjualaya na limana, hina butuhuya na hapandana, hala hina latakuya na haatu atana na ratu bokul, na katahuya na kahiluna. ⁵² Hala, hi Yesus hina paninya, patiku belinya na hapandamu, mbu dabana na tau nama wangu hapanda napa pa pameti wangu hapandaya. ⁵³ Ka ndana maka ma pakarai pandulangu la Ama-Na wamingga, hala Nyuna, la rehi nahu mbu, hina pangandingu hakambulu dambu tantara Malaikat ma padjurungu nduma- Nggu? ⁵⁴ Taka, ka nggiki hama padeningu naka na Mbuku Yahangu nama wana lupangu maduka badi ka tuna nu, nama wana? ⁵⁵ La rehi nuna, hi Yesus na paninja da tau dangu, mala hama djangu na tau bohuka Nyungga himi luhu ngandingga hapanda dangu kadipu ai bai yapaka? Nimbihu lodu, Nyungga ni manu mangga la Uma Allah baku pa piakangu hala hi ndai yapa Akai? ⁵⁶ Djia batuna, mbu halana yiana mata kana padeningu halawa na patulihu da da wunangu. Halaka nu, mbu halada dama kikungu hida palai warunya Nyuna. ⁵⁷ Nyuda dama yapaya hi Yesus da ngandi-Ya lai Kayafas, na Ratu Bokul, pangiada da mapingu Taurat dangu da ama bokul bada pahamangu. ⁵⁸ Hala, hi Petrus na ndutu marauya hi Yesus lupa na taka la taluara uma na ratu bokulu. Hala, hi Petrus na tama, hina uhuku danja dama dai lai nu hina tangruya lundu njapuna. ⁵⁹ Nu da ratu kapala dangu mbu halana nama batangu da himbu hakahi kambaliku ka peku huku pametiya hi Yesus ba wada. ⁶⁰ Taka, nda da ngalangu a djapa bada dangu da hakahi kambaliku dama mai. Hala, hi ninja da tua madua dama taka, ⁶¹ hida pani, wana na Tau yiana, Ku maka la panyunggurya na Uma Allah tailu mbua lodu Anggunya baku pahada belinya. ⁶² Hala na Ratu bokul na hadangu hina pani lai Yesus, Mala kanda ningu mapa pahiama wamu nu? Nggaraya na pakala wada-Nggau da tau yiada? ⁶³ Taka, kandi ma ananya hi Yesus. Taka, na hili pani na Ratu bokul lai Yesus, Nyungga ku hupa Kau wanya hi Allah nama luri ka peku pakaluaka munggama, djaka djiakau ka Myumu Mesias, Ana nai Allah nama maluri? ⁶⁴ Na hiamaya hi Yesus, ba mbada pani ma dumunyaka. Taka batuna, ku paninggai ba piti welingu nahu bai ngitaya na Ana Tau bana uhuku la kawana na nama Mbiha manyuala, hala hina mai la pinu karumangu la awangu. ⁶⁵ Halaka, na Ratu bokul hina hiraya na katarina dangu hi wana, palapingu mananyaka Nyuna! ka nggara yapa hita hili himbu hakahi? Ngitaya, nahu mbada rongu wiki maminyaka na palapingu-Na. ⁶⁶ Mala nggiki wamika? Da hiama da makapipi la Yahudi nuda, huku pameti maya badi Nyuna. ⁶⁷ Halaka, hida panganjiya na mata-Na dangu hida palu-Ya. Hala, hawiangu hida taba-Ya ⁶⁸ Hala hiwada nyuda, Hu pani nggamawa nahu, djaka nggamu nama palukau Nyumu. ⁶⁹ Nu, hi Petrus na uhuku la taluara la hambeli hala na haatu na tau kawini nama paloku na mai lai nyuna hala hi wana, nyumu angunai Yesus, tau Galilea mbu du kau. ⁷⁰ Taka, hi Petrus na pahiningu la hanggada nyuda mbu halada, hi wana, ndaku pi anya djaka nggaraya na papani wami. ⁷¹ Taka bana luhuka welingu la pindu taluara hi Petrus, na haatu na tau kawini nama paloku na ngitaya nyuna, na Tau yiana angu mada dangui Yesus welingu la Nasaret nuna. ⁷² Hala, hili pahiningu mananyai Petrus wangu haranguna, Nyungga ndaku tanda maya na Tau nuna. ⁷ ⁷³ Ndedi nggi mandaina, da tau dama ndualaku lai nu ka mai danyaka la Petrus, hi wada, nyumu mbu yiana haatu welingu lai nyuda makau badi kanadu na kareukumu djiaya na ngiapa pinggau. ⁷⁴ Hala, ka pakiringu nanyakai Petrus pa pahupa dangu hina harangu, hi wana, ndaku wangu patanda maya na Tau nuna. Hala, ndapa mbuti anya, na manu bana hakuku. ⁷⁵ Hala, hi Petrus kanamu nanyaka na papanina hi Yesus, ba ndedi na hakuku na manu wulu, mbada pandailu wundangu muka papahiningga Nyungga. Halaka, ka luhu nanyaka hi Petrus hina hii ba lalu handukaya.