Hi Yesus bana pani wanja dama kapipi Agama Mrk. 12:38-40;Luk. 11:37-52; 20:45-47 ¹ Hala, hi Yesus hina pani danja da tau dangu tumbudai dama kiku-Nya, ² Dama pingu Taurat dangu da tau Farisi da uhuku nyaka na kanjaka nai Musa. ³ Taka batuna nu, mbu halana, na pambada pani danggai, palakuyawa dangu patanda manya. Taka, ambi palaku duya na papalaku ba wada, kanadu nyuda ba nda dapalaku duya. ⁴ Nyuda da honduya nama mbotu hala hida padukunya na tau hawiangu. Taka, nyuda wiki nda da mbuhangu a pa paleli wanya wangu wua lima wikida. ⁵ Nyuda da palakuya na pa palakuda kana ngita kama tau ba wada. Nyuda da pambalaruya na liku hambayanguda dangu da pabokuluya da ruu mata kalembida. ⁶ Nyuda da mbuhang pa uhuku la pangia patembi la mbabu, ngia pa uhuku la ngaba da la sinagoge, ⁷ na tabi patembi la pangia madangu, dangu Rabi ba wananja Tau. ⁸ Taka, nyimi ambu pani dunggai Rabi kanadu ba haatu ana na Gurumu, dangu nyimi mbu halami mapa angu dedingukai. ⁹ Nggamu biaya ambu djia panimu nyaka Ama la pinu tana yiana ka ba haatu ana na Amamu, djiaya Nyuna a nama ninya la Surga. ¹⁰ Ma kapipi ambi wada dunggai kanadu ba haatu ana nama kapipikai, djiaya hi Kristus a. ¹¹ Djia batuna, nama bokul la huangami, nyuna na njadi ma palokunggau. ¹² Nggamuya nama pajanggangu wikina papakiandaruya dangu djaka nggamuya nama pakiandarungu wikina papajanggaya. ¹³ Ura dedimiyaka nyimi, ma pingu Taurat dangu tau Farisi, tau ma kambalik! Nyimi hi bitanya na pindu Surga la hangga tau madangu kanadu nyimi wiki ba ndai tama anya dangu mbu ndai pahia anja nyuda dama mbuhang patama kada tamanya. ¹⁴ Ura dedi minyaka nyimi, ha mapingu Taurat dangu tau Farisi, tau ma kambalik! Bai tamanja da umada da tau meti lei dangu bai harawuku nyimi pamalaiha da hambayangumi. Taka, nyimi daingu ngala minyaka na hukungu nama rihi mbotu. ¹⁵ ura dedi minyaka nyimi, ha mapingu Taurat dangu tau Farisi, tau ma kambalik! Nyimi bai winggirunya na tehiku dangu nama madu ndumangu lapa iru ngandiya na tau lapa tama la Anggamamu. Dangu, djaka na njadika haatu angumu, hala nyumu hu panjadiya nyuna ana neraka, pandua wundangu welingu lai nyumu. ¹⁶ Ura dedi minyaka nyimi, ha makapipi mangu pokingu, ba wami, nggamuya nama hara wanya na Uma Allah, nyuna pahonduya lailu na haranguna nuna. ¹⁷ Nyimi, ma nduba dangu mapoki! Nggiyapa nama rihi bokul, na amahu djaka ndia na Uma Allah nama katuaya na amahu nuna? ¹⁸ Dangu, djaka nggamuya nama harangu wanya na altar, na haranguna nda ningu a linguna. Taka, nggamuya nama harangu wanya na maraku la pinu altar nuna, nyuna pahonduya dangu na haranguna nuna. ¹⁹ Ha nyimi tau mapoki! Nggiyapa nama rihi bokul, na maraku djaka ndia na altar nama katuaya na maraku nuna? ²⁰ Ruku nuna, nggamuya nama, na harangu wanya na altar dangu mbu halada da maninja la pinuna. ²¹ Dangu, djaka nggamuya nama harangu wanya na Uma Allah, dangu wanya Nyuna nama ninya la kuru uma. ²² Dangu, nggamuya nama harangu wanya na Surga, nama harangu wanya na kanjaka hanganji nai Allah, dangu wanya Nyuna nama Uhuku la pinuna. ²³ Ura dedi minyaka nyimi, mapingu Taurat dangu tau Farisi, tau makambaliku! Nyimi hi wuangu persepuluhan welingu la selasih, adas manis, dangu jintan, taka hi matanya nama rihi mbotu welingu la Hukung Taurat, na lanyapu, na panamungu dangu na Iman. Lupangu maduka badi nyimi bai palakuha yiada hala ambi mata bianjai hawingu. ²⁴ Nyimi ma pairungu mapoki kai, na kalombuhu hi sarinya taka na unta hi kawalukunya! ²⁵ Ura dedi minyaka nyimi, ma pingu Taurat dangu tau Farisi, tau ma kambaliku! Kanadu, da kaba wai dangu da kawinga mi bai baha pama nandanja na kadjia da, taka da kuruda mbinu danya wangu pabohu dangu manganga eti. ²⁶ Nyimi, tau Farisi ma poki! Pama nanda pakunja da kuruda da kaba wai dangu da kawinga mi, hida njadi pama nandangu da kadjia da. ²⁷ Ura dedi minyaka nyimi, ma pingu Taurat dangu tau Farisi, tau ma kambaliku! Kanadu, nyimi ba hama djangu na reti napa pabara wangu cat, ba ngitaya na kadjiana ba dira manadanguya, taka da la kuruna mbinu nanya rii kawudu tau meti dangu ma marihaku. ²⁸ Tuna numbui nyimi, nama ngiangu la peku ngita angumi ma hamu halaya. Taka, na maninya hu da la kurumi mbinu wangu nanya ma kambaliku dangu ma akatu. ²⁹ Ura dedi minyaka nyimi, ma pingu Taurat dangu tau Farisi, tau ma kambaliku! Kanadu, nyimi bai pahadanja retida da wunangu dangu bai pama nandanja da penjida da tau tuturu, ³⁰ Hala hi wami, jaka mbada ningga maka lati ba ninjapa da boku apuma nyuma, nyuma ndama piti a ndumama la wai riada da wunangu. ³¹ Lata nuna, hi pahaka hingu la wikimi nyimi ba anada nyudakai dama pametiha da wunang. ³² Njadi, ngganapu nanyaka na hukutu da boku apumi. ³³ Nyimi, ular, wala wua nai ular mbeni, nggiki hama pahala mika wikimi welingu la hukungu neraka? ³⁴ Ruku nuna, ngitaya, Nyungga ku paliawaha da wunangu, na tau manggana, dangu dama pingu taurat lai nyimi. Da Hawiangu hi pametiha dangu hi harikanja, taka hawiangu hi paluha la sinagoge- sinagogemi, dangu hi pama yilaha welingu la hau kuatak- hau kuataku, ³⁵ Matawa da wai riada tau dama padeningu dama mbungu la pinu tana kada kabeli lai nyimi, welingu la wai rianai Habel, na tau nama padeningu nuna, lundu taka la rianai Zakaria, na ananai Berekhya,na papa metimi la njuanga da Na Uma Allah dangu na altar. ³⁶ Nahu, Nyungga ku paninggai nyimi mbu halana yiana na taka la nyimi nahu. ³⁷ Oh, Yerusalem, Yerusalem, dama pemeti wanja watu da wunangu da papaliawa lai nyuda. Dira mbuhanguka lapa pauhinja da anamu, hama djangu na manu inana nama pa uhinja da anana la lumbu ru kapana, taka nyimi ndai mbuhangu a. ³⁸ Ngitaya na umamu ba mbada warunyaka hina malinggitu. ³⁹ Kanadu, Nyungga ku paninggai pakiringu nahu, nyimi ndai hili ngita akapa Nyungga lupa hi wami, pa Pakanyurungu yaka Nyuna nama mai wanya na tamu nai Miri.