BADA NGGEPIYA HI YESUS HAMA DJANGU NA MARAMBA Mrk. 11:1-11;Luk. 19:28-38;Yoh. 12:12-19 ¹ Bada mareninyaka la Yerusalem dangu bada takaka la Betfage, la palindi Zaitun, hi Yesus na paliawaha dama kiku-Nya; ² hala Nyuna hina paninja nyuda, lakuwa la ndeha na pahanggami, halaka hi tabukuya na heu keledai na pahondu dangu na ana na nuna na keledai bada pa angungu. Kai wakahuya na hondona hala kai ngandiha lai Nyungga ba dua ngiuda. ³ Taka djaka ningu tau mapa aranggai, wami timi nu, hi Miri nama paraluya, daingu lu pabeli manaha. ⁴ Mata yiana kana padening halawa garaya napa mbada panida da wunangu: ⁵ pani nyawa na anana kawini hi Sion, ngitaya, na maramba na mai lai nyumu, na kendar eti, dangu na kaliti heu keledai, dangu heu keledai larina, anana na keledai kalatu. ⁶ Laku danyaka da tau makikungu hala hida palakuya panamatunya na paparaha wana njai Yesus. ⁷ Hala nyuda hida ngandiya na keledai nuna pakarianya na anana, hala hida walahu ha da kalembida nyuda la kadjia keledai nuda, hala hina uhuku hi Yesus la kadjiana. ⁸ Hala hawiangu da tau dangu hida walahu ha da kalembida nyuda la anda, taka hawiangu hida katahi lai ai, hida banjalu la anda. ⁹ Na dangu na tau nama laku mangilu-Nya hala nyuda dama ndaki-Ya hi wada bada wara, Hosana na Ana nai Daud! Pa pakanyurungu ya Nyuna nama mai wanya na tamu nai Miri. Hosana nama ninya la pangia ma djangga! ¹⁰ Bana tamakai Yesus la Yerusalem, mbu halana na ihi kuatak ka kayanggaku nanyaka. Hala nyuda hida pa arangu, Nggamuyaka Nyuna yiana? ¹¹ Hala, nahiama da tau dangu nuda, Nyuna djiaya hi Wunang Yesus, welingu la Nazaret la Galilea. ¹² Hala, hi Yesus hina tama la Uma Allah hina wanggaya na tau nama talanga danggangu na la Uma Allah, hala hina pambeli halanja da menja da ngia papa njiapanguda ndui dangu da kanjaka da nyuda dama danggangu mabohu kulundiha. ¹³ Hala Nyuna hi wananja nyuda, Pa mbada tulih mayaka, na Uma-Nggu uma ngia pa hambayanguya, taka nyimi hi panjadi minyai hibu tau bohu. ¹⁴ Hala, da tau poki dangu da tau kalipar da mai lai Nyuna la Uma Allah hala Nyuna hina papanjanja. ¹⁵ Taka, bada ngitayaka na mbiha papalaku nai Yesus pariada da ratu kapala dangu dama pingu taurat dangu bada ngitaha da anakiada dama wara la Uma Allah, Hosana ndumana na anai Daud, ka mbeni danyaka nyuda. ¹⁶ Hala, nyuda hida pa aranyai Yesus, Mala Nyumu hu ronguha da papanida da anakiada yiada? Hala, Yesus hina hiamaha nyuda, U. Ndedi hi kali mbaha aya, welingu la ngaru anarara dangu la anakiada dama huhu, mbada hawanjiru mamunyaka na wotungu nduma-Mu.? ¹⁷ Hala, hi Yesus hina laku warunja nyuda hina luhu welingu ka kuatak nuna na hanggangu la betania hina todu lai nu. ¹⁸ Nahu, la mbaru , bana belikai Yesus la paraingu, ka manju nanyaka Nyuna. ¹⁹ Hala, hina ngitaya na pingi ara la halinggi anda, hala Nyuna hina lua tuamaya taka nda ningu apa pangalana, didiha da rau anaka. Hala, Nyuna hi wananya na pingi ai nuna, "Nda djia ningu apa wuamu lundu nunu! La rehina nu ma aka bana meti na pingi ara nuna. ²⁰ Taka bada ngitayaka nama tuna nu dama kikungu, ka hangataru danyaka hala hida pa arangu, nggiki hama bianaka na pingi ara yiana hi meti ma ananya la rehi ni? ²¹ Hala, hi Yesus hina hiamaha nyuda, wanggunggai nahu, djaka ninya na iman mi dangu djaka ndai ndua ndandi, nyimi nda jia biaya bai palakuya hama djangu na papalaku ba hangganya na pingi ara yiana, taka nyimi djaka waminya na palindi yiana, lelinguwa hala kau tandaningi la tehiku, nuna padaingu njadi mana. ²² Dangu, mbu halana na pakaraimi la hambayang, parahaya ya, padaingu ngala maminya. " DAMA KAPIPI TAU YAHUDI DA NDUA NDANDINYA NA KUAHA NAI YESUS Mrk.11:27-33;Luk. 20:1-8 ²³ Bana tamaka hi Yesus Uma Allah, da ratu kapala dangu da ama bokul tau Yahudi da mai lai Nyuna ba talanga papiakanguna Nyuna hala hida pa arangu, Nggara kuahayaka Nyumu hu palakuya mbu halana yiana? Dangu, nggamuka nama wua-Nggaunya na kuaha yiana? ²⁴ na hiamaha nyuda hi Yesus, nahu Nyungga ku pa aranggainya na habata yiana, djakai njadi nyimi pahiamaya, Hala Nyungga kaku wangu pa paninggainya djaka nggi pawelina na kuahanggu Nyungga lupa hiku palakuya mbu halana yiana. ²⁵ Langgi pawelina na parunguna hi Yohanes? Pawelina la Surga djaka ndia hi pawelina la tau? Hala, ka pambanjarungu danyaka nyuda la hapa djiaha, hiwada, taka pawelina la Surga djaka wanda, djaka tuma duna, ka nggikina hi ndai parahaya ya hi Yohanes? daingu wana daka Nyuna ²⁶ Taka, pawelina la tau, djaka wandai ba tahiamaya. Ta mangadatunya na tau dangu ba wunanguya hi Yohanes ba wada du. ²⁷ Taka, hi wada bada hiama yai Yesus, ndama pi anya. Hala, hi wanai Yesus, djaka tuna nu, Nyunggai duku ndaku pani anggainya djaka nggi pawelina na kuaha hi kupalakuya nama tuna yia. ²⁸ Malla, nggiki wamika nahu? Ninya na haatu nama ningu anangu mini tau madua, hala hina mai lama maaya hala hiwananya, AnaNggu, la lodu nahu lakuwa kau rama la wuaka anggur. ²⁹ Hala, hina hiama nyuna. Uu, Ama, la hambeli naka nuna nyuna ndana laku a. ³⁰ Halaka nu na amada na hili laku lama ma eri hala hina paninya hama djangu² na pambada pani wana. Na hiama nuna na anakiada, ndaku mbuhangua, taka na kahala iara hala hina laku. ³¹ Nggamuyaka welingu la anakiada tau madua nuda nama tuturu la amada? Da hiama nyuda, nama malamiri. Ka wana njaka Hi Yesus, langa taka, Nyungga ku paninggai dama pauhing hilu katiku dangu da tau dama njuraku da mangilu nggai nyimi patama la pahanganji nai Allah ³² kanadu, bana mai hi Yohanes lai nyimi nali la anda mapadening taka nyimi ndai parahaya aya, taka, dama pauhing hilu katiku dangu dama njuraku da parahaya ya. Dangu, nyimi, bai ngitayaka nama tuna yia taka ndai kahala iara maki la hambelina nuna kai wangupa parahaya ya. ³³ Patinginya na pangiarang na hau. Ninya nama ningu wuakangu hina pamulanya anggur, hina tunya uaka winggiruna, hala hina aki ngiapa pohu anggur, hala hina pahadang uma. Halaka, nyuna hina hewaha ba tau mapiraha dama ramaya na wuaka, hala nyuna hina laku la hau tana. ³⁴ Ba jiayaka na rehi wuada, hala nyuna hina paliawaha da atana la tau dama maramaya na wuaka nuna la pakeiha da wuada. ³⁵ Taka, dama ramaya na wuaka da yapaha da papaliawa nuda hala hida paluya na haatu, taka na haatu hida pametiya, hala hawiangu hida tuku wanja watu. ³⁶ Taka batuna, na mangu wuakangu nuna na hili paliawa mahapa da atana hawiangu, da rihipa padangu welingu da pambada paliawa mangiluna. Hala, da tau dama rama wuaka nuda kahili djiamayai napa palakuda lama mbada mangilu. ³⁷ lundu, na mangu wuakangi na hili paliawaya na ana wikina lai nyuda, nyuda da tembi liaya una na ananggu, wanaka. ³⁸ Taka batuna, bada ngitayaka na ana wikina pariada tau marama wuaka nuda, ka wadaka la hapa djiaha, nyuna djiayaka napa nama nggepiya na kangiaha, mala kata pametiya nyuna kata wahiya na kangiaha na. ³⁹ Hala, nyuda hida yapaya na anana na mangu wuakangu nuna, hida ndauhaya la hambeli wuaka anggur, hida pametiya. ⁴⁰ Lailu nuna, bana taka ka nama mangunya na wuaka anggur nuna, nggarayaka na papalakuna bana hanggannja nuda da tau dama rama wuaka? ⁴¹ Hala nyuda hi wada-Nya, ka pameti duna haka da tau akatu nuda dangu rihi bana etina, hala hina hewanya la tau marama hawiangu, dama njadi la pawuanya ihina la rehi papu. ⁴² Hala hi Yesus hi wananja nyuda, Mala ndai kali mbaha aya da la buku pulungu: na watu na pawaruda da tukang na njadika watu tunggul. Rukuna yiana na njadika lai Miri, dangu yiana pahangatarunguya nyuta bata ngitaya? ⁴³ Lailu nuna, nahu Nyungga ku paninggai, na Pahanganji nai Allah pa pitiyaka welingu lai nyimi hi wuaya la tau hawiangu nama njadi patunya wuana welingu lawikina. ⁴⁴ Dangu, djaka nggamuya nama kanabu la pinu watu yiana na mbiara ladjaru; dangu djaka nggamuya napa pitakuna na watu yiana na ladjaru. ⁴⁵ taka bada ronguyaka na pangiarangu-Na nuna pariada da ratu kapala dangu da tau Farisi, ka pidanyaka ba paniwanaha nyudaka pariana hi Yesus. ⁴⁶ ba tunaka nu, bada mbuhanguka payapa hi Yesus, nyuda da mangadatunya na tau dangu kaba wunanguya hi Yesus ba wada dika.