GAMUYAKA NAMA RIHI BOKUL LA PAHAGANJI SURGA? Mrk. 9.33-37;Luk.9:46-48 ¹ Larehi nu, ka mai danyaka dama kikung lai Yesus hida paarang,"Gamuyaka nama rihi bokulu la pahanganji Surga?" ² Halaka, hi Yesus hina pa aunya na anakiada kudu lai Nyuna, hala hina tuya na akiada kudu nuna la padua da nyuda, ³ hala hiwana," nahu Nyungga kupaniya nama padeningu lai nyimi, djakai manjaria dangu ka ndai njadi anakiada, nyimi nda djia njadi ami la patama la pahanganji Surga. ⁴ Gamu nama pa kiandarung wikina hama djangu na anakiada yiana djiaya nama rihi bokul la pahaganji Surga. ⁵ Dangu, djaka gamuya nama katakuya na ana kiada hama djangu yiana la tamu-Nggu, nyuna kataku nangga Nyungga. PA INGANYA NAMA PAWITINYA NA NJALA Mrk.9:42-48;Luk. 17:1-2 ⁶ Djiaba tuna nu, djaka gamuya nama panjaranya na haatu ana kiada kudu nama parahaya lai Nyungga yiana, na rihi hamupa nyuna na watu pianang ka tiwalunya la goruna hala ka patadaninya la tehik nama rihi majolung. ⁷ Ura dedi nanyaka na pinu tana kanadu dama panjarangu baninja lai nu! Kanadu, dama panjarangu ba daingu nimanya, taka ura dedi nanyaka na tau nama patumbuya. ⁸ taka djaka na lima mu djaka ndia na wihimu nama pawiti nggau hu njala, kadipuya kau warunya nuna. Na rihi hamupa bau tama la luri wangu kapungga limamu djaka ndia bau kanjiku welingu bada kadambungu da limamu dangu da wihimu, taka hipa ndauha biakau la epi manda mbada. ⁹ Djaka na matamu nama pawitinggau hu njala rukiya hala kau warunya nuna. Na rihi hamupa bau tama la luri wangu hau mata, welingu bada kadambungu da matamu taka hipa ndauha biakauka la epi Neraka. ¹⁰ Patandanya, ambu djia i munyaka la pamimu pamarahu na haatu anakiada kudu yiana. Taka nahu, Nyungga wanggunggai da Malaikat la Surga dama tangara manuya na rupana na Ama-Nggu la Surga. ¹¹ kanadu, na Ana Tau ba mainanya pa pamannya nama mbulang. ¹² Malla gikina wamuka? Ninya na haatu tau nama ningu 100 ngiu mbimbingu, taka na heu na njarangu, mala ndana mbanjalu aha la palindi hala hina lua pahimbuya na heu nama jarangu nuna? ¹³ Hala, djaka na ngala nyaka, nahu Nyungga kupaninggai, na rihi mbaha etipa lailu na heu nama njarangu nuna welingu da 99 dama nda njarangu. ¹⁴ Tuna numbu, nda pawukuna na Amamu la Surga aya djaka na meti na haatu na anakiada kudu yiana. ¹⁵ Djaka na njala na angu dedimu, luawa kau paninya na panjala wana, nyumu dangu nyuna didi akai badi. Taka nyuna djaka na rongukau, ngala beli dumunyaka na angu dedimu. ¹⁶ Taka, nyuna djaka ndana rongukau nyumu, wanda tau madua djaka ndia tau matailu kariamu mata ka welingu la ngaru tau madua djaka ndia tau matailu hakahi, mata na pakareuku wangu kana mandungu. ¹⁷ Taka, djaka ndana buhangu mai paronguha nyuda, paniyawa la kabungguru. Hala, djaka ndana buhangu mai la paronguya na kabungguru, mata bianyawa ka hama djanguha da banjaru hawiangu dangu dama pauhing hilu katiku. ¹⁸ Nahu Nyungga ku paniya nama padeningu lai nyimi djaka garaya na pahondumu la pinu tana pahondu buyai la Surga. Dangu, djaka garaya napa pahalamu la pinu tana pa pahala mbuya la Surga. ¹⁹ Ku hili paninggau, nahu Nyungga wanggunggau djaka ningu tau madua lai nyimi dama pahamang la pinu tana rukuna na pakaraida, nuna padaingu jadi mana lai nyuda lailuna na Ama-Nggu nama ninya la Surga. ²⁰ Kanadu, la ngia paninja da tau madua djaka ndia da tau matailu dama kabungguru wanya na tamu-Nggu, Nyungga ningga la huangada nyuda. ²¹ Hala, kamai nanyaka hi Petrus lai Yesus hina Paarangu, "Miri, kupambira wundangu kabadi baku ainya na angu dedinggu nama njala lai nyungga? Ku papihu wundang ka badi? ²² Na hiamai Yesus, Nyungga ndaku pani anggau pa pihu wundang hu papihu kambulu kali pihu wundang badi. ²³ Lailu nuna duka, na pahanganji Surga hi pangiaranya hama djangu na haatu maramba nama padiha danja da atana. ²⁴ Bana pakiringka pa padiha danja, na tau nama wutang madangu 10.000 talenta hida karianya lai nyuna. ²⁵ Kandana maka apa nyuna lapa bayarha, dangga nyawa nyuna kawanaka na maramba, lupa na papahana da anana, dangu mbu halada da manguna, ba tuna nu beri bayar manahaka da wutana. ²⁶ Halaka na ata nuna hina patika dangu hina marubukunya na umbuna, wananya, puli kingga lati daingu mana nyungga baku bayar halaha da wutanggu lai nyumu. ²⁷ Halaka, na maramba hina namuya na atana, hala hina pulinya, hala hina wuanya paaing la mbu halada da wutana. ²⁸ Taka, bana luhuka ka pahambur dananyaka na anguna paata hawiangu nama wutang 100 dinar lai nyuna, hina yapaya hala hina kohulya na ata nuna, dang hiwananya, bayar beliha da ndui napa karaimu lai nyungga! ²⁹ Halaka, na ata nama wutang lai nyuna hina patika hala hina kamahinya, wananya, puli kingga lati daingu mana nyungga baky bayar halaha da wutanggu lai nyum. ³⁰ Djia batuna, ndana mbuhang a hala hina patamanya la hukung nuna na anguna lupa hina lunah ha mbu halada da wutana. ³¹ taka bada itayaka nuna mbu halana da ata hawiangu, ka dira handuka haka hida mai lapa paninya na umbuna panamatunya nama tumbu. ³² Halaka, na umbuna hina pa aunya na ata nama mangilu hala hiwananya, nyumu ata makatadakau. Nyungga ku ainja mbu halada dawutangmu lailu bau kamahingga. ³³ Ka ndana peku manu kau namuya na angumu pa ata, hama djangu nyungga baku pangitanya na namunggau nyumu? ³⁴ Halaka, na umbuna, wangu mbenina, bana wuaya lama tanggu pamayila lundu na mbayar beli halaha da pakaraina lai nyuna. ³⁵ Na Ama-Nggu la Surga tuna numa bana palakuya nama pahama djangu yiana lai nyumu, djaka ndau ainya na angumu weling la etimu.