Na kareuku na rukunai Yesus na ronguyaka hi Herodes Mrk. 6:14-29; Luk. 9:7-9 ¹ La rehi nu, hi Herodes, maramba lai nuya, na ronguyaka na kareuku rukunai Yesus. ² Dangu, hina paninja da atana, Yianayaka hi Yohanes parunung. Nyuna mbada luri belinaka welingu la padua tau meti djiaya nuna duka hi ninya napa mbiha wangu lai Nyuna. ³ Kanadu, Herodes na yapaya hi Yohanes, hina honduya, hala hina patamanya la uaka lailu rukunai Herodias, na papaha nai Filipus, na angu dedinai Herodes. ⁴ kanadu hi Yohanes ba kali wana dunya, Ndana hamu waanya djakau mangunyai Herodias. ⁵ Djaka djiaya hi Herodes na mbuhanguma papametiyai Yohanes, taka na mangadatunya na tau dangu kaba wunanguya hi Yohanes bawada di. ⁶ Taka, ba djiayaka na pangada nanya na dangu dedina hi Herodes, ka rianja nanyaka na anana kawini hi Herodias la hanggada nyuda, ka hanangu nanyaka na etinai Herodes, ⁷ nggara biaya na pakaraina na midi kawini nuna daingu mana baku wuanya. ⁸ Taka, bana halaka na inana papaninya, ka wanaka na bidi kawini nuna, wuangganya nahu lai yohu, hu tuya la ndulang na katikunai Yohanes hala kau wuangganya. ⁹ Djapangkai bana mila na etina na maramba, taka mbada hala naka paharangu dangu nggikiwanaka na tau nama ngangu danya, hina wuangu pareta lupangu kawuanya. ¹⁰ Hina parahangu lapa kadipuya na katikunai Yohanes la uaka. ¹¹ Dangu, hi tuya la ndulangu na katikunai Yohanes, hi wuanya na bidi kawini nuna hala nyuna hina ngandinya na inana. ¹² Halaka, da makikunyai Yohanes hi damai, papitiya na toluna, hala hida taninya. Hala, hida lua papaninya hi Yesus. ¹³ Taka ba naronguka hi Yesus na rukuna yiana, hina yilangu welingu lai nu wangu tiana, hina pamiahangu la mahinggilu. Hala, ba daronguyaka yiana da tau dangu, hida kiku-Nya bada wangu papangga lawihi welingu la hau kuatak-hau kuatak. ¹⁴ Bana luhuka hi Yesus, ka ngita nahaka da tau dangu, hala hina milanja eti nyuda, hala hina papanjanja nyuda dama hidu. ¹⁵ Ba mareni rudungu naka, dama kikunya damai lai Yesus hala hiwadanya, lai yohu na malinggitu hala mareni rudung amanaka. Parahanja da tau dangu kada beli la nde-ndeha kada kei pangangu nduma wikida. ¹⁶ Taka batuna nu, hiwananjai hi Yesus, ambu dalaku du. Mata nyimi kai wuanja pangangu. ¹⁷ Hala hiwadanya Nyuna, lai yohu nyuta yia nda ga-gara a maningu, 5 mbua ada da kanguta 2 ngiu ada da iyangu. ¹⁸ Hala, hiwana, ngandi gaha namu Nyungga, ¹⁹ Halaka, hina parahanya na tau dangu la pauhuku la pinu rumba, hala Nyuna hina pitiha da 5 mbua kanguta 2 ngiu iyangu nuda, hala hina tangara la awangu, hala Nyuna hina pamalangungu dangu hina kawita-witaha da kanguta nuda. Bana halaka, Nyuna hina wuanja la makikunya, hala dama kikunya hida wuanja da tau dangu. ²⁰ hala, nyuda hida ngangu lundu da mbihu. Halaka, hida pauhinja dama rihi, ningu hakambulu dambu kaliku mbinu. ²¹ Hala, dama ngangu ningu tau 5.000 ya na mini, ndedi paniha aha da kawini dangu da ana kiada. ²² Hi Yesus na pambanaha da makiku-Nya la patama la tiana hala kada laku mangilu la hapapa, hala Nyuna hina parahanja da tau dangu pabeli. ²³ Bana, halaka paparahanja da tau dangu pa kabeli, Hina hei la palindi didi miaha aya la pahambayangu. Ba mareni rudungunaka, didi miaha Ayaka lai nu. ²⁴ Djiaba tuna, bana marauka na tiana welingu la mamadu, hina kuadanya ngalungu kaba dapalawangu dangu na ngilu. ²⁵ Hala, la papatu wana na jam la rudung nuna, Nyuna na mai tuamaha nyuda, hina lindi la pinu wai. ²⁶ Da makiku-Nya Bada ngitayaka bana lindi la pinu wai, ka nda uku mangadatu ha hala hida wara, nuna na heitang! Hala, nyuda hida wa-wara kaba mangadatu danya. ²⁷ Halla batuna, ka manyamalu kareuku dananjaka nyuda, hiwa-Na, "Pamandunya na etimu! Djiaka Nyungga, ambi mangadat du. ²⁸ Hala, hi Petrus hi wana-Nya, Miri, djaka djia dukau, parahangga kaku lua tuama-Kau la pinu wai. ²⁹ Hiwanai Yesus, Pamainguwa! Hala, ka luhu nanyaka hi Petrus welingu la tiana, hala hina lindi la pinu wai, hina laku tuamaya hi Yesus. ³⁰ Taka, bana ngitayaka na ngilu, ka pakiringu nanyaka nyuna pa mangadatu hala kangeri tandaningu nanyaka. Hala kawara nanyaka, Miri, padita aruka! ³¹ Ka pandjuala nanyaka na lima-Na, hina yapayai Petrus, hala hi wana, nyumu mahakudungu parahayamu, kanggikina hiu ndua ndandi? ³² Taka bada tamaka la tiana, na ngilu mbu na kamandalu. ³³ Halaka, nyuda da maninja da latiana hida marubukunyai Yesus hala hiwada, "Langatakama Nyumu ba Ana Allahkau! ³⁴ Bada halaka papala, taka danyaka nyuda la tana Genesaret. ³⁵ Taka da tau lai nu bada tandayaka Nyuna, ka pani wangu danyaka lai nu hala hida ngandi halaha da tau dama hidu lai Yesus. ³⁶ Hala mala aru wadanyai Yesus djaka na peku kama damaya na hupu kalembi-Mu, dangu na tau nama damaya daingu mana bana panjangu.